Read kinyarwanda Ezekiyeli 28 Bible Online

Ezekiyeli 28 - kinyarwanda bible

Ezekiyeli 28

¹Uhoraho ambwira iri jambo, ati

²«Mwana w’umuntu, bwira icyo gikomangoma cy’i Tiri, uti ’Dore uko Nyagasani Uhoraho avuze: Kubera ko umutima wawe wirase, ukaba waravuze ngo: Ndi imana, nganje mu nyanja rwagati; nyamara kandi uri umuntu nturi Imana, n’ubwo wigereranya n’Imana bwose.

³Wigize umuhanga utambutse Daneli, dore ngo ko nta banga ujya uyoberwa.

⁴Kubera ubuhanga n’ubwenge ufite, wagwije umutungo, zahabu na feza ubihunika mu bubiko bwawe.

⁵Ubwenge bwawe n’ubucuruzi, byatumye wongera umutungo wawe, maze ubukire bwawe butera umutima wawe kwikuza!

⁶Ni yo mpamvu Nyagasani Uhoraho avuze ati ’Kuko wigereranyije n’Imana,

⁷ngiye kuguteza abanyamahanga b’ababisha kurusha abandi. Bazakura inkota barwanye ubwo buhanga bwawe, icyubahiro cyawe bagihindanye.

⁸Bazakuroha mu rwobo, maze upfire rubi mu nyanja nyirizina.’

⁹Uzongera se uvuge ngo: Ndi Imana, igihe abishi bawe bazaba bagusatiriye? Oya da! Nturi Imana, ahubwo uri umuntu, ndetse uri mu maboko y’abagusogota.

¹⁰Uzapfa urw’abatagenywe ugwe mu maboko y’abanyamahanga, kuko jyewe Uhoraho ari ko navuze.’»

¹¹Uhoraho ambwira iri jambo, ati

¹²«Mwana w’umuntu, ririmba indirimbo y’amaganya yerekeye umwami w’i Tiri. Uzamubwire uti ’Dore uko Nyagasani Uhoraho avuze: Wahoze uri intangarugero mu butungane, wuje ubuhanga, ukagira n’ubwiza buhebuje,

¹³ugatura muri Edeni, ubusitani bw’Imana. Wari wisesuyeho igishura gitatse amabuye y’agaciro: irya sarudoni, topazi, diyama, kirisolite, na onigisi, irya yasipi, safiri, malakita na emerodi; ingoma n’imyirongi byawe bitatswe na zahabu, ibyo byose byarateguwe umunsi w’iremwa ryawe.

¹⁴Wowe wari umukerubimu urambuye amababa, naragushyiriyeho kuba umurinzi. Wari ku musozi mutagatifu w’Imana, ukagenda rwagati mu makara agurumana.

¹⁵Imyifatire yawe iba intangarugero kuva ukiremwa, kugeza ubwo utahuwemo ubwo bugome.

¹⁶Kubera imihihibikano y’ubucuruzi bwawe, wigwijemo ubugome n’ibyaha; ni bwo nguhanantuye hejuru y’umusozi w’Imana, nkugira igicibwa, wowe, mukerubimu nari narashyiriyeho kuba umurinzi, nkwirukana rwagati mu makara agurumana.

¹⁷Ubwiza bwawe bwaguteye kwirata, ubwamamare bwawe bukuyobya ubwenge; ubwo mpera ko nkwesa hasi, ngutangaza imbere y’abami ngo bagushungere.

¹⁸Kubera ibyaha byawe byinshi n’ubucuruzi bwawe bwuje uburiganya, wandavuje amasengero yawe. Ni cyo cyatumye nguhemberamo umuriro, urashya urakongoka, nguhindura ivu ku isi mu maso y’abakurebaga bose.

¹⁹Amahanga yose yari akuzi yakutse umutima, kubera ko wahindutse ikintu giteye ubwoba, kandi ukaba utazongera kubaho ukundi!’»

²⁰Uhoraho ambwira iri jambo, ati

²¹«Mwana w’umuntu, hindukirira Sidoni maze uyihanurire ibiyerekeyeho.

²²Uzayibwire uti ’Dore uko Nyagasani Uhoraho avuze: Dore ngiye kukwibasira, wowe Sidoni, iwawe ni ho ngiye guherwa ikuzo. Bazamenya ko ndi Uhoraho, ubwo nzacira Sidoni uruyikwiye, nkayerekaniraho ubutungane bwanjye.

²³Nzayiteza icyorezo, amayira yayo atembemo amaraso. Abantu bazagwa mu mugi rwagati, bishwe n’inkota ziturutse impande zose, maze bamenyereho ko ndi Uhoraho.’

²⁴Umuryango wa Israheli ntuzongera kugira amahwa n’imifatangwe bihanda, biturutse mu bayikikije bayisuzugura; maze bazamenye ko ndi Uhoraho.

²⁵Dore uko Nyagasani Uhoraho avuze: Igihe nzakoranya umuryango wa Israheli mbavanye mu mahanga batataniyemo, nzagaragariza muri bo ubutungane bwanjye mu maso y’amahanga; bazature ku butaka nahaye Yakobo, umugaragu wanjye.

²⁶Bazahatura mu ituze, biyubakire amazu batere n’imizabibu, maze bibereho mu mutekano. Icyo gihe ababakikije bose banabasuzugura nzabacira urubakwiye, maze bamenyereho ko ndi Uhoraho, Imana yabo.»