Read kinyarwanda Ezekiyeli 33 Bible Online

Ezekiyeli 33 - kinyarwanda bible

Ezekiyeli 33

¹Uhoraho ambwira iri jambo, ati

²«Mwana w’umuntu, noneho abo mu muryango wawe, uzababwire utya: Iyo hari igihugu nteje inkota, abantu baho bafata umwe muri bo bakamushinga kureba ko hari uza,

³iyo abonye inkota ije iteye igihugu avuza ihembe kugira ngo aburire rubanda.

⁴Nihagira uwumva iryo hembe ariko ntaryiteho hanyuma inkota ikaza ikamwica, amaraso y’uwo muntu ni we ubwe azabarwaho.

⁵Yumvise ihembe rivuga ariko ntiyaryitaho; none amaraso ye azamubarwaho. Nyamara uwaryumvise akanaryitaho, uwo yakijije ubugingo bwe.

⁶Ariko niba ushinzwe kuburira rubanda yabonye inkota ije ntavuze ihembe, rubanda ntirubimenye, maze inkota ikahagera ikica umwe muri bo, uwo muntu azapfa azize ikosa ry’umurinzi, azabe ari we uryozwa amaraso ya mugenzi we.

⁷Nawe rero, mwana w’umuntu, nagushyiriyeho kuburira umuryango wa Israheli. Igihe uzaba wumvise ijambo rivuye mu kanwa kanjye, ujye ubaburira mu kigwi cyanjye.

⁸Ndamutse mbwiye umugome nti ’Wa mugome we, ugiye gupfa’, naho wowe ntumuburire ngo ahindure imyifatire ye, uwo mugome azapfa azize ikosa rye, kandi ni wowe nzaryoza amaraso ye.

⁹Ariko nuramuka umuburiye, ntazibukire imyifatire ye mibi ngo ahinduke, uwo mugome azapfa azize icyaha cye, naho wowe uzaba ukijije ubugingo bwawe.»

¹⁰Nuko rero, mwana w’umuntu, ubwire umuryango wa Israheli, uti «Mukunda gusubira muri aya magambo ngo: Ibicumuro byacu biradushikamiye, bigatuma turimbuka; ubu se, twashobora kubaho dute[83]?’

¹¹Babwire ko mbirahiye ubugingo bwanjye — uwo ni Nyagasani Uhoraho ubivuzenta bwo njya nishimira urupfu rw’umugome, ahubwo nishimira ko yahinduka akazibukira imyifatire ye mibi, kugira ngo abone kubaho. Nimuhinduke rero muzibukire iyo nzira mbi yanyu! Ni kuki se mwarinda gupfa, muryango wa Israheli?»

¹²Nuko rero, mwana w’umuntu, ubwire abo mu muryango wawe, uti «Uko ubutungane bw’intungane butazayikiza ku munsi yacumuye, ni ko n’ubugiranabi bw’umugome butazamwicisha, umunsi azaba yahindutse akazibukira ubugiranabi bwe. Intungane ntizongera kubeshwaho n’ubutungane bwayo ku munsi izaba yacumuye.

¹³Ndamutse mbwiye intungane nti ‘Uzabaho’, ariko we kubera kwiringira ubwo butungane bwe agakora ikibi, ubwo butungane bwe ntibuzongera kwibukwa ukundi, ahubwo azapfa azize ikibi icyo ari cyo cyose azaba yakoze.

¹⁴Ariko nimbwira umugome nti ‘Uzapfa’, maze akazibukira ibyaha bye kandi agakurikiza amategeko n’ubutungane,

¹⁵agasubiza icyo yahaweho ingwate, akagarura icyo yibye, agakurikiza amategeko atanga ubugingo ntasubire gukora ikibi ukundi, azabaho ntateze gupfa.

¹⁶Nta cyaha mu byo yakoze kizibukwa, ahubwo azabaho kuko yakurikije amategeko n’ubutabera.

