Read kinyarwanda Ezekiyeli 20 Bible Online

Ezekiyeli 20 - kinyarwanda bible

Ezekiyeli 20

¹Nuko mu mwaka wa karindwi[65], ku munsi wa cumi w'ukwezi kwa gatanu, bamwe mu bakuru b'umuryango wa Israheli baraza bicara imbere yanjye, bazanywe no guhanuza Uhoraho.

²Ubwo Uhoraho ambwira iri jambo, ati

³«Mwana w'umuntu, bwira abakuru b'umuryango wa Israheli uti 'Dore uko Nyagasani Uhoraho avuze : Ese ye, ubwo muzanywe no kugira icyo mumpanuza ? Mbirahiye ubugingo bwanjye - uwo ni Nyagasani Uhoraho ubivuze - nta bwo nzemera guhanuzwa namwe.'

⁴Ni ko se mwana w'umuntu, ntugiye se kubacira urubanza ? Ngaho bamenyeshe amahano yakozwe n'abakurambere babo.

⁵Uzababwire uti 'Dore uko Nyagasani Uhoraho avuze : Umunsi nitoreye umuryango wa Israheli, nkarahira ndamburiye ikiganza ku nzu ya Yakobo ; nabibamenyesheje muri mu gihugu cya Misiri, mbaramburiraho ikiganza kandi mbabwiza indahiro nti 'Ndi Uhoraho Imana yanyu.'

⁶Uwo munsi nabaramburiyeho ikiganza, mbarahira ko nzabavana mu gihugu cya Misiri nkabajyana mu gihugu nabahitiyemo, igihugu gitemba amata n'ubuki, kikaba na cyiza kuruta ibindi byose.

⁷Nuko ndababwira nti 'Buri muntu nazibukire ibiterashozi bibashuka, mureke kwiyanduza n'ibigirwamana byo mu Misiri ; ndi Uhoraho Imana yanyu.'

⁸Nyamara bambereye ibirara banga kunyumva, ntihagira n'umwe uzibukira ibiterashozi byabashukaga ; ntibareka n'ibigirwamana byo mu Misiri. Ni bwo ntekereje kubavunduriraho uburakari bwanjye, ngo mbubamarireho rwagati mu gihugu cya Misiri.

⁹Ariko nagiriye izina ryanjye, nkora uko nshoboye ngo ritandavurizwa imbere y'abanyamahanga bari batuyemo, ari na bo bandebaga igihe mbimenyesheje, mbavana mu gihugu cya Misiri.

¹⁰Hanyuma nabavanye mu gihugu cya Misiri mbajyana mu butayu,

¹¹mbaha amategeko yanjye kandi mbamenyesha amabwiriza yanjye, ari byo bagombaga gukurikiza ngo babone kubaho.

¹²Nageze aho mbaha sabato zanjye ngo zibabere ikimenyetso cyanjye muri bo, kugira ngo bamenye ko ari jye, Uhoraho ubatagatifuza.

¹³Nyamara aho mu butayu, Abayisraheli baranga bambera ibirara, ntibakurikiza amategeko yanjye, birengagiza amabwiriza yanjye kandi ari byo bagombaga gukurikiza ngo babone kubaho ; bandavuza na sabato zanjye. Ni bwo ntekereje kubavunduriraho uburakari bwanjye, ngo mbarimburire aho mu butayu.

¹⁴Ariko nagiriye izina ryanjye, nkora uko nshoboye ngo ritandavurizwa mu maso y'amahanga nari narabavanyemo.

¹⁵Byongeye kandi, nabaramburiyeho ikiganza aho mu butayu, mbarahira ko ntazabajyana mu gihugu nari narabahaye, igihugu gitemba amata n'ubuki kikaba na cyiza kuruta ibindi byose,

¹⁶kuko bari barirengagije amabwiriza yanjye, ntibakurikize amategeko yanjye kandi bakandavuza sabato zanjye, n'umutima wabo ukikurikirira ibigirwamana.

¹⁷Ariko jye nabarebanye impuhwe, sinashaka kubatsemba ngo mbatsinde muri ubwo butayu.

¹⁸Nuko abana babo bari mu butayu ndababwira nti 'Muramenye ntimuzitware nk'abakurambere banyu cyangwa se ngo mugenze nka bo, ntimukiyandavuze n'ibigirwamana byabo ;

¹⁹ndi Uhoraho Imana yanyu. Nimukore ibihuje n'amategeko yanjye, mwubahirize amabwiriza yanjye kandi muyakurikize.

²⁰Nimutagatifuze sabato zanjye, zibabere ikimenyetso cyanjye muri mwe, kugira ngo bamenye ko ndi Uhoraho Imana yanyu.'

²¹Nyamara n'abana babo bambereye ibirara, ntibakora ibihuje n'amategeko yanjye, ntibakurikiza amabwiriza yanjye, ari byo bagombaga gukurikiza ngo babone kubaho, bandavuza na sabato zanjye. Ni bwo ntekereje kubavunduriraho uburakari bwanjye, ngo mbubamarireho aho mu butayu.

²²Ariko nisubiyeho ngirira izina ryanjye, nkora uko nshoboye ngo ritandavurizwa mu maso y'amahanga nari narabavanyemo.

²³Nuko ndongera mbaramburiraho ikiganza cyanjye aho mu butayu, mbarahira ko ngiye kubatatanyiriza mu mahanga, nkabakwiza imishwaro mu bihugu bya kure,

²⁴kuko batakurikije amabwiriza yanjye, bakirengagiza amategeko yanjye, bakandavuza sabato zanjye kandi bakihambira ku bigirwamana by'abakurambere babo.

