Read kinyarwanda Baruki 3 Bible Online

Baruki 3 - kinyarwanda bible

Baruki 3

¹Nyagasani Mushoborabyose, Mana ya Israheli, umutima ushavuye na roho ifite intege nke, ni byo bigutakiye.

²Tega amatwi, Nyagasani, ugire impuhwe kuko twagucumuyeho.

³Wowe wicaye ku ntebe y’ubwami ubuziraherezo, naho twebwe tukarimbuka bidasubirwaho!

⁴Nyagasani Mushoborabyose, Mana ya Israheli, umva ugutakamba kw’abapfuye ba Israheli; turi abana b’abagucumuyeho bakanga kumva ijwi rya Nyagasani, Imana yabo, ku buryo ibi byago byatubayeho akaramata.

⁵Ntiwite ku bicumuro by’abasekuruza bacu, ahubwo wibuke muri aka kanya ububasha bwawe n’Izina ryawe.

⁶Ni koko, uri Nyagasani, Imana yacu, kandi turashaka kugusingiza, Nyagasani.

⁷Washyize mu mutima wacu igitinyiro cyawe kugira ngo twiyambaze izina ryawe; tuzagusingiza turi aho twajyanywe bunyago kuko twitandukanyije n’ubugome bw’abasekuruza bacu, bagucumuyeho.

⁸Ngaha turi hano muri ibi bihugu bya kure wadutatanyirijemo kugira ngo duhinduke urukozasoni, ibivume n’ibicibwa, bitewe n’ibicumuro byose by’abasekuruza bacu bitandukanyije na Nyagasani, Imana yacu.

⁹[5] Israheli, umva amategeko atanga ubuzima, tega amatwi kugira ngo umenye gushishoza.

¹⁰Bite se, Israheli, ni kuki uba mu gihugu cy’abanzi, ukaba uriho usazira mu gihugu cy’amahanga?

¹¹Dore warihumanyije wegera intumbi, none urabarirwa mu bajya ikuzimu.

¹²Wabitewe n’uko waciye ukubiri n’Isoko y’Ubuhanga!

¹³Iyo uza gukurikiza inzira y’Imana, uba uriho mu mahoro adashira.

¹⁴Ngaho siganuza ahari ubushishozi, imbaraga n’ubumenyi, kugira ngo umenye ahari ukuramba n’ubugingo, n’aho urumuri rw’amaso n’amahoro biherereye.

¹⁵Ariko se, ni nde wabonye aho ubuhanga butuye, akinjira mu bubiko bwabwo?

¹⁶Bari hehe abo batware b’amahanga, bo bategeka n’inyamaswa z’inkazi zo ku isi?

¹⁷Bari hehe abakinishaga inyoni zo mu kirere, bagahunika feza na zahabu, ari byo abantu biringira, bakaba bararunze byinshi bitagira uko bingana?

¹⁸Bari hehe abatunganyaga feza babyitondeye, nyamara ibikorwa byabo ntibyibukwe?

¹⁹Barazimiye, bamanukira ikuzimu, basimburwa n’abandi.

²⁰Ababonye urumuri nyuma yabo bakwiriye ku isi, ariko ntibigeze bamenya inzira y’ubumenyi,

²¹ngo biyumvishe inzira zabwo. Abana babo ntibigeze babushakashaka, ahubwo barabwitaruye, bahabye inzira y’ubumenyi.

²²Muri Kanahani nta cyo babumenyeho, i Temani ho ntibigeze banaburabukwa;

²³bene Hagara bashakashaka ubumenyi ku isi, abacuruzi b’i Madiyani n’ab’i Temani, ba gacamigani n’abashakashatsi mu by’ubumenyi, ntibigeze bamenya inzira y’ubuhanga, habe no kwibuka inzira zabwo!

²⁴Israheli we, mbega ukuntu aho Imana ituye ari hagari, kandi ntihagire urubibi!

²⁵Umunani wayo ni munini, birenze urugero, ukaba na muremure, ntugire icyo bireshya!

²⁶Aho ni ho havukiye abantu b’ibihanyaswa babayeho kuva mu ntangiriro, ba bantu barebare mu gihagararo kandi bamenyereye intambara!

²⁷Ariko abo ngabo si bo Imana yitoreye, si na bo yeretse inzira y’ubuhanga.

²⁸Bararimbutse kuko nta buhanga baranganwaga, bamarwa n’ubusazi bwabo.

²⁹Ni nde wigeze kuzamuka mu ijuru ngo abufate, maze ngo abumanure mu bicu?

³⁰Ni nde wambutse inyanja ngo abushakashake, akabuzana amaze kubutangaho zahabu iyunguruye?

³¹Nta muntu n’umwe umenya inzira bunyura, nta n’uwasobanukirwa n’utuyira twabwo.

³²[6]Nyamara Nyir’ubumenyi bwose arabuzi, yarabucengeye abikesheje ubwenge bwe, we waremye isi ngo ibeho iteka ryose, akayikwizaho inyamaswa n’amatungo y’amoko yose,

³³we wohereza urumuri maze rukagenda, yaruhamagara, rukamwumvira rudagadwa,

³⁴inyenyeri zikamurikira mu myanya yazo zishimye;

³⁵yazihamagara zikitaba, zigira ziti «Turi hano», zinejejwe no kumurikira Uwaziremye.

³⁶Uwo ni we Mana yacu, kandi nta n’undi wagereranywa na we!

³⁷Yaciye inzira izo ari zo zose ziganisha ku bumenyi, azereka Yakobo, umugaragu we, na Israheli, inkoramutima ye;

³⁸nuko bwigaragaza butyo ku isi, butura mu bantu.