Read kinyarwanda Ezekiyeli 24 Bible Online

Ezekiyeli 24 - kinyarwanda bible

Ezekiyeli 24

¹[78] Nuko mu mwaka wa cyenda, ku munsi wa cumi w’ukwezi kwa cumi, Uhoraho ambwira iri jambo, ati

²«Mwana w’umuntu, andika itariki y’uyu munsi, kuko uyu munsi nyine umwami w’i Babiloni yateye Yeruzalemu.

³Cira uyu mugani iyo nyoko y’ibirara, ubabwire uti «Nyagasani aravuze ngo: Shyira inkono ku ziko[79], numara kuyishyiraho, uyisukemo amazi.

⁴Uyishyiremo intongo z’inyama, intongo zose z’akaguru n’iz’akaboko, wuzuzemo n’amagufa meza yose,

⁵uvanye ku itungo ryiza ryo mu bushyo bwawe. Hanyuma ushyire inkwi nyinshi mu ziko, ubicanire cyane bihinduke ikinyiga, ku buryo n’amagufa arimo yose, ari bushye agahwana.

⁶Ni koko, Nyagasani Uhoraho aravuze ati ’Uriyimbire, wa mugi we umena amaraso, wowe umeze nk’inkono yatoye ingese[80], n’izo ngese zikaba zitagishoboye kuyivaho! Aruramo inyama imwe imwe hatagombye ubufindo,

⁷kuko amaraso yawo wamennye awurimo rwagati, wayashyize ku rutare rw’umwiyanike, ntiwayasesa ku butaka ngo nibura uyazimanganye n’umukungugu.

⁸None kugira ngo uburakari bwanjye bwihembere nihorere, nashyize amaraso yawe ku rutare rw’umwiyanike, sinagira icyo nyatwikiriza.’

⁹Ni cyo gitumye Nyagasani Uhoraho avuze ati ‘Uriyimbire, wa mugi we umena amaraso! Dore ngiye kurunda ikirundo kinini cy’inkwi.

¹⁰Ngaho rero egeranya inkwi maze ucane umuriro, uteke inyama, utegure n’ibiziryoshya, n’amagufa yose ashye ahwane.

¹¹Tereka inkono irimo ubusa ku makara maze icamuke, kugira ngo umuringa ushye n’umwanda uyirimo ushonge, maze ingese zishye zikongoke.’

¹²Nyamara ariko, ingese zingana zityo ntizizakurwaho n’umuriro.

¹³Ubwandure bwawe ubuterwa n’ibibi ukora, kuko nashatse kuguhumanura ariko ukaba warabyanze. Ntuteze rero guhumanurwa kugeza ko nkumariraho uburakari bwanjye.

¹⁴Jyewe Uhoraho nabivuze kandi nzabikora, ndetse nzabikora ubutisubiraho, sinzakugirira impuhwe cyangwa ngo nkubabarire, uzacirwa urubanza hakurikijwe imyifatire yawe n’ibikorwa byawe. Uwo ni Nyagasani Uhoraho ubivuze.»

¹⁵[81] Uhoraho ambwira iri jambo, ati

¹⁶«Mwana w’umuntu, dore ngiye kukugwa gitumo nkwambure uwashimishaga amaso yawe, ariko rero ntuzaboroge, ntuzarire cyangwa ngo usuke amarira.

¹⁷Uzaganye bucece, ntuzajye mu cyunamo nk’uwapfushije; ahubwo uzatamirize igitambaro cyawe mu mutwe, wambare inkweto zawe mu birenge; ntuzipfuke ubwanwa kandi ntuzarye umugati uzaniwe n’abaturanyi.»

¹⁸Nabwiraga rubanda mu gitondo, nuko nimugoroba umugore wanjye arapfa, maze bukeye bw’uwo munsi mbigenza uko nari nategetswe.

¹⁹Nuko rubanda barambaza bati «Mbese ntiwadusobanuriza icyo ibyo ukora bishaka kuvuga?»

²⁰Ndabasubiza nti «Uhoraho yantegetse kubwira umuryango wa Israheli, nti

²¹’Nyagasani Uhoraho aravuze ngo: Dore ngiye guhindanya Ingoro yanjye, yo yabateraga kwiratana imbaraga zanyu, ikaba ibyishimo by’amaso yanyu n’amizero y’imitima yanyu; maze abahungu banyu n’abakobwa banyu mwatereranye bazicishwe inkota.

²²Ubwo rero namwe muzigana Ezekiyeli: ntimuzipfuka ubwanwa, ntimuzarya umugati muhawe n’abaturanyi,

²³muzagumana ibitambaro byanyu mu mutwe n’inkweto zanyu mu birenge, ntimuzaboroga kandi ntimuzarira. Muzacika intege kubera ibicumuro byanyu, buri muntu aganye kubera ibyago bya mugenzi we.

²⁴Ezekiyeli azababera ikimenyetso, naho mwebwe muzakora nk’ibyo yakoze. Nuko igihe ibyo bizaba byabaye, muzamenye ko ndi Nyagasani Imana.’

²⁵Nawe rero, mwana w’umuntu, umunsi nzaba nabanyaze ibyabateraga imbaraga, imirimbo ibanezeza, ibishimisha amaso yabo, amizero y’imitima yabo, abahungu babo n’abakobwa babo,

²⁶uwo munsi nyine, uzacika ku icumu wese azakugeraho akuzaniye ayo makuru.

²⁷Uwo munsi kandi, umunwa wawe uzabumbuka kugira ngo wigishe uzaba yacitse ku icumu. Uzavuga kandi ntuzongera ukundi kuba ikiragi; uzababera ikimenyetso maze bazamenye ko ndi Uhoraho.»