²⁵Ndetse nageze n'aho mbaha amategeko y'amananiza[66] n'amabwiriza atashoboraga kubabeshaho,

²⁶mbandurisha amaturo yabo, igihe banturaga abana babo b'uburiza ho ibitambo, ari ukugira ngo bakangarane maze bamenye ko ndi Uhoraho.»

²⁷Kubera iyo mpamvu rero, mwana w'umuntu, ubwire umuryango wa Israheli uti «Dore uko Nyagasani Uhoraho avuze : Abakurambere banyu barantutse bikabije bakomeza kumpemukira.

²⁸Nyamara kandi nabazanye mu gihugu narahiye ku mugaragaro ko nzakibaha ; bahabona imisozi miremire y'amoko yose, ibiti bitoshye by'amoko yose, bahaturira ibitambo byabo banahatangira amaturo yabo andakaza ; bahashyira imibavu yabo ihumura neza kandi bahaturira n'ibitambo biseswa.

²⁹Ni ko kubabaza nti 'Aho hantu hirengeye mujya ni hantu nyabaki ?' Nuko aho hantu bahita 'Boma[67]' kugeza na n'ubu.

³⁰None rero, bwira umuryango wa Israheli uti 'Dore uko Nyagasani Uhoraho avuze : Mbese ye, musanga ari byiza, igihe mwiyanduza mugenza nk'abakurambere banyu, mwohoka mu buraya bw'ibigirwamana byabo,

³¹mutanga amaturo yanyu kandi mutwika abana banyu ? Ni iki gituma mukomeza kwiyanduza n'ibyo bigirwamana byose kugeza na n'ubu ? Hanyuma se, muryango wa Israheli, jyewe nzemera ko mumpanuza ? Mbarahiye ubugingo bwanjye, uwo ni Nyagasani Uhoraho ubivuze, nta bwo nzemera ko mumpanuza.

³²Naho ibyo mwibwira mu mutima wanyu, igihe muvuga muti 'Tuzamera nk'abanyamahanga cyangwa se imiryango yo mu bindi bihugu, dusenge ibiti n'amabuye', ibyo ntibiteze kubaho.

³³Mbarahiye ubugingo bwanjye, uwo ni Nyagasani Uhoraho ubivuze, ni jyewe uzababera umwami, nkoresheje ikiganza cyanjye cy'impangare n'ukuboko kwanjye kurambuye, ari na ko mbavunduriraho n'uburakari bwanjye.

³⁴Nzabavana rwagati mu yindi miryango, mbakoranye mbavanye mu bihugu by'amahanga mwatataniyemo, mbikoresheje ikiganza cyanjye cy'impangare n'ukuboko kwanjye kurambuye ; ari na ko mbavunduriraho uburakari bwanjye,

³⁵mbajyane mu butayu bw'amahanga, abe ari ho mbacira urubanza duhanganye amaso.

³⁶Urwo naciriye abakurambere banyu mu butayu bwo mu gihugu cya Misiri, uwo ni Nyagasani Uhoraho ubivuze, ni rwo nzabacira namwe.

³⁷Nzabategeka kuba ubushyo bwanjye no kumvira Isezerano ryanjye ;

³⁸nzabatandukanya n'ab'ibirara bangomeye, mbakure mu gihugu batuyemo, ariko ntibazinjira mu gihugu cya Israheli ; maze muzamenye ko ndi Uhoraho.

³⁹Namwe rero, muryango wa Israheli, dore uko Nyagasani Uhoraho avuze : Ngaho buri muntu nagende akureho ibigirwamana bye, ahasigaye mbarahiye ko muzanyumva, ntimuzongere ukundi kwandavuza izina ryanjye ritagatifu, muryandurisha ibitambo n'ibigirwamana byanyu !

⁴⁰Koko rero, umuryango wa Israheli wose uko wakabaye, uko bangana mu gihugu, uwo ni Nyagasani Uhoraho ubivuze, bazankorera bari ku musozi mutagatifu, ku musozi muremure wa Israheli ; ni ho inzu ya Israheli yose izaba ituye mu gihugu izankorera. Aho ni ho nzongera kubakira kandi nkemera n'ibitambo byanyu, iby'ingenzi mu maturo yanyu n'ibintu mushaka kunyegurira byose.

⁴¹Nzabakira nk'umubavu uhumura neza igihe nzabavana rwagati mu mahanga, nzabakoranya mbavanye mu bihugu mwatataniyemo, maze muzagaragaze ubutagatifu bwanjye mu maso y'abanyamahanga.

⁴²Muzamenya ko ndi Uhoraho, igihe nzaba nabagaruye ku butaka bwa Israheli, igihugu narahiriye ku mugaragaro kuzagiha abakurambere banyu.

⁴³Aho muzahibukira imyifatire yanyu n'ibikorwa byanyu byatumye mwiyanduza, maze bibatere namwe ubwanyu kwizinukwa kubera ibyo bibi byose mwakoze.

⁴⁴Ni bwo rero muzamenya ko ndi Uhoraho, nimara kubagenzereza ntyo ngiriye izina ryanjye, ntitaye ku myifatire mibi yanyu, muryango wa Israheli, n'ibikorwa byanyu byahumanye. Uwo ni Nyagasani Uhoraho ubivuze.»