¹⁷Abo mu muryango wawe baravuga bati ’Imigenzereze ya Nyagasani ntitunganye.’ Nyamara, imigenzereze yanyu ni yo idatunganye.

¹⁸Umuntu w’intungane ateshwa ubutungane bwe agakora ikibi, agapfa kubera ibyo.

¹⁹Umugome na we nazibukira ubugiranabi bwe, agakurikiza amategeko n’ubutungane, ibyo bizatuma abaho.

²⁰Naho mwebwe muravuga ngo ‘Imigenzereze ya Nyagasani ntitunganye!’ Muryango wa Israheli, nzacira buri muntu urubanza nkurikije imyifatire ye!»

²¹Mu mwaka wa cumi n’umwe, ku munsi wa gatanu w’ukwezi kwa cumi tujyanywe bunyago, umuntu wacitse ku icumu aza ansanga aturutse i Yeruzalemu, maze arambwira ngo «Umugi warafashwe.»

²²Ku mugoroba wabanzirizaga umunsi uwo muntu yajeho, ikiganza cy’Uhoraho kikaba kiranshikamiye, nuko mu gitondo mbere y’uko wa wundi angeraho, Uhoraho ambumbura umunwa, maze umunwa wanjye urabumbuka sinongera kuba ikiragi ukundi[84].

²³Nuko Uhoraho ambwira iri jambo, ati

²⁴«Mwana w’umuntu, abatuye ku butaka bwa Israheli, abari muri ayo matongo, baravuga bati ’Abrahamu yari wenyine igihe agabiwe iki gihugu; none turi benshi, ni twebwe twagihaweho umurage[85].’

²⁵Babwire rero uti ‘Dore uko Nyagasani Uhoraho avuze: Muraryana inyama n’amaraso yazo, murubura amaso mukitegereza ibigirwamana byanyu, mukamena amaraso, none ngo muzatunga iki gihugu?

²⁶Mwishingikiriza inkota zanyu, mugakora amahano, buri wese akagundira umugore wa mugenzi we, none ngo muzatunga iki gihugu?

²⁷Bawire ibi ngibi: Nyagasani Uhoraho aravuze ati ’Mbirahiye ubugingo bwanjye, abo bakiri mu matongo bazicishwa inkota, uri mu gasozi nzamugabize inyamaswa zimutanyaguze, naho abari mu bihanamanga no mu buvumo bazatsembwe n’ibyorezo.

²⁸Igihugu nzagihindura ubutayu, maze ubwo bwirasi muterwa n’imbaraga mufite burangirire aho. Imisozi ya Israheli izayogozwa kandi nta n’uzongera kuhanyura ukundi.

²⁹Bityo bazamenye ko ndi Uhoraho, igihe nzahindura igihugu ubutayu ku mpamvu y’amahano yose bakoze.’

³⁰None rero, mwana w’umuntu, dore abo mu muryango wawe aho bahagaze iruhande rw’inkike no ku miryango y’amazu, bariho baraganira ibyawe. Umwe arabwira undi, buri muntu akabwira mugenzi we ati ’Nimuze twumve ijambo riturutse kuri Uhoraho.’

³¹Nuko bakagusanga ari imbaga, umuryango wanjye ukicara imbere yawe, bagatega amatwi amagambo yawe, ariko ntibayakurikize. Ibyo bashyize imbere ni ibinyoma biri mu kanwa kabo, n’umutima wabo ukihambira ku rwunguko ruturutse ku buriganya.

³²Batega amatwi amagambo yawe nk’aho wabaye umuririmbyi wagoroye ijwi ucuranga indirimbo z’urukundo; naho kuyakurikiza ibyo ntibabiranganwa.

³³Nyamara, igihe ibyo bizaba byageze — kandi dore biraje — ni bwo bazamenya ko muri bo higeze kuba umuhanuzi.»