Read kinyarwanda Baruki 5 Bible Online

Baruki 5 - kinyarwanda bible

Baruki 5

¹Yeruzalemu, iyambure ikanzu yawe y’ububabare n’agahinda, ngaho ambara uburanga bw’ikuzo ry’Imana, uzabuhorane,

²itere igishura cy’ubutungane uhawe n’Imana, utamirize mu mutwe ikamba ry’ikuzo ry’Uhoraho ;

³kuko Imana ishaka kugaragariza uburanga bwawe ibihugu byose biri mu nsi y’ijuru,

⁴bityo ikazakwita iri zina ritazazimangana ngo : «Mahoro y’ubutabera na Kuzo ry’ubusabaniramana.»

⁵Yeruzalemu, haguruka ujye ahirengeye, werekeze amaso mu burasirazuba : itegereze abana bawe bakoranyijwe n’ijambo rya Nyir’ubutagatifu, kuva mu burengerazuba kugera mu burasirazuba, baje baririmba ko Imana yabibutse.

⁶Bari basohotse mu marembo yawe ku maguru, bashushubikanyijwe n’abanzi, none Imana ibakugaruriye mu ikuzo, nk’abahetswe mu ngobyi ya cyami.

⁷Koko rero, Imana yiyemeje gusiza imisozi miremire, kimwe n’utununga twahozeho kuva kera, imikokwe igasibwa kugira ngo hose haringanire, maze Israheli ikigendera umudendezo, imurikiwe n’ikuzo ry’Imana.

⁸Amashyamba n’ibiti byose bihumura neza bizugamisha Israheli mu gicucu cyabyo, ku bw’itegeko ry’Imana ;

⁹kuko Yo ubwayo izayobora Israheli mu byishimo, ikayiganisha mu rumuri rw’ikuzo ryayo, ikarangwa n’imbabazi n’ubutungane bituruka nyine ku Mana. Dore inyandikomvugo y’ibaruwa Yeremiya yoherereje abo umwami w’Abanyababiloni yari agiye kujyana bunyago i Babiloni, kugira ngo abagezeho ibyo Imana yari yamutegetse kubamenyesha. [10]