Read kinyarwanda Baruki 6 Bible Online

Baruki 6 - kinyarwanda bible

Baruki 6

¹Kubera ibyaha mwakoreye Imana, Nebukadinetsari, umwami w’i Babiloni, agiye kubajyana bunyago i Babiloni.

²Nimugerayo muzahamara imyaka myinshi, n’igihe kirekire, bigeze ku bisekuruza birindwi[11]; nyuma ariko nkazahabavana mu mahoro.

³Nuko rero, i Babiloni muzahabona ibigirwamana bikozwe muri feza, muri zahabu no mu biti, bigahekwa ku ntugu maze bigakangaranya abanyamahanga.

⁴Muramenye, namwe ntimuzamere nk’abo banyamahanga ngo mutinye ibyo bigirwamana,

⁵mubonye iyo mbaga ibikikije, ikanabisenga. Ahubwo muzibwire mu mutima, muti «Mutegetsi, ni wowe wenyine ukwiye gusengwa.»

⁶Kuko umumalayika wanjye ari kumwe namwe, akaba ari we uzabitaho, agatuma mubaho.

⁷Koko rero, ururimi rw’ibyo bigirwamana rwabajwe n’umunyabukorikori, bisigwa zahabu na feza, ariko ubwabyo ni ibinyoma nta n’ubwo bibasha kuvuga.

⁸Nk’uko bakora imitako y’umukobwa w’inkumi ukunda kurimba, abo bantu bafata zahabu, maze bakayikoramo amakamba yo gutamiriza ku mutwe w’ibyo bita imana zabo.

⁹Rimwe na rimwe ndetse n’abaherezabitambo babyo babyibaho zahabu na feza, bakabyikoreshereza ibyo bakeneye, kugeza n’aho babihaho n’indaya zibera hejuru mu masengero yabo.

¹⁰Ibyo bigirwamana byabo bikozwe muri feza, muri zahabu no mu biti babyambika imyambaro nk’iy’abantu, ariko byo ntibishobora kwirinda ingese n’imungu.

¹¹Iyo bamaze kubyambika umwenda w’umuhemba, ahasigaye bahungura mu ruhanga rwabyo umukungugu wo mu ngoro, ubitumukiraho.

¹²N’ubwo usanga hari igifashe inkoni nk’umutware w’igihugu, nyamara ntigishobora kwica ugisuzuguye!

¹³Ikindi usanga gicigatiye inkota n’intorezo mu kiganza cy’iburyo, nyamara ntigishobore kwirwanaho mu ntambara cyangwa se kwikiza abajura!

¹⁴Ibyo byose bigaragaza ko bitari imana; nuko rero ntimukabitinye[12]!

¹⁵Nk’uko ikibindi kimenetse kibura icyo kimara, ni na ko ibyo bigirwamana bashyira mu ngoro bimeze.

¹⁶Amaso yabyo yuzuranaho umukungugu utumurwa n’ibirenge by’abantu binjira.

¹⁷Mbese nk’uko bakingirana umuntu watutse umwami mbere y’uko ajyanwa kwicwa, ni ko abaherezabitambo bakingisha ingoro z’izo mana zabo inzugi, bakazishyiraho amapata n’ibihindizo, batinya ko abajura baza kuziba.

¹⁸Bacana amatara menshi aruta ubwinshi ayo mu mazu yabo bwite, kandi ibyo bigirwamana bidashobora no kubona na rimwe muri yo.

¹⁹Bimeze nka kimwe mu biti by’igisenge cy’ingoro bavuga ko cyamunzwe; umuswa uvuye mu butaka ubiryana n’imyambaro yabyo, nyamara ntibigire icyo byumva.

²⁰Uruhanga rwabyo rwahindutse umurayi kubera imyotsi izamuka mu ngoro;

²¹ku mubiri wabyo no ku mutwe usanga hatonze uducurama, intashya n’ibindi binyoni biguruka binyuranamo; ndetse hari n’injangwe.

²²Ibyo byose ni byo muzamenyeraho ko bitari imana; nuko rero ntimukabitinye!

²³Babisize zahabu ituma biba byiza, ariko nihatagira ubikuba ngo abikureho umwanda, si byo bizisubiza ububengerane; kuko n’igihe babishongeshaga, byo nta cyo byigeze byumva.

²⁴N’aho babigura ku giciro bishakiye cyose, nta mwuka w’ubugingo ubirimo.

