Read kinyarwanda Ezekiyeli 21 Bible Online

Ezekiyeli 21 - kinyarwanda bible

Ezekiyeli 21

¹Uhoraho ambwira iri jambo, ati

²«Mwana w’umuntu, hindukira urebe mu majyepfo maze ubwire ijambo ryawe abo mu majyepfo, uhanurire ishyamba ryo mu karere k’amajyepfo[68].

³Uzabwire ishyamba ryo mu karere k’amajyepfo uti ’Dore uko Nyagasani Uhoraho avuze: Ngiye kugucanamo umuriro, uzatwike ibiti byose, ibibisi n’ibyumye. Uzaba ari inkongi idateze kuzima, uzatwika abantu bose kuva mu majyepfo kugera mu majyaruguru.

⁴Buri kinyamubiri cyose kizamenya ko ari jyewe Uhoraho wawucanye, kandi ntuteze no kuzima.’»

⁵Nuko ndavuga nti «Ni ko se, Nyagasani Uhoraho, dore baramvugiraho bagira bati ’Mbese aho uriya si gacamigani.’»

⁶Uhoraho ni ko kumbwira ati

⁷«Mwana w’umuntu, hindukirira Yeruzalemu, uvume Ingoro ntagatifu kandi uhanurire igihugu cya Israheli ibicyerekeyeho.

⁸Uzabwire igihugu cya Israheli uti ’Dore uko Uhoraho avuze: Ndakwibasiye, ngiye gukura inkota yanjye mu rwubati maze ngutsembeho intungane kimwe n’umunyabyaha[69].

⁹Igitumye ngiye gukura inkota yanjye mu rwubati, ni ukugira ngo ngutsembeho intungane kimwe n’umunyabyaha, nibasire icyitwa ikinyamubiri cyose kuva mu majyepfo kugera mu majyaruguru.

¹⁰Nuko ikinyamubiri cyose kizamenye ko jyewe, Uhoraho, nkuye inkota yanjye mu rwubati, ikaba itazongera gusubiramo ukundi!

¹¹Naho rero wowe, mwana w’umuntu, tangira uganye, unihe kandi ushavure, uganyire mu maso yabo.

¹²Nibakubaza bati ’Ni kuki uganya?’ uzababwire uti ’Ni ukubera inkuru mbi y’ibigiye kuba numvise: Imitima yose izahahamuka n’ibiganza birabirane, imbaraga zizashire kandi amavi acike intege. Dore ngibi biraje, kandi birabaye. Uwo ni Nyagasani Uhoraho ubivuze.’»

¹³Uhoraho ambwira iri jambo, ati

¹⁴«Mwana w’umuntu, ngaho hanura. Uzavuge uti ’Nyagasani Uhoraho avuze atya: Mbega inkota we! Mbega inkota ityaye kandi irabagirana!

¹⁵Yatyarijwe kwica, none irarabagirana kandi igatera ibishashi.

¹⁶Yahawe kurabagirana ngo ibone gukoreshwa, iratyazwa ku buryo irabagirana, kugira ngo ihabwe umwicanyi.

¹⁷Taka kandi uboroge, mwana w’umuntu, kuko inkota irimbura umuryango wanjye, n’ibikomangoma byose bya Israheli. Nuko rero ngaho ikomange ku gituza,

¹⁸kuko ari ibigeragezo. Uwo ni Nyagasani Uhoraho ubivuze.’

¹⁹Naho rero wowe, mwana w’umuntu, hanura ukomanye n’ibiganza ugira uti ’Inkota iri bukubite incuro ebyiri ndetse n’eshatu! Ni inkota isogota abantu benshi; ya nkota ndende ibahinguranya!

²⁰Ibyo bibereyeho kugira ngo ucike intege, n’ibikugusha birusheho kuba byinshi. Dore kuri buri muryango mpashyize inkota, inkota yacuriwe gutera ibishashi, igatyarizwa kwica.

