Read kinyarwanda Ezekiyeli 11 Bible Online

Ezekiyeli 11 - kinyarwanda bible

Ezekiyeli 11

¹Nuko umwuka uranjyana ungeza ku irembo ry’iburasirazuba bw’Ingoro y’Uhoraho, ryerekera nyine iburasirazuba; ku rugi rw’iryo rembo hakaba hahagaze abantu makumyabiri na batanu. Muri bo mbona Yazanya mwene Azuru, na Pelatiyahu mwene Benayahu, abatware b’umuryango.

²Uhoraho arambwira ati «Mwana w’umuntu, ngabo abantu bagambirira gukora ikibi, bagakwiza inama mbi muri uyu mugi.

³Baribwira bati ’Igihe se nticyaba cyegereje maze bakatwubakira andi mazu ! Umugi ni nk’inkono, naho twebwe tukaba nk’inyama ziyirimo[38].’

⁴Ni cyo gituma rero, mwana w’umuntu, ugomba guhanura ibiberekeyeho.»

⁵Nuko umwuka w’Uhoraho unsesekaraho, maze arambwira ati «Ngaho babwire uti ’Uhoraho avuze atya: Koko ni ko muvuga, muryango wa Israheli, kandi nzi n’ibitekerezo byanyu.

⁶Abo mwica muri uyu mugi bakabije ubwinshi, kimwe n’abo mwararika ku mayira yose.

⁷Ni yo mpamvu rero Nyagasani Uhoraho avuze atya: Abapfu mwujuje mu mugi ni bo nyama, umugi ukaba inkono; ariko mwebwe nkazawubavanamo.

⁸Kubera ko mutinya inkota, uwo ni Uhoraho ubivuze, nzabateza inkota.

⁹Nzabavana mu mugi mbagabize ibiganza by’abanyamahanga, maze mbacire urwo mukwiye.

¹⁰Muzashirira ku nkota kandi mbacire urubakwiye ku butaka bwa Israheli nyirizina, maze muzamenye ko ndi Uhoraho.

¹¹Uyu mugi ntuzigera ubabera inkono, nta n’ubwo muzawubamo inyama, ahubwo nzabacira urubakwiye ku butaka bwa Israheli,

¹²bityo muzamenye ko ndi Uhoraho, mukaba mwaranze gukurikiza amategeko yanjye n’imigenzo yanjye; ahubwo mugakurikiza imigenzereze y’amahanga abakikije.’»

¹³Mu gihe nahanuraga rero, Pelatiyahu mwene Benayahu arapfa. Nuko nitura hasi nubamye, maze ntera hejuru mu ijwi riranguruye nti «Nyagasani Uhoraho, waba se ugiye gutsiratsiza agasigisigi ka Israheli?»

¹⁴Nuko Uhoraho ambwira iri jambo, ati

¹⁵«Mwana w’umuntu, abaturage ba Yeruzalemu barabwira buri muntu mu bavandimwe bawe, mu babyeyi bawe n’umuryango wose wa Israheli, bati ’Nimwigumire aho kure y’Uhoraho, iki gihugu ni twebwe[39] cyahaweho umurage.’

¹⁶Ni yo mpamvu itumye Nyagasani Uhoraho avuga atya: Ni koko nabigije kure yanjye mu mahanga, mbatatanyiriza mu bindi bihugu; ariko no muri ibyo bihugu sinaretse gutura muri mwe nk’igihe nari mu Ngoro yanjye.

¹⁷Nuko rero ubabwire uti ’Dore uko Nyagasani Uhoraho avuze: Nzabakorakoranya[40] mbakuye mu mahanga, mbakoranyirize hamwe mbakuye mu bihugu mwatataniyemo, maze mbahe igihugu cya Israheli.

¹⁸Muzakigarukamo, mugitsembemo ibiterashozi byose n’amahano yose.

¹⁹Nzabaha umutima umwe, mbashyiremo umwuka mushya; nzavana mu mubiri wanyu umutima w’ibuye, mbashyiremo umutima wumva,

²⁰kugira ngo mugendere ku mategeko yanjye n’imigenzo yanjye kandi mubikurikize; maze muzambere umuryango, nanjye mbe Imana yanyu.

²¹Naho ab’umutima ukihambiriye ku biterashozi byabo no ku mahano yabo, uwo ni Uhoraho ubivuze, nzabibaryoza nkurikije imyifatire yabo.’»

²²Nuko abakerubimu bazamura amababa yabo, inziga na zo zijyana na bo n’ikuzo ry’Imana ya Israheli riguma hejuru yabo.

²³Hanyuma ikuzo ry’Uhoraho rihaguruka mu mugi, rihagarara ku musozi wari mu burasirazuba bwawo.

²⁴Nuko njyanwa n’umwuka kugera mu Bakalideya hafi y’abajyanywe bunyago; ibyo kandi biba mu ibonekerwa no mu mwuka w’Imana, maze ibyo nerekwaga kandi nari mbereye umuhamya birazimira.

²⁵Hanyuma ntekerereza abari barajyanywe bunyago ibyo Uhoraho yari yanyeretse byose.