Read kinyarwanda Ezekiyeli 26 Bible Online

Ezekiyeli 26 - kinyarwanda bible

Ezekiyeli 26

¹Nuko mu mwaka wa cumi n’umwe, ku munsi wa mbere w’ukwezi, Uhoraho ambwira iri jambo, ati

²«Mwana w’umuntu, kubera ko Tiri yishongoye kuri Yeruzalemu, ivuga ngo: Awa! Urangarukiye, wa mugi wari ihuriro ry’amahanga! kandi n’ubukire bwawo burayoyotse,

³ni cyo gitumye Nyagasani Uhoraho avuga ati ’Dore ngiye kukwibasira, wowe Tiri, ngiye kuguteza amahanga menshi, akwiroheho nk’uko inyanja ivubura imivumba yayo.

⁴Bazasenya inkike za Tiri, bahirike iminara yayo, nanjye nzakubure umukungugu wabyo, mpahindure urutare rw’umwiyanike.

⁵Izaba nk’imbuga banikaho inshundura rwagati mu nyanja — uwo ni Nyagasani Uhoraho ubivuze kandi arabihamya — izaba umunyago w’amahanga.

⁶Abakobwa bayo bari mu gasozi bazicishwa inkota, maze bazamenye ko ndi Uhoraho.’

⁷Koko Nyagasani Uhoraho aravuze ati ’Dore i Tiri mpohereje Nebukadinetsari, umwami wa Babiloni n’umwami w’abami, ahatere aturutse mu majyaruguru, afite amafarasi, amagare y’intambara, ingabo n’imbaga nyamwinshi y’abantu.

⁸Abakobwa bawe bari mu gasozi azabicisha inkota, azagukikiza imikingo miremire, akurundeho n’imigina y’ibitaka, akuzengurutseho n’urukuta rwo kwikingira.

⁹Inkike zawe azazisenyesha ingiga zikoze nk’ubuhiri, iminara yawe ayirimbuze intwaro ze.

¹⁰Amafarasi ye atagira ingano azagutumuriraho umukungugu ukurengeho, inkike zinyeganyezwe n’urusaku rw’amafarasi, n’urw’amagare yabo igihe bazaba binjira mu marembo, nk’uko biroha mu mugi baciyemo icyuho.

¹¹Amafarasi ye azangiza imihanda yawe n’ibinono byayo, abantu bawe azabicishe inkota, arimbure n’inkingi zawe zikomeye.

¹²Bazakunyaga ibyo wari utunze, basahure n’ibicuruzwa byawe, bazasenya inkike zawe, n’amazu yawe meza bayarimbagure, amabuye n’ibiti bikubatse babirohe mu mazi, ndetse n’ishingwe ryose.

¹³Nzazibya abaririmbaga basakuza, n’ijwi ry’inanga zawe ntirizongera kumvikana ukundi.

¹⁴Nzakugira urutare rw’umwiyanike, nguhindure imbuga banikaho inshundura, maze we kuzongera kubakwa bibaho. Uwo ni Uhoraho ubivuze kandi arabihamya!»

¹⁵Dore Nyagasani Uhoraho arabwira Tiri, ati «Aho ibirwa ntibizahinda umushyitsi, nibiramuka byumvise urusaku rw’ukurimbuka kwawe n’imiborogo y’inkomere zawe, n’amarorerwa y’ubwicanyi mu nkike zawe?

¹⁶Abami bose baturiye inyanja bazava ku ntebe zabo, bakuremo ibishura byabo, biyambure n’imyambaro yabo itatse. Bazatahwa n’ubwoba bicare hasi, batengurwe ubutitsa kandi bagwe mu kantu kubera ibikubayeho.

¹⁷Bazatera indirimbo y’amaganya bagira bati ’Dore ishyano re! Warimbutse wiroha mu nyanja, wa mugi w’icyamamare, nyamara wari igikomerezwa ku nyanja, wo n’abaturage bawo, ugakwiza iterabwoba mu bihugu byose.’

¹⁸Koko rero ibirwa birahinda umushyitsi ku munsi w’ukurimbuka kwawe, n’ibirwa byo mu nyanja bihagaritse umutima kubera itsiratsizwa ryawe.’

¹⁹Koko Nyagasani Uhoraho aravuze ati «Igihe nzaba nakurimbuye umeze nk’imigi itagituwe, nzaguteza imivumba n’amazi menshi bikurengeho,

²⁰nguhirikire mu rwobo uhasange abagiyeyo mbere, nzagutuza ikuzimu mu matongo ya kera, ubane n’abapfuye, kugira ngo utazagaruka ukongera gutura mu gihugu cy’abazima.

²¹Nzaguhindura ikintu giteye ubwoba kandi ntuzongera kubaho ukundi. Bazagushakashaka, ariko ntibazongera kukubona ukundi. Uwo ni Nyagasani Uhoraho ubivuze.»