²⁵Kubera ko bitagira ibirenge babiheka ku ntungu, bityo bikagaragariza abantu ikimwaro cyabyo. Abagaragu babyo na bo bakorwa n’isoni, kuko ari bo babyegura igihe byirunze hasi.

²⁶N’iyo babyeguye ntibibasha ubwabyo kwinyagambura, birahengama ntibishobore kwiyegura; kubihereza amaturo ni nko kuyatura intumbi!

²⁷Inyama batura ibyo bigirwamana, abaherezabitambo babyo barazicuruza bakazungukaho, abagore babo bagafata igice kimwe cyazo bakagishyiraho umunyu, ntibagire icyo bafashisha abakene n’abatishoboye. Umugore uri mu mihango y’abakobwa kimwe n’umaze kubyara, ntibatinya gukorakora ibyatuwe ibyo bigirwamana.

²⁸Mumenyere rero kuri ibyo byose ko bitari imana, nuko rero ntimukabitinye!

²⁹Ayo mashusho akozwe muri feza, muri zahabu no mu biti umuntu yayita imana ashingiye ku ki, kandi abagore ari bo bayahereza amaturo?

³⁰Abaherezabitambo biyicarira mu ngoro zeguriwe ibyo bigirwamana, bambaye imyambaro y’ibishwangi, bogoshe imisatsi n’ubwanwa, kandi batitwikiriye mu mutwe;

³¹bakaboroga kandi bagasakuza imbere yabyo, mbese nk’uko babigenza mu mihango yo guhamba uwapfuye.

³²Hanyuma bagatwara imyambaro y’ibyo bigirwamana, bakayambika abagore babo n’abana babo.

³³Ubigiriye neza cyangwa se nabi, ibyo bigirwamana ntibishobora kubimwitura; nta n’ububasha bigira bwo kwimika umwami cyangwa se kumukuraho;

³⁴nta n’ubwo bishobora gutanga ubukungu cyangwa se imari. Iyo hari ubigiriye isezerano ntaryuzuze, ntibishobora kubimuryoza.

³⁵Ntibishobora gukiza umuntu urupfu, cyangwa se ngo bigobotore umunyantege nke mu nzara z’umunyamaboko;

³⁶ntibishobora guhumura impumyi cyangwa ngo bivane umuntu mu kababaro;

³⁷ntibishobora kugirira impuhwe umupfakazi cyangwa ngo bigirire neza impfubyi.

³⁸Ibyo bigirwamana bikozwe mu biti bakabisiga zahabu na feza, nta cyo birusha amabuye yacukuwe ku musozi; n’abagaragu babyo bazakorwa n’isoni!

³⁹Ubwo se umuntu yabona ate, cyangwa akaba yavuga ate ko byaba imana?

⁴⁰Byongeye kandi, n’Abakalideya ubwabo barabisuzugura: nk’iyo babonye umuntu w’ikiragi bamuzanira Beli, bakamusaba ngo ahe uwo muntu kuvuga, mbese nk’aho icyo kigirwamana cyashobora kubumva;

⁴¹abo bantu na bo kandi ntibabasha gutekereza neza ngo bareke ibyo bigirwamana bitagira ubwenge!

⁴²Hari n’abagore bakenyera imyeko, bakicara ku mayira ngo batwike ibishogoshogo nk’aho ari ububani;

⁴³igihe umwe muri bo yaryamanye n’umugenzi umuhamagaye, akannyega mugenzi we ngo kuko batamubengutse nka we, umweko we ntukenyururwe.

⁴⁴Rwose ibikorerwa ibyo bigirwamana byose ni amanjwe. Ubwo se umuntu yabona ate, cyangwa akaba yavuga ate ko byaba imana?

⁴⁵Ibyo bigirwamana byakozwe n’abanyabukorikori n’abacuzi ba zahabu na feza; nta kindi rero byashobora kuba cyo, kitari icyo ababikoze babishakaho.

⁴⁶Abo banyabukorikori na bo ntibazabaho igihe kirekire; none se ibikorwa byabo byashobora bite kuba Imana?

⁴⁷Koko rero, nta kindi abo bantu bazasigira urubyaro rwabo kitari ibinyoma n’ikimwaro.

⁴⁸Iyo hateye intambara cyangwa ibyago, abaherezabitambo usanga babazanya aho bajya kwihisha, bo n’ibigirwamana byabo.

⁴⁹Ni kuki batumviraho ko bitari imana, kandi na byo ubwabyo bidashobora kwikiza intambara cyangwa ibyago?

