Read kinyarwanda Baruki 4 Bible Online

Baruki 4 - kinyarwanda bible

Baruki 4

¹Ubuhanga ni igitabo cy’amabwiriza[7] y’Imana, bukaba n’Itegeko rizahoraho iteka; ababwiziritseho bose bazaronka ubugingo, naho ababucaho bazapfe nabi.

²Yakobo, garuka, ubwakire, ugendere mu nzira izakugeza ku mucyo, umurikiwe n’urumuri rwabwo.

³Wigira undi wegurira ikuzo ryawe, cyangwa ngo ibyiza warazwe ubigabize igihugu cy’abanyamahanga.

⁴Turahirwa, twebwe Abayisraheli, kuko twahishuriwe igishimisha Imana!

⁵Ikomezemo ubutwari, muryango wanjye, wowe Israheli ikesha kutibagirana!

⁶Mwagurishijwe mu mahanga atari ukugira ngo murimbuke, kuba mwararakaje Imana byatumye mugabizwa abanzi banyu.

⁷Ni koko mwarakaje Uwabaremye, mutura ibitambo Sekibi n’abayo, aho kubitura Imana.

⁸Mwibagiwe Imana ihoraho yabagaburiye, mutera agahinda Yeruzalemu yabareze.

⁹Yabonye uburakari bw’Imana bubagwiririye, iravuga iti «Baturanyi ba Siyoni nimwumve, Imana yanteye agahinda kenshi.

¹⁰Nabonye abahungu n’abakobwa banjye bajyanwa bunyago, babitejwe n’Uhoraho.

¹¹Nari narabareze mu byishimo, ariko narabaretse baragenda, nsigarana agahinda n’umubabaro.

¹²Ntihagire n’umwe unyishimaho, jye w’umupfakazi watereranywe na benshi; ndi mu bwigunge kubera ibicumuro by’abana banjye, kuko birengagije amategeko y’Imana.

¹³Ntibamenye amabwiriza yayo, habe no gukurikiza amateka yayo, ngo bagendere mu nzira zibatoza ubutabera bwayo.

¹⁴Baturanyi ba Siyoni, nimukorane, mwibuke ijyanwa bunyago Uhoraho yateje abahungu banjye n’abakobwa banjye.

¹⁵Koko yabateje ihanga riturutse kure; ni abanyarugomo kandi bavuga ururimi rutumvikana, ntibubaha abasaza, ntibagirira n’utwana impuhwe,

¹⁶bacuza umupfakazi abahungu be yakundaga, bakamunyaga n’abakobwa be, agasigara yigunze.

¹⁷Ariko se jye nabatabara nte?

¹⁸Uwabateje ibi byago, ni we uzabagobotora mu nzara z’abanzi banyu.

¹⁹Nimugende, bana banjye, mukomeze urugendo! Jyewe dore naratereranywe kandi ndigunze;

²⁰niyambuye ikanzu yanjye y’ibyishimo, nambara ikigunira, nzakomeza gutakambira Uhoraho igihe cyose nzaba nkiriho.

²¹Nimukomere, bana banjye! Nimutakambire Imana, Yo izabagobotora mu bushikamirwe no mu nzara z’abanzi banyu.

²²Koko, nizeye Uhoraho uzabakiza, kandi ibyishimo bya Nyir’ubutagatifu byaransendereye, kuko Uhoraho, Umukiza wanyu, azabababarira bidatinze.

²³Ni koko mwaragiye, nsigarana ububabare n’agahinda, ariko Imana izabangarurira twibanire mu byishimo n’umunezero bidashira.

²⁴Uko abaturanyi ba Siyoni babonye mujyanwa bunyago, ni ko bazabona bidatinze umukiro uzaturuka ku Mana yanyu, muzatungurwe n’ikuzo ryinshi n’ububengerane by’Uhoraho.

²⁵Bana banjye, nimwihanganire uburakari bw’Imana bwabashiriweho; umwanzi wawe yaragutoteje, ariko uzabona bidatinze ukurimbuka kwe, kandi uzamukandagira ku gakanu!

²⁶Abana banjye b’abatesi banyuze mu mayira y’ibiharabuge, bajyanwa ku gahato, nk’amatungo anyazwe n’abanzi.

²⁷Nimukomere, bana banjye, kandi mutakambire Imana, kuko Uwabateje ayo makuba azashyira akabibuka.

²⁸Nk’uko kera mutashidikanyije kwitarura Imana, ubu nimube ari ko muharanira kuyigarukira, ndetse mubikorane umwete uruse incuro cumi ubute bwanyu bwa mbere.

²⁹Koko rero, Uwabateje ibi byago ni na we uzabakiza, anabazanire ibyishimo bizahoraho.

³⁰Ikomezemo ubutwari, Yeruzalemu, kuko Uwakwise iryo zina[8], ari na we uzaguhoza.

³¹Bariyimbire abakugiriye nabi, bakanishimira isenywa ryawe!

³²Iriyimbire imigi yagize abana bawe abacakara! Wiyimbire umugi[9] abahungu bawe bajyanywemo bunyago!

³³Koko rero, nk’uko uwo mugi wishimiye isenywa ryawe, ukanezezwa n’ukurimbuka kwawe, ni na ko uzababazwa bikabije, ku munsi na wo ubwawo uzaba watsembwe.

³⁴Nzawucuza imbaga nyamwinshi yawuteraga ibyishimo, ubwirasi bwawo busimburwe n’akababaro;

³⁵Uhoraho azawumanuriraho umuriro uwutwike hashire iminsi, kandi uzaturwe n’impaca, na none igihe kirekire.

³⁶Yeruzalemu, reba mu burasirazuba maze witegereze: ibyishimo bije bikugana biturutse ku Mana.

³⁷Abana bawe wabonye bagenda ngabo baragarutse, baje bakoranyijwe n’ijambo rya Nyir’ubutagatifu, kuva mu burasirazuba kugera mu burengero bwaryo, bishimiye ikuzo ry’Imana.