Read kinyarwanda Ezekiyeli 23 Bible Online

Ezekiyeli 23 - kinyarwanda bible

Ezekiyeli 23

²«Mwana w’umuntu, kera habayeho abagore babiri bavaga inda imwe.

³Kuva mu bukumi bwabo, bombi bajya kuba indaya mu gihugu cya Misiri, abantu bakabakirigita, ari na ko bakorakora ku mabere yabo atigeze yonsa.

⁴Dore amazina y’abo bakobwa: uw’uburiza yitwaga Ohola[75], naho murumuna we akitwa Oholiba; nuko bombi baba abanjye bambyarira abahungu n’abakobwa. Dore rero icyo amazina yabo asobanura: Ohola ni we Samariya, Oholiba akaba Yeruzalemu.

⁵Nuko Ohola aba indaya aho kuba uwanjye, yishakira abakunzi mu Banyashuru,

⁶bakaba abasirikare bambaye imyambaro y’imihemba, abategetsi n’abanyacyubahiro, bose bakaba abasore bafite igikundiro, bakagendera ku mafarasi.

⁷Nuko arabiyegurira bose uko bari ingenzi mu Banyashuru, yagera ku bo yakunze bose akiyandurisha ibigirwamana byabo byose.

⁸Ariko ntiyigera areka uburaya bwe yari yaratangiriye mu Misiri igihe aryamanye n’abantu baho kuva mu bukumi bwe bagakorakora ku mabere ye atigeze yonsa kandi bakamuraruza ibiterashozi byabo.

⁹Ni cyo cyatumye mwegurira ibiganza by’abakunzi be b’Abanyashuru yari yarihebeye,

¹⁰ari na bo bamwambitse ubusa, bagafata abahungu be n’abakobwa be; na we ubwe bakamwicisha inkota. Nuko aba ikirangirire atyo mu bagore bose, kuko yari yaciriwe urumukwiye.

¹¹Murumuna we Oholiba yarabyiboneye; nyamara kubera irari rikabije, uburaya bwe na we bwaje kuba bubi cyane kurusha ubwa mukuru we.

¹²Yiyeguriye Abanyashuru, bari abategetsi n’abanyacyubahiro, abasirikare bambaraga imyambaro y’akataraboneka bakagendera ku mafarasi, bakaba kandi bose abasore b’igikundiro.

¹³Nuko mbona ko na we yiyanduje, m’imyifatire yabo bombi ibaye imwe.

¹⁴Oholiba ndetse yarushijeho gukabya mu buraya bwe igihe abonye ibishushanyo by’abagabo b’Abakalideya byari bishushanyije mu ibara ritukura ku rukuta,

¹⁵bakenyeje imikandara, bafite ibitambaro mu mutwe kandi bameze bose nk’abarwanyi b’intwari. Byari ibishushanyo by’Abakalideya bakomokaga muri Kalideya.

¹⁶Nuko ababonye arabiyegurira, anabatumaho intumwa muri Kalideya.

¹⁷Abo Banyababiloni baramusanga baryamana na we ku buriri bw’ubugeni, barabuhindanya n’uburaya bwabo, ngo bamare kumwanduza arabazinukwa.

¹⁸Ariko yihambira ku buraya bwe akomeza kwiyambika ubusa; maze nanjye ndamuzinukwa nk’uko nabigenjeje kuri mukuru we.

¹⁹Yakomeje kugwiza uburaya bwe, yibuka igihe cy’ubukumi bwe ubwo yari indaya mu gihugu cya Misiri,

²⁰kuko ari ho yatangiriye kurarikira abakunzi be bagurumanaga, irari bakaringanya n’indogobe n’amafarasi.

²¹Wishakiraga imyifatire nk’iyo mu bukumi bwawe, igihe wari mu Misiri, ubwo bagukorakoraga ku mabere, bakagukabakaba no mu gituza.

²²Ni yo mpamvu, wowe Oholiba — uwo ni Nyagasani Uhoraho ubivuze — ngiye kuguteza abakunzi bawe wazinutswe, mbagukoranyirizeho baturutse impande zose:

²³Abanyababiloni n’Abakalideya bose, ab’i Pekodi, ab’i Showa n’ab’i Kowa, hamwe n’Abanyashuru bose, ba basore b’igikundiro, abatware n’abanyacyubahiro, abarwanyi b’ibyamamare n’abagendera ku mafarasi.

²⁴Bazagutera baguturutse mu majyaruguru ari ingabo zitagira ingano, bafite amagare n’intwaro nyinshi, bakugote impande zose bikingiye ingabo n’ingofero z’ibyuma. Nzabegurira urubanza rwawe, bazaruce bakurikije amategeko yabo.

