Read kinyarwanda Ezekiyeli 46 Bible Online

Ezekiyeli 46 - kinyarwanda bible

Ezekiyeli 46

¹Nyagasani Uhoraho aravuze ati «Irembo ry’igikari cy’imbere ryerekera mu burasirazuba, rizahora rifunze mu minsi itandatu y’akazi, ariko ku isabato kimwe no ku minsi y’imboneko y’ukwezi rifungurwe.

²Umwami azajya yinjirira mu kirongozi cy’irembo ryo hanze, ahagarare iruhande rw’inkomanizo z’umuryango; hanyuma abaherezabitambo bature mu kigwi cye igitambo gitwikwa n’igitambo cy’ubuhoro. Umwami azapfukama mu irebe ry’umuryango hanyuma asohoke, ariko irembo ntirizafungwa kugeza nimugoroba.

³Imbaga ituye igihugu na yo izapfukamira Uhoraho imbere y’iryo rembo, ijye ibikora kuri buri sabato no ku minsi y’imboneko y’ukwezi.

⁴Kuri sabato, umwami azatura Uhoraho abana b’intama batandatu n’impfizi imwe y’intama, byose bitagira inenge,

⁵agerekeho n’akebo kamwe k’ifu kuri iyo mpfizi y’intama, naho ku bana b’intama ature uko ashaka; azature n’urweso rumwe rw’amavuta kuri buri ntango.

⁶Ku minsi y’imboneko hazaturwa akamasa, abana b’intama batandatu n’impfizi y’intama byose bitagira inenge.

⁷Na none kuri uwo munsi, umwami azatura akebo kamwe k’ifu ku kimasa n’akandi kebo ku mpfizi y’intama, naho ku bana b’intama ature uko ashaka; ature n’akabindi kamwe k’amavuta kuri buri ntango.

⁸Umwami naramuka yinjiye, azinjirire mu kirongozi cy’irembo, kandi abe ari na ho asohokera.

⁹Igihe abatuye igihugu bazaba baje mu makoraniro imbere y’Uhoraho, abinjiriye mu irembo ryo mu majyaruguru baje gusenga, bazasohokera mu ryo mu majyepfo; naho abinjiriye mu irembo ryo mu majyepfo basohokere mu ryo mu majyaruguru. Ntihazagire usubiza mu irembo yinjiriyemo; ahubwo ajye akomeza imbere ye.

¹⁰Umwami azajyana na bo, yinjire nk’uko binjiye kandi asohoke nka bo.

¹¹Ku minsi y’ibirori n’amakoraniro, ituro rizaba akebo kamwe k’ifu ku kimasa n’akandi kamwe ku mpfizi y’intama, naho ku bana b’intama azature uko ashaka; ature n’urweso rumwe rw’amavuta kuri buri ntango.

¹²Igihe umwami azaba yishakiye gutura Uhoraho igitambo gitwikwa cyangwa igitambo cy’ubuhoro, bazamukingurire irembo ryerekera mu burasirazuba, maze ature ibitambo bye nk’uko asanzwe abigenza ku isabato, narangiza asohoke bahite bakinga.

¹³Buri munsi azatura Uhoraho intama y’umwaka umwe kandi itagira inenge, ayitureho igitambo gitwikwa; azajya agitura buri gitondo.

¹⁴Byongeye kandi, azatura buri gitondo kimwe cya gatandatu cy’akebo k’ifu na kimwe cya gatatu cy’urweso rw’amavuta yo kuvangisha ifu. Iryo ni ryo turo ry’Uhoraho, rikaba n’itegeko ridakuka kandi rihoraho.

¹⁵Bazatura umwana w’intama, hamwe na ya maturo y’ifu n’amavuta, bibe igitambo gihoraho cya buri gitondo.»

¹⁶Nyagasani Uhoraho aravuze ati «Niba umwami agiriye ubuntu umwe mu bahungu be, akamuha ku mugabane we, icyo amuhaye kizaba icy’abahungu be, kibe umurage wabo.

¹⁷Nyamara niba ubwo buntu abugiriye umwe mu bagaragu be akamuha ku mugabane we, icyo ahawe kizakomeza kuba icye kugeza mu mwaka ababariwemo, hanyuma gisubizwe umwami. Abahungu b’umwami bonyine ni bo bazagumana icyo bahawe ho umurage.

¹⁸Umwami ntazagire ikintu na kimwe afata ku mugabane wa rubanda, ngo abambure ibiri ibyabo; ibyo atunze ni byo azahaho umurage abahungu be, kugira ngo hatazagira n’umwe mu muryango wanjye uva aho anyagwa ibye.»

¹⁹Hanyuma wa muntu anyuza mu cyanzu cyari iruhande rw’irembo, anzana ku byumba bitagatifu biri mu majyaruguru, byagenewe abaherezabitambo; nuko ngo ndebe hirya aherekera mu burengerazuba, mbona ahantu hasigaye umwanya utagira ikiwurimo.

²⁰Arambwira ati «Hariya, abaherezabitambo ni ho bazajya batekera ibitambo bihongerera ibyaha, ibitambo bindi n’amaturo, kugira ngo batabijyana mu gikari cyo hanze, imbaga ikava aho ikora kuri ayo maturo matagatifu.»

²¹Hanyuma anjyana mu gikari cyo hanze, anyuza mu mfuruka uko ari enye z’igikari,

²²hakaba ingombe enye ntoya zifite uburebure bw’imikono mirongo ine kuri mirongo itatu y’ubugari, kandi zose uko ari enye zikagira ingero zimwe.

²³Izo ngombe uko ari enye zari zikikijwe n’inkike, mu nsi yayo hubatse amaziko impande zose. Wa muntu arambwira ati «Ayo ni amaziko, abagaragu bakora mu Ngoro bazajya batekaho ibitambo by’imbaga.»