Read kinyarwanda Ezekiyeli 27 Bible Online

Ezekiyeli 27 - kinyarwanda bible

Ezekiyeli 27

¹Uhoraho ambwira iri jambo, ati

²«Nawe rero, mwana w’umuntu, ririmbira Tiri indirimbo y’amaganya.

³Uzabwire Tiri uti ’Wowe wubatswe ku masangano y’inyanja, ukaba iguriro ry’amahanga n’ibirwa bitabarika, dore uko Nyagasani Uhoraho avuze: Tiri, wowe wirataga uvuga ngo «Meze nk’ubwato bw’akataraboneka!»

⁴Imipaka yawe yageraga mu nyanja rwagati; abubatsi bawe baragutatse ubwiza buhebuje.

⁵Impande zawe zose zubatswe n’imbaho zabajwe mu mizonobari y’i Seniri. Muri wowe hagati bahashinze inkingi ndende yatoranyijwe mu masederi yo muri Libani.

⁶Ingashya zawe zari zarabajwe mu mishishi y’i Bashani, naho abasare bawe bakicara ku ntebe zakozwe mu masederi yo mu birwa by’Abakitimu, ziriho imitako yabajwe mu mahembe y’inzovu.

⁷Imyenda ya hariri yo mu Misiri itatseho imirimbo ni yo wagize ibendera n’amahema yawe, ubishumika ku nkingi ngo bihuhwe n’umuyaga; naho ibicuruzwa byawe ukabitwikiriza ay’umuhemba n’umutuku wakuye mu birwa bya Elisha.

⁸Tiri we, abaturage b’i Sidoni n’i Arubadi barakugashyaga, maze abanyabwenge bawe bakakubera abasare.

⁹Abakuru b’i Gebali n’abanyabukorikori baho, babaga bari aho ngo bagusane aho wangiritse. Amato yose yo mu nyanja n’abasare bayo, babaga iwawe bazanywe n’ubucuruzi.

¹⁰Abo mu Buperisi, ab’i Ludi n’ab’i Puti bari abarwanyi b’intwari mu ngabo zawe, bagashyingura iwawe ingabo n’ingofero zabo z’ibyuma, byaguheshaga ishema.

¹¹Abantu b’i Arubadi bahoraga bakikije inkike zawe, Abanyagemadi bakarinda iminara yawe. Bamanikaga ingabo zabo ku nkike zawe, bityo bakarushaho kunoza ubwiza bwawe.

¹²Ab’i Tarishishi baguranye nawe ibyiza byinshi, baguha imitwaro ya feza, ibyuma, itini na porombi.

¹³Yabani, Tubali, na Mesheki mwarahahiranaga, bakuzaniraga abacakara n’ibintu byacuzwe mu muringa, bakabigurana ibicuruzwa byawe.

¹⁴Abantu b’i Betitogaruma baguhaga amafarasi y’intambara n’inyumbu,

¹⁵ab’i Dedani na bo mugahahirana; n’abo mu birwa bitabarika bari abaguzi bawe, bakakwishyura amahembe y’inzovu n’ibiti by’ubwoko.

¹⁶Abantu b’i Aramu na bo baguranaga nawe ibintu kubera ko wari utunze ibintu byinshi; bakaguha amabuye y’agaciro n’imyenda y’imihemba, ibintu bitatse amabara n’ubudodo bunoze, ibirezi n’inigi zibengerana.

¹⁷Yuda n’igihugu cya Israheli na bo mwarahahiranaga, bakakuzanira ingurane y’ingano z’i Miniti, uburo n’ubuki, amavuta n’imibavu.

¹⁸Ab’i Damasi baguranye ibintu nawe, kubera ko wari ukize, utunze ibintu by’amoko yose, bakuzaniraga divayi y’i Heliboni n’ubwoya bw’intama z’i Sahari.

¹⁹Abantu b’i Wedani n’ab’i Yabani, kuva Uzeli, baguhaga ibintu bicuzwe mu byuma n’ibiti by’imibavu;

²⁰ab’i Dedani bakakugurishaho imyenda isaswa ku mafarasi.

²¹Arabiya yose n’ibikomangoma byose by’i Kedari, na bo bari abaguzi bawe bakakwishyura abana b’intama, amapfizi y’intama n’amasekurume y’ihene.

²²Abacuruzi b’i Sheba n’ab’i Rama mwarahahiranaga, ibicuruzwa byawe bakabigurana imibavu ihumura neza, amabuye y’agaciro y’ubwoko bwose ndetse na zahabu.

²³Abantu b’i Harani, ab’i Kane n’ab’i Edeni, abacuruzi b’i Sheba, ab’i Ashuru n’ab’i Kilimadi, bose bahahiranaga nawe.

²⁴Bacuruzaga mu masoko yawe imyambaro y’igiciro, ibishura by’imihemba n’imitako myinshi, imyenda y’amabara menshi n’ibiziriko bikomeye.

²⁵Amato y’i Tarishishi yogogaga inyanja ajyanye ibicuruzwa bikugenewe, nawe ubwawe wari nk’ubwato mu nyanja rwagati, wuzuye ibicuruzwa kandi unaremerewe.

²⁶Abasare bawe bagushoye mu mazi magari, umuyaga w’iburasirazuba ugusandariza mu nyanja nyirizina.

²⁷Ubukire bwawe, ibicuruzwa byawe n’ibindi bintu wari wikoreye, abasare n’abatware bawe, abasannyi n’abacuruzi bawe, abasirikare n’abagenzi bose utwaye, bagiye kurokera mu nyanja ku munsi w’ukurohama kwawe!

²⁸Ubwo inkombe zihinde umushyitsi, zumvise induru y’abasare bawe.

²⁹Nuko abashinzwe kugashya bose bururuke mu mato yabo, mbese abasare bose bambukaga inyanja bigumire imusozi.

³⁰Dore baratera hejuru bakuririra, baraboroga cyane bababaye. Baritumurira umukungugu mu mutwe, maze bakigaragura mu ivu.

³¹Bariharanguza kubera wowe, bakenyere n’ibigunira, umubabaro wabo ubateye kukuririra, baraboroga bikabije.

³²Mu kababaro kabo n’agahinda bafite baracura imiborogo, bakakuririra bagira bati ’Ni nde wari ukwiriye kugereranywa na Tiri, iyo yabaga iri mu nyanja rwagati?’

³³Iyo wabaga womokanye ibicuruzwa byawe, wahazaga amahanga atagira ingano, ubukire bwawe bwinshi n’ibyo utunze, bigakungahaza abami b’isi.

³⁴None dore wajanjaguriwe n’imivumba mu mazi magari, imitwaro yawe n’abagenzi birohamana nawe.

³⁵Abatuye ibirwa bakutse umutima kubera ibikubayeho, abami babo batashywe n’ubwoba, barasuhererwa.

³⁶Abacuruzi b’amahanga baragukubitira akavugirizo, kuko wahindutse ikintu giteye ubwoba, kandi ukaba utazongera kubaho ukundi.»