Read kinyarwanda Amaganya 4 Bible Online

Amaganya 4 - kinyarwanda bible

Amaganya 4

¹[12] Mbega ngo zahabu irahindana, ya zahabu iyunguruye yarononekaye! Mbega ngo amabuye matagatifu aranyanyagira agakwira hose mu mayirabiri!

²Byagenze bite kugira ngo abana ba Siyoni, bo bagereranywaga na zahabu inogereye, bageze aho gufatwa nk’ibibindi by’ibumba, byabumbwe n’ibiganza by’umubumbyi?

³Yewe, n’imbwebwe zigira impuhwe, zikonsa ibyana byazo; ariko umuryango wanjye wo ni intavumera, boshye za mbuni[13] zo mu butayu.

⁴Ururimi rw’ikibondo kikiri ku ibere, rwumiye mu rusenge rw’akanwa kubera inyota; ibitambambuga birasaba umugati, ariko ntihagire uwubaha.

⁵Abari basanzwe barya bakijuta, ngabo baguye umudari mu mayira; abarerewe mu mihemba, barigaragura mu myanda.

⁶Amafuti y’umwari w’umuryango wanjye[14], asumbye kure ibyaha bya Sodoma, yo yarimbutse mu kanya kangana urwara, nta n’uyikojejeho ikiganza.

⁷Abahungu bayo barabagiranaga kurusha urubura, bakarusha n’amata kwererana; imibiri yabo yashashagiraga kurusha umuhemba, mu maso habo hakabengerana kurusha ibuye ry’agaciro.

⁸None dore mu ruhanga rwabo harirabura kurusha imbyiro: ntibakimenyekana mu mayira; uruhu rwabo rwafashe ku magufa, rubumiraho uboshye igiti.

⁹Abicishijwe inkota barahiriwe kurusha abishwe n’inzara, bakagwa umudari, kubera ko imirima yarumbye.

¹⁰Abagore bafashe abana babo bagiriraga igishyika, barabateka kugira ngo babarye, kubera amakuba y’umwari w’umuryango wanjye.

¹¹Uhoraho yasagutswe n’umujinya, abadudubizaho uburakari bwe bw’igikatu; yacanye umuriro muri Siyoni, maze imfatiro zayo zose zirakongoka.

¹²Ari abami bo mu mahanga ari n’abatuye ku isi bose, nta n’umwe watekerezaga ko umubisha kimwe n’umwanzi, bazigera binjira mu marembo ya Yeruzalemu.

¹³Ibyo byatewe n’ibyaha by’abahanuzi bayo, kimwe n’amafuti y’abaherezabitambo bayo; bameneye amaraso y’intungane rwagati muri yo.

¹⁴Barindagiraga mu mayira, nk’impumyi; bihumanyije n’amaraso, bituma nta we utinyuka gukora ku myambaro yabo.

¹⁵Barabamaganaga bagira bati «Nimwigireyo mwarahumanye[15]! Nimwigireyo, nimwigireyo! Ntimugire icyo mukoraho!» Uko babuyeraga bahunga, abo mu mahanga baravugaga bati «Ntibazongere gutura iwacu ukundi!»

¹⁶Uhoraho yarabarebye maze arabatatanya, ntagishaka kubabona; ntibongeye kwita ku baherezabitambo, cyangwa ngo bubahe abasaza.

¹⁷Twebweho, amaso yacu yari yatukujwe no kurira, igihe twari dutegereje ko umutabazi yaza; twarakenguzaga ariko biba iby’ubusa: mu mahanga ntibashoboye kudukiza!

¹⁸Baratugenzuraga aho twajyaga hose, bakatubuza guhurira mu bibuga byacu. Twari tugiye gushira, akacu kari kashobotse, mbese igihe cyacu cyari cyageze.

¹⁹Abari badukurikiranye barihutaga kurusha za kagoma mu kirere; ku misozi baratujujubyaga, naho mu mayaga bakadusatira.

²⁰Intore y’Uhoraho[16] twakeshaga guhumeka, bayifatiye mu myobo yabo, kandi twaribwiraga tuti «Mu gicucu cyayo, ni ho tuzibera rwagati mu mahanga!»

²¹Ishime, uhimbarwe, mwari wa Edomu[17], wowe utuye mu gihugu cya Usi: nawe inkongoro izakugeraho, uzasinde maze wiyambike ubusa!

²²Mwari w’i Siyoni, amafuti yawe arababariwe; Uhoraho ntazongera kukujyana bunyago. Naho wowe, mwari w’i Edomu, azaguhanira amafuti yawe, agaragaze ibyaha byawe!