Read kinyarwanda Amaganya 3 Bible Online

Amaganya 3 - kinyarwanda bible

Amaganya 3

¹[10] Ndi umuntu wamenyeranye n’umubabaro; nywutewe n’inkoni y’uburakari bwe.

²Yaranshoreye anyuza mu mwijima, aho kungendesha mu rumuri.

³Ni jye jyenyine acyamuriraho ikiganza cye, akabigira iminsi yose.

⁴Yanyoshye buhoro buhoro umubiri wanjye, amagufa yanjye arayajanjagura;

⁵yanzengurukijeho urukuta rurangota, ankikizaho ibitotezo n’ibyago;

⁶antuza mu mwijima mbese nk’abapfuye bo mu bihe bya kera.

⁷Yarankingiranye sinashobora gusohoka, ambohesha iminyururu iremereye.

⁸Naratakambye ndanatabaza, ariko isengesho ryanjye ararizinzika.

⁹Inzira zanjye yarazizitiye n’amabuye abajije, aho nanyuraga arahazibira.

¹⁰Amereye nk’ikirura cyubikiye cyangwa nk’intare irekereje;

¹¹yayobagije amayira yanjye, aranshwanyaguza; ansiga ndi igiterashozi.

¹²Yafoye umuheto we maze angira nk’intego y’umwambi we.

¹³Yampinguranyije impyiko n’imyambi yo mu mutana we.

¹⁴Umuryango wanjye wose wampinduye urw’amenyo, barantaramana igihe cyose.

¹⁵Yampagije indurwe, anyuhira ibinyobwa bisharira.

¹⁶Yampekenyesheje umusenyi, andisha ivu.

¹⁷Umutima wanjye nta mahoro ukiranganwa, sinkibuka icyitwa amahirwe!

¹⁸Nuko ndavuga nti «Imbaraga zanjye zarayoyotse, kimwe n’icyizere nari mfitiye Uhoraho.»

¹⁹Ibuka umubabaro wanjye n’agahinda kanjye, umenye indurwe n’uburozi wanyuhiye!

²⁰Ndabizirikana maze umutima wanjye ugashenguka;

²¹ariko kandi nzakomeza nibuke n’ibi ngibi bintera icyizere:

²²ni koko, imbabazi z’Uhoraho ntizirashira, urukundo rwe ntirugira iherezo,

²³ahubwo ineza ye ayivugurura uko bukeye, ubudahemuka bwe ntibugira urugero!

²⁴Ubwo ndavuga nti «Uhoraho ni we munani wanjye, ni cyo kintera kumwiringira.»

²⁵Uhoraho ni mwiza ku bamutegereje, anezeza umutima w’abamushakashaka.

²⁶Ni byiza ko umuntu yategereza mu ituze umukiro uzaturuka kuri Uhoraho,

²⁷akanikorera umuzigo we, akiri muto.

²⁸Ni byiza ko umuntu yakwicara ahiherereye agatuza, mu gihe umutwaro w’Uhoraho ukimuremereye;

²⁹ajye yunama akoze umunwa mu mukungugu: ahari byamuviramo kwizera!

³⁰Nategere umusaya umukubita, maze yemere guhazwa n’ibitutsi,

³¹kuko Uhoraho nta we atererana buheriheri.

³²Ni koko, arahana ariko akagira imbabazi, akurikije impuhwe ze zitagira urugero;

³³ntanezezwa no gucyaha abantu cyangwa ngo agambirire kubababaza.

³⁴Iyo bakandamiza imbohe zose z’igihugu,

³⁵bagahinyura uburenganzira bw’ikiremwamuntu mu maso y’Umusumbabyose,

³⁶bakarenganya umuntu mu rubanza, ubwo se Uhoraho yaba atabibona?

³⁷Ni nde uvuga ijambo rimwe, ibyo avuze bikabaho? Uhoraho se, si we utegeka?

³⁸Mu kanwa k’Umusumbabyose se, si ho haturuka amakuba n’amahirwe?

³⁹Noneho se muntu yakwinubira iki, niba akiriho, kandi ari n’umunyabyaha?

⁴⁰Nidusuzume inzira zacu, tuzigenzure maze tugarukire Uhoraho;

⁴¹twerekeze ibiganza byacu ejuru, imitima yacu ihugukire Imana iri mu ijuru.

⁴²Ni koko, twaracumuye turigomeka, naho wowe, wanga kutubabarira!

⁴³Wimiramijeho uburakari bwawe, uraduhiga, maze uradutsemba nta mbabazi;

⁴⁴wikingiriza igicu cyawe kugira ngo isengesho ryacu ritakugeraho,

⁴⁵uduhindura ibiseswa n’umwanda rwagati mu bihugu.

⁴⁶Abanzi bacu bose baratwasamiye;

⁴⁷umugabane dusigaranye ni ubwoba n’urwobo[11], amakuba n’ukurimbuka;

⁴⁸none amaso yanjye arasesa amarira adakama, kubera ukurimbuka k’umwari w’umuryango wanjye.

⁴⁹Amaso yanjye ararira ubudatuza, kandi nta na rimwe ajya ahwema,

⁵⁰kugeza ubwo Uhoraho azunama, akarebera aho ari mu ijuru.

⁵¹Amaso yanjye arambaga kubera agahinda natewe n’abakobwa bose bo mu Mugi wanjye.

⁵²Abanyanga nta mpamvu barantoteza, bakampiga nk’inyoni;

⁵³baroshye ubugingo bwanjye mu rwobo, bangerekaho ibuye;

⁵⁴amazi andenga ku mutwe, ni ko kuvuga nti «Ndahejeje!»

⁵⁵Uhoraho, natakambiye izina ryawe, ndi ikuzimu mu rwobo;

⁵⁶umva ijwi ryanjye rigutakira, rigira riti «Wikwima amatwi imiborogo n’induru byanjye.»

⁵⁷Waranyegereye umunsi nagutakambiraga, maze uravuga uti «Wigira ubwoba!»

⁵⁸Uhoraho, mu rubanza banciraga, wambereye umuvugizi, ugobotora ubugingo bwanjye;

⁵⁹Wabonye ukuntu bampohoteraga, Uhoraho, ngwino undenganure.

⁶⁰Wabonye uko bashishikajwe no kwihorera, n’imigambi yose mibi bamfitiye.

⁶¹Uhoraho, wumvise ibitutsi byabo, n’uko bahihibikanira kungambanira;

⁶²mu byo bavuga no mu byo bongorerana abanzi banjye ntibahwema kundenguriraho.

⁶³Bitegereze: baba bicaye, baba bahagaze, ni jye bataramana.

⁶⁴Uhoraho, na bo uzabiture ukurikije ibikorwa byabo;

⁶⁵umutima wabo uzawukomeze nk’ibuye, ube ari wo muvumo ubavumye.

⁶⁶Uzabakurikirane wuzuye uburakari, ubatsembe mu nsi y’ijuru ryawe, Uhoraho.