⁵⁰Koko rero, ni ibiti bisize zahabu na feza, umunsi umwe bose bazumva ko ari ibinyoma; amahanga yose kimwe n’abami bose bazamenya ko bitari imana, ahubwo ko ari ibikorwa bivuye mu biganza by’abantu, kandi ko nta bubasha bukomoka ku Mana bubirimo.

⁵¹Ni iki gituma rero bose badakurizaho kumva ko bitari imana?

⁵²Ntibishobora kwimikira igihugu umwami cyangwa ngo bihe abantu imvura.

⁵³Ntibishobora kwifatira ibyemezo ku bibazo byabyo bwite cyangwa ngo birenganure urengana: nta cyo bishoboye, bimeze nk’ibikona biri mu kirere hagati y’ijuru n’isi.

⁵⁴Umuriro uramutse utwitse ingoro y’ibyo bigirwamana by’ibiti, bisize zahabu na feza, abaherezabitambo babyo bakwihungira bakavamo ari bataraga, ariko byo byashya byose bigakongoka nk’ibiti biri mu cyocyezo.

⁵⁵Ntibyashobora guhangara umwami cyangwa abanzi.

⁵⁶Umuntu rero yashobora ate kwemera cyangwa gutekereza ko byaba imana?

⁵⁷Ibyo bigirwamana by’ibiti, bisize feza na zahabu, ntibishobora kwikiza abajura n’abasahuzi; bityo rero ababirusha amaboko bazabikuraho zahabu na feza kandi batware n’imyambaro byari byambaye, kuko bidashobora kwirwanaho.

⁵⁸Umwami agaragaza hose ubutwari bwe, ndetse n’igikoresho cyo mu rugo kikagirira nyiracyo akamaro; ni cyo gituma biruta ibyo bigirwamana by’ibinyoma. Ibyaba byiza kurushaho ni ukwibera urugi rw’inzu rukingira ibiyirimo cyangwa se inkingi y’igiti mu ngoro y’umwami, aho kuba nk’ibyo bigirwamana by’ibinyoma!

⁵⁹Koko rero, izuba, ukwezi n’inyenyeri bifite ubutumwa bigomba kurangiza kandi bikumvira;

⁶⁰umurabyo na wo igihe urabije uryohera ijisho; umuyaga uhuhera mu bihugu byose;

⁶¹ibicu byubahiriza itegeko Imana yabihaye bikazenguruka isi yose; umuriro woherejwe uturutse mu ijuru ngo utwike imisozi n’amashyamba, na wo ukora icyo wategetswe.

⁶²Ibigirwamana byo ntibigereranywa na gato n’ibyo tumaze kurondora, haba mu buranga cyangwa mu bubasha,

⁶³bigatuma rero nta wakubahuka gutekereza cyangwa kuvuga ko byaba imana, kuko bidashobora guca imanza cyangwa ngo bigire icyiza bikorera abantu.

⁶⁴Mumenye rero ko bitari imana; ntimukabitinye!

⁶⁵Koko rero, ntibishobora kuvuma abami cyangwa kubaha umugisha,

⁶⁶ntibishobora kwereka amahanga ibimenyetso byo mu ijuru; ntibibengerana nk’izuba cyangwa ngo bimurike nk’ukwezi.

⁶⁷Inyamaswa zo mu ishyamba zirabiruta kure, kuko zishobora kwihisha no kwirwanaho ubwazo.

⁶⁸Nuko rero, nta kintu na kimwe kitugaragariza ko byaba imana, namwe ntimukabitinye!

⁶⁹Ibyo bigirwamana byabo by’ibiti, bisize zahabu na feza, bimeze nk’ibishusho bikanga inyoni mu mirima y’imyungu, ariko ntibigire icyo bikora.

⁷⁰Ikindi kandi, ibyo bigirwamana byabo by’ibiti, basize zahabu na feza, bimeze nk’igihuru cy’amahwa kiri mu busitani maze inyoni z’amoko yose zikakigwaho, cyangwa nk’intumbi bajugunye mu mwijima!

⁷¹Umwenda w’umuhemba n’uw’ihariri ubiboreraho, ni byo muzamenyeraho ko bitari imana. Amaherezo bizamungwa maze bihinduke urukozasoni mu gihugu.

⁷²Birutwa n’umuntu w’intungane utayoboka ibigirwamana, kuko uwo nguwo atazakorwa n’ikimwaro!