Read kinyarwanda Ezekiyeli 44 Bible Online

Ezekiyeli 44 - kinyarwanda bible

Ezekiyeli 44

¹Nuko wa muntu aranzana no ku irembo ryo hanze ry’Ingoro, rya rindi ryari riteganye n’iburasirazuba, ubwo kandi rikaba rikinze.

²Uhoraho arambwira ati «Iri rembo rizahora rikinze. Ntibazarikingura kandi nta n’uzaryinjiriramo, kuko Uhoraho, Imana ya Israheli, yaryinjiriyemo. Rero, rizahore rikinze.

³Nyamara ariko, umwami we azahicara kugira ngo afungurire imbere y’Uhoraho, kubera ko ari umwami nyine. Azinjirira mu kirongozi cy’iryo rembo, kandi abe ari na ho asohokera.»

⁴Wa muntu aranzana no ku irembo ryo mu majyaruguru angeza imbere y’Ingoro, ngo ndebe mbona ikuzo ry’Uhoraho ryari ryuzuye mu Ngoro ye, nuko ngwa hasi nubamye.

⁵Uhoraho arambwira ati «Mwana w’umuntu, itonde witegereze neza kandi utege amatwi ibyo ngiye kugusobanurira byerekeye amabwiriza ajyana n’Ingoro kimwe n’amategeko yose ayigenga. Uritondere kumenya abafite uburenganzira bwo kwinjira mu Ngoro, kimwe n’ababujijwe kuyinjiramo.

⁶Uzabwire ibyo birara by’umuryango wa Israheli, uti ’Dore uko Nyagasani Uhoraho avuze. Narambiwe amahano yanyu, muryango wa Israheli;

⁷ya mahano mwakoze mwinjiza abanyamahanga batagenywe ku mutima no ku mubiri mu Ngoro yanjye, bakayijyamo kandi bakayandavuza, mugasangira na bo ikinure n’amaraso byanyeguriwe, mukica mutyo Isezerano ryanjye kubera ayo mahano vose!

⁸Aho kwita ku mirimo y’imihango yanjye mitagatifu, mwishyiriyeho abanyamahanga ngo babe ari bo bayikorera mu Ngoro yanjye.

⁹None rero, dore uko Nyagasani Uhoraho avuze: Nta munyamahanga utagenywe ku mutima no ku mubiri uzinjira mu Ngoro yanjye, habe no mu banyamahanga batuye rwagati mu Bayisraheli.

¹⁰Abalevi banyitaruye igihe Israheli yari yarayobye igakurikira ibigirwamana byayo, bazagarukwa n’ibyaha byabo.

¹¹Bazaguma mu Ngoro yanjye, ariko babe abagaragu bashinzwe kurinda amarembo kandi bakore n’imirimo yo mu Ngoro. Ni bo bazajya basogota ibitambo bitwikwa n’ibindi bitambo by’imbaga, kandi banashingwe gukorera rubanda.

¹²Kubera ko bakoreye imbaga imbere y’ibigirwamana, ibyo bigatuma babera umuryango wa Israheli impamvu yo gucumura — uwo ni Nyagasani Uhoraho ubivuze — ni cyo gitumye mbaramburiraho ukuboko kwanjye, maze bazagarukwe n’ibyaha byabo.

¹³Ntibazongera kunyegera ukundi ngo baratunganya umurimo w’ubuherezabitambo, ntibazakora ku bintu byanjye bitagatifu habe no ku bitagatifu rwose; ahubwo bazakorwa n’ikimwaro kubera ayo mahano bakoze.

¹⁴Nzabashinga kwita ku mirimo yo mu Ngoro, mbese ibihakorerwa byose n’ibihakenewe byose.

¹⁵Naho abaherezabitambo b’Abalevi, ari bo bene Sadoki, batahemutse ku murimo wabo mu Ngoro yanjye igihe Abayisraheli bari barayobye, ni bo bazanyegera bankorere — uwo ni Nyagasani Uhoraho ubivuze — bahagarare imbere yanjye banture ibinure n’amaraso.

¹⁶Ni bo bazinjira mu Ngoro yanjye, begere ameza yanjye kugira ngo bampereze; bazarangize batyo umurimo wanjye.

¹⁷Igihe bazaba binjiye mu marembo y’igikari cy’imbere, bazaba bambaye imyambaro y’ihariri. Ntibazambara umwambaro w’ubwoya bw’intama, igihe cyose bazaba bakora umurimo wabo ku marembo y’igikari cy’imbere kimwe no mu Ngoro.

¹⁸Bazambara ibitambaro by’ihariri mu mutwe, bambare amakabutura y’amahariri, kandi birinde gukenyera umwenda wabatera gututubikana.

¹⁹Nibasohoka bagana mu gikari cyo hanze basanze imbaga, baziyambure imyambaro bari bambaye bari ku murimo wabo bayibike ahabigenewe mu byumba bitagatifu, maze bambare indi kugira ngo imbaga itava aho ikora kuri iyo myambaro mitagatifu.

²⁰Ntibaziharanguze, ariko kandi ntibazanatereke umusatsi, ahubwo bajye bawukemuza, bawutunganye.

²¹Nta muherezabitambo wemerewe kunywa divayi ku munsi azaba ari bwinjire mu gikari cy’imbere.

²²Ntibazacyura umupfakazi cyangwa umugore wasenzwe n’umugabo we, ahubwo bazarongore umwari ukomoka mu muryango wa Israheli, cyangwa se bacyure umupfakazi usizwe n’undi muherezabitambo.

²³Bazigisha umuryango wanjye gutandukanya icyeguriwe Imana n’ikitarayeguriwe; babamenyeshe itandukanyirizo ry’ikitahumanye n’icyahumanye.

²⁴Ni bo bazajya baca imanza za rubanda, kandi bazazice bakurikije itegeko ryanjye. Mu minsi mikuru yanjye yose bazakurikiza amategeko yanjye n’amabwiriza yanjye, batagatifuze amasabato yanjye.

²⁵Bazirinde kwegera intumbi y’umuntu ngo batava aho bihumanya; ariko nihagira upfusha se cyangwa nyina, cyangwa se agapfusha umwana we, murumuna we, mushiki we, ariko atarashaka, ashobora kwihumanya akegera intumbi ye.

²⁶Igihe umwe muri bo azaba amaze kwihumanura, bazabara iminsi irindwi;

²⁷hanyuma ku munsi wo kwinjira mu cyumba gitagatifu no mu gikari cy’imbere kugira ngo arangize umurimo we — uwo ni Nyagasani Uhoraho ubivuze — aziturire igitambo cy’impongano y’ibyaha.

²⁸Ntibazagira umunani, kuko ari jye munani wabo. Nta mugabane muzabaha muri Israheli, kuko ari jyewe mugabane wabo.

²⁹Bazatungwa n’amaturo, ibitambo by’impongano y’ibyaha n’ibitambo byo kwigorora; mbese icyashinganywe n’Imana cyose muri Israheli kizaba icyabo.

³⁰Ibyiza byo mu miganura yanyu yose no mu maturo yanyu yose bizahabwa abaherezabitambo; ndetse n’imyiza mu mitsima y’umuganura wanyu, kugira ngo ingo zanyu zihabwe umugisha.

³¹Abaherezabitambo ntibazarya inyama z’itungo na rimwe ryipfushije cyangwa ryatanyaguwe n’irindi, ryaba iriguruka cyangwa se indi nyamaswa iyo ari yo yose.