²¹Nigaragaze ko ityaye amugi yombi, ndetse yerekere no mu mpande zose.’

²²Nanjye ubwanjye ngiye gukomanya ibiganza, ngiye kukumariraho uburakari bwanjye. Ni jye Uhoraho ubivuze.»

²³[70] Uhoraho ambwira iri jambo, ati

²⁴«Naho rero wowe, mwana w’umuntu, shushanya inzira ebyiri zashobora kunyurwamo n’inkota y’umwami w’i Babiloni; izo nzira zombi kandi zive mu gihugu kimwe. Hanyuma aho izo nzira zitangiriye, uhashyire icyapa cyerekana aho zigana.

²⁵Imwe muri zo izayobora inkota ije igana Raba y’Abahamoni, indi iyobore inkota ije igana mu kigo gikomeye cy’i Yeruzalemu muri Yuda.

²⁶Koko rero, umwami w’i Babiloni ahagaze mu mayirabiri, aho inzira zombi zitangiriye, kugira ngo akoreshe ubufindo. Ariho aramisha imyambi hirya no hino, abaza abaterafimu[71], akitegereza n’inyama y’umwijima.

²⁷Ubufindo bwo mu kiganza cy’iburyo bwaguye kuri Yeruzalemu, kugira ngo hatangwe itegeko ryo kwica, banashinge imashini z’intambara. Bazakoma akamo k’intambara, amarembo bayegereze imashini zo kuyasenya, baharunde imigina y’ibitaka kandi bahakikize imikingo impande zose.

²⁸Nyamara abantu b’i Yeruzalemu bo babona ko ibyo nta cyo biteze kubatwara, kuko bari biringiye indahiro barahiwe; ariko umwami w’i Babiloni azabibutse ubuhemu bwabo maze bafatwe.

²⁹Ni cyo gitumye Nyagasani Uhoraho avuga ati ’Kubera ko mukomeza kunyibutsa ibyaha byanyu mumpemukira ku mugaragaro, mukagaragaza amafuti yanyu mu byo mukora byose, muzajyanwa bunyago kuko mutabinyibagije.’

³⁰Naho wowe rero, mwami wa Israheli, uri umugome w’imburamumaro; igihe cyawe kirageze n’ubugome bwawe burarangiye.

³¹Dore Nyagasani Uhoraho aravuze ati ’Bazakwambura umutamirizo wo mu mutwe wawe, bakunyage ikamba maze byose bihinduke ukundi: ibyari biciye bugufi bizashyirwe ejuru, n’ibyari ejuru bicishwe bugufi.

³²Uzahinduka amatongo, bagusenye usigare uri itongo! Yeruzalemu we, nguko uko nzakugenzereza mbere y’uko nyir’uguca urubanza aza maze nkarumwegurira.’»

³³[72] Naho wowe rero, mwana w’umuntu, hanurira Abahomoni bagenzwa no gutukana, uti «Nyagasani Uhoraho aravuze ati ’Dore inkota iraje! Inkota yakuwe mu rwubati, yabanguriwe kwica, irarabagirana ngo itsembe kandi itere ibishashi!

³⁴Mu gihe mwebwe mucyibeshya ngo murabonekerwa, mugihanuza abanyabinyoma, iyo nkota yiteguye gusogota abagome n’imburamumaro kuko igihe cyabo kigeze n’ubugome bwabo bukaba burangiye.

³⁵Ngaho, nimusubize inkota zanyu mu rwubati, kuko nzabacira urubanza mugeze mu gihugu mukomokamo, aho mwaremewe.

³⁶Nzakumariraho umujinya wanjye, nkurahurireho umuriro w’uburakari bwanjye maze nkugabize ibiganza by’abanyarugomo, ba kabuhariwe mu kurimbura.

³⁷Muzatwika n’umuriro, amaraso yanyu azatembe rwagati mu gihugu, nta na kimwe muzasigazaho urwibutso, kuko jyewe, Uhoraho, ari ko mvuze!»