Read kinyarwanda Amaganya 5 Bible Online

Amaganya 5 - kinyarwanda bible

Amaganya 5

¹[18] Uhoraho, ibuka ibyatugwiririye, itegereze maze urebe uko badutuka!

²Umurage wacu wigaruriwe n’abanyamahanga, amazu yacu agabizwa abantu tutazi.

³Dore turi impfubyi nta ba data tukigira, na ba mama babaye nk’abapfakazi.

⁴Amazi, tuyanywa ari uko dutanze feza, n’inkwi tuzibona tubanje kuzishyura.

⁵Baturi nabi rwose, turatotezwa, turarembye, ntitukigira ikiruhuko.

⁶Dutegeye amashyi Misiri na Ashuru, kugira ngo tubone imigati idutunga.

⁷Ababyeyi bacu baracumuye, ariko ntibakiriho, ubu ni twebwe dushengurwa n’ibicumuro byabo.

⁸Dusigaye dutegekwa n’abacakara[19], ntihagire n’umwe utuvana mu nzara zabo.

⁹Dusarura ingano zacu ari uko duhaze amagara, kubera abasahuzi baturuka mu butayu bakadutera.

¹⁰Umubiri wacu urahinda umuriro uboshye itanura, kubera inzara yatuzahaje.

¹¹Muri Siyoni, abagore barafatwa ku gahato, kimwe n’abari mu migi ya Yuda.

¹²Bafashe abatware barabamanika, ntibacyubaha abakuru b’umuryango.

¹³Abasore baraheka urusyo n’ingasire[20], abahungu barikorera inkwi zikabaheta.

¹⁴Abasaza ntibakijya mu nama, abasore baretse gutera indirimbo zabo.

¹⁵Ibyishimo by’umutima wacu byarayoyotse, imbyino yacu ihinduka amaganya.

¹⁶Ikamba ryo ku mutwe wacu riraguye. Mbega ishyano! Turagowe kuko twahemutse!

¹⁷Icyatumye umubiri wacu wose urwara n’amaso yacu akaba yarahumye,

¹⁸ni uko umusozi wa Siyoni wabaye itongo, ugahinduka isenga ry’ingunzu.

¹⁹Ariko wowe, Uhoraho, uri umwami iteka ryose[21], intebe yawe ihoraho, uko amasekuruza agenda asimburana.

²⁰Ni iki cyatuma watwibagirwa ubuziraherezo, ukadutererana igihe kireshya gitya?

²¹Uhoraho, twigarurire natwe tukugarukire, vugurura imibereho yacu, tumere nka mbere.

²²Naho ubundi se, waba waratuzinutswe burundu, ku buryo watugirira uburakari bukabije gutyo?