²⁵Nzabakugabiza mbitewe n’ishyari ngufitiye, bakurakarire, baguce izuru n’amatwi, n’abawe barokotse batsembeshwe inkota. Bazakunyaga abahungu n’abakobwa, abacitse ku icumu batwikwe n’umuriro.

²⁶Bazakwambura imyambaro, bakunyage n’imitamirizo yawe.

²⁷Nzasoza ntyo imyifatire yawe mibi n’uburaya watangiriye mu Misiri, ntuzongera kubireba ukundi kandi na Misiri ntuzigera uyibuka.

²⁸Koko rero, Nyagasani Uhoraho avuze atya: Dore nkugabije ibiganza by’abo wanze n’abo wazinutswe.

²⁹Bazakwanga urunuka, bakunyage n’ibyo waruhiye byose, bagusige amara masa; maze ikimwaro cy’uburaya bwawe, ubusambanyi bwawe n’imyifatire yawe mibi, kigaragare.

³⁰Bazakugenza batyo kuko wigize indaya y’abanyamahanga, ukiyanduza n’ibigirwamana byabo.

³¹Wiganye imyifatire ya mukuru wawe, ni cyo gituma ngiye gushyira igikombe[76] cye mu biganza byawe.

³²Dore uko Nyagasani Imana avuze: ‘Uzanywa ku gikombe cya mukuru wawe, igikombe kinini kandi cyagutse, kizatuma baguseka, banakunnyege, kubera ko kizaba gisendereye cyane,

³³kizagutera ubusinzi n’umubabaro. Koko, ni igikombe giteye ubwoba kandi cy’ububabare, ari na cyo cya mukuru wawe Samariya !

³⁴Uzakinywa, unakiranguze, hanyuma ukijanjaguze amenyo yawe, ibyo bijaju ubyishwanyurishe agatuza, kuko ari Nyagasani Imana ubivuze.’

³⁵Ni yo mpamvu Nyagasani Imana avuze kandi ati «Kubera ko wanyibagiwe, ukananyirengagiza, ngaho nawe ikorere umutwaro w’ububi n’uburaya bwawe.»

³⁶Nuko Uhoraho arambwira ati «Mwana w’umuntu, urashaka se gucira urubanza Ohola na Oholiba, no kubashinja amahano bakoze?

³⁷Dore babaye indaya, ibiganza byabo bimena amaraso, basambana n’ibigirwamana byabo; naho abana bari barambyariye babatwikisha umuriro, barakongoka.

³⁸Byongeye kandi, uwo munsi bahindanyije Ingoro yanjye, bandavuza n’amasabato yanjye.

³⁹Bakimara kwica abana babo bakabatambira ibigirwamana byabo, bahise bajya guhindanya Ingoro yanjye. Ngibyo ibyo bakoreye mu Ngoro yanjye bwite.

⁴⁰Si n’ibyo byonyine kandi, mwahamagaje abantu baturutse kure, mubatumyeho intumwa maze baraza[77]. Ngo mubabone baje muriyuhagira, mwisiga mu maso, mushyiramo imitamirizo yanyu,

⁴¹mwicara ku buriri bw’icyubahiro maze imbere yabwo bahashyira ameza, muyaterekaho ububani bwanjye n’amavuta yanjye.

⁴²Iwabo humvikanaga urusaku rw’imbaga nyamwinshi y’abantu batagize icyo bitayeho; bari benshi cyane bakabamo n’abantu b’abasinzi baturutse mu butayu, bambitse abo bagore bombi ibitare ku maboko n’ikamba ritagira uko risa ku mutwe wabo.

⁴³Nuko ndibwira nti ’Bariya bagore basaziye mu busambanyi, baracyasambana na bo,

⁴⁴bagakomeza kuza iwabo nk’abajya ku ndaya!’ Nguko uko bajya kwa Ohola na Oholiba, abo bagore bandavuye!

⁴⁵Nyamara ariko, abantu b’intungane bazabacira urubanza rukwiye abagore b’indaya n’abamena amaraso; kuko na bo ari indaya n’ibiganza byabo bikaba byarahindanyijwe n’amaraso.’»

⁴⁶Nuko Nyagasani Uhoraho aravuga ati «Nibahamagaze igitero cy’abantu benshi, babahahamure umutima kandi babasahure;

⁴⁷babatere amabuye kandi babicishe inkota, bice abahungu babo n’abakobwa babo, amazu yabo bayatwike.

⁴⁸Nzavana mu gihugu ububi bwacyokamye, nzaburire abagore bose bareke kuzongera gukurikiza imyifatire mibi yanyu.

⁴⁹Bazabaryoza ubugiranabi bwanyu, mwikorere umutwaro w’ibyaha mwakoranye n’ibigirwamana byanyu, bityo muzamenye ko ndi Nyagasani Imana.»