Read kinyarwanda Baruki 1 Bible Online

Baruki 1 - kinyarwanda bible

Baruki 1

¹Dore amagambo yo mu gitabo Baruki mwene Neriya, mwene Mahasiya, mwene Sedekiya, mwene Asadiya, mwene Helikiya, yandikiye i Babiloni,

²ku munsi wa karindwi w’ukwezi[1], mu mwaka wa gatanu Abakalideya bamaze gufata Yeruzalemu bakanayitwika.

³Nuko rero, Baruki asomera amagambo y’icyo gitabo imbere ya Yekoniya[2] mwene Yoyakimu, umwami wa Yuda, n’imbere ya rubanda rwose rwari rwaje kumwumva;

⁴ayasomera n’imbere y’abanyacyubahiro, abana b’umwami n’abakuru b’umuryango, mbese muri make, imbere ya rubanda rwose, abakuru n’abato, ari bo bari batuye i Babiloni ku nkengero z’umugezi wa Sudi.

⁵Abantu barariraga, basiba kurya kandi bagasengera imbere ya Nyagasani.

⁶Nyuma bakoranyiriza hamwe feza, buri wese akurikije ubushobozi bwe,

⁷maze bazohereza i Yeruzalemu ku muherezabitambo Yoyakimu[3] mwene Helikiya, mwene Salomu, no ku bandi baherezabitambo na rubanda rwose rwari kumwe na we i Yeruzalemu.

⁸Baruki uwo nguwo, ku munsi wa cumi w’ukwezi kwa Sivani, ni we wari wagaruje ibikoresho byari byaravanywe mu Ngoro y’Uhoraho, kugira ngo abisubize[4] mu gihugu cya Yuda. Ibyo bikoresho ni bya bindi Sedekiya, mwene Yoziya, umwami wa Yuda, yari yarakoresheje muri feza,

⁹nyuma y’aho Nebukadinetsari, umwami w’i Babiloni, ajyanye bunyago Yekoniya hamwe n’abatware, abanyabukorikori, abanyacyubahiro na rubanda, abavanye i Yeruzalemu akabajyana i Babiloni.

¹⁰Nuko baravuga bati «Dore tuboherereje feza kugira ngo mugure ibitambo bitwikwa, ibihongerera ibyaha hamwe n’ububani; nimubitegure maze mubihereze ku rutambiro rwa Nyagasani, Imana yacu.

¹¹Nimusabire Nebukadinetsari, umwami w’i Babiloni, musabire na Balitazari, umuhungu we, kugira ngo bazarambe, mbese ku buryo iminsi bazamara ku isi izangana n’iyo mu ijuru.

¹²Musabe kandi ngo Nyagasani aduhe imbaraga, anamurikire n’amaso yacu kugira ngo tubeho tubikesheje Nebukadinetsari, umwami w’i Babiloni, n’umuhungu we Balitazari; tubakorere igihe kirekire kandi tubagireho ubutoni.

¹³Nimudusabire na twe kuri Nyagasani, Imana yacu, kuko twacumuye kandi umujinya n’uburakari bye bikaba bikidukurikiranye kugeza na n’ubu.

¹⁴Ngaho rero nimusome kandi icyo gitabo tuboherereje kugira ngo muzagisomere mu ruhame, mu Ngoro ya Nyagasani ku Munsi mukuru, no ku yindi minsi ibatunganiye.

¹⁵Dore uko muzajya muvuga: Ubutabera ni ubwa Nyagasani, Imana yacu, naho twebwe icyo dukwiriye ni ugukorwa n’ikimwaro, nk’uko bimeze ubu ku muntu wese wo muri Yuda no ku baturage b’i Yeruzalemu,

¹⁶ku bami n’abatware bacu, ku baherezabitambo, abahanuzi n’ababyeyi bacu.

¹⁷Ni koko, twacumuye kuri Nyagasani,

¹⁸turamusuzugura kandi ntitwumva ijwi rya Nyagasani, Imana yacu, ryaduhuguriraga kugendera mu nzira z’amategeko ye.

¹⁹Kuva ubwo Nyagasani avanye abasekuruza bacu mu gihugu cya Misiri kugeza uyu munsi, twakomeje guhemukira Nyagasani, Imana yacu, turigomeka twanga kumva ijwi rye.

²⁰Ngiyo imvano y’ibyago n’imivumo bitaduhwemera kugeza na n’ubu, nk’uko Nyagasani yabibwiye Musa umugaragu we, igihe avanye abasekuruza bacu mu Misiri kugira ngo aduhe igihugu gitemba amata n’ubuki.

²¹Twanze kumva ijwi rya Nyagasani, Imana yacu, ngo dukurikize amabwiriza yose y’abahanuzi yatwoherereje;

²²ahubwo twarigendeye buri muntu akurikije ibyifuzo bibi by’umutima we, tujya gukorera izindi mana maze dukora dutyo ibidatunganiye Nyagasani, Imana yacu.