Read kinyarwanda Ezekiyeli 48 Bible Online

Ezekiyeli 48 - kinyarwanda bible

Ezekiyeli 48

¹Dore amazina y’imiryango ya Israheli (n’imigabane yayo): uhereye mu majyaruguru, mu cyerekezo cy’i Hetiloni ugana i Hamati n’i Hasarenani, naho igihugu cya Damasi ukagisiga mu majyaruguru, ugakikira Hamati kuva ku rubibi rw’iburasirazuba ukageza ku urw’iburengerazuba: uwo ni umugabane wa Dani.

²Kuva ku rugabano rwa Dani, uhereye ku rubibi rw’iburasirazuba ukageza ku urw’iburengerazuba: ni umugabane wa Asheri.

³Kuva ku rugabano rwa Asheri, uhereye ku rubibi rw’iburasirazuba ukageza ku urw’iburengerazuba: ni umugabane wa Nefutali.

⁴Kuva ku rugabano rwa Nefutali, uhereye ku rubibi rw’iburasirazuba ukageza ku urw’iburengerazuba: ni umugabane wa Manase.

⁵Kuva ku rugabano rwa Manase, uhereye ku rubibi rw’iburasirazuba ukageza ku urw’iburengerazuba: ni umugabane wa Efurayimu.

⁶Kuva ku rugabano rwa Efurayimu, uhereye ku rubibi rw’iburasirazuba ukageza ku urw’iburengerazuba: ni umugabane wa Rubeni.

⁷Kuva ku rugabano rwa Rubeni, uhereye ku rubibi rw’iburasirazuba ukageza ku urw’iburengerazuba: ni umugabane wa Yuda.

⁸Naho kuva ku rubibi rwa Yuda, uhereye ku rubibi rw’iburasirazuba ukageza ku urw’iburengerazuba, muzahasige umugabane w’imikono ibihumbi makumyabiri na bitanu by’ubugari, ufite kandi n’uburebure nk’ubwa buri mugabane: ni ukuvuga uburebure buhereye ku rubibi rw’iburasirazuba bukageza ku urw’iburengerazuba; Ingoro ikazaba rwagati muri uwo mugabane.

⁹Umugabane muzasigira Uhoraho, uzagira uburebure bw’imikono ibihumbi makumyabiri na bitanu, ku bihumbi cumi by’ubugari.

¹⁰Abaherezabitambo ni bo bene uwo mugabane mutagatifu, ukazagira mu majyaruguru imikono ibihumbi makumyabiri na bitanu by’uburebure, no mu burengerazuba ubugari bw’imikono ibihumbi cumi; iburasirazuba uzagira ubugari bw’imikono ibihumbi cumi, naho mu majyepfo imikono ibihumbi makumyabiri na bitanu by’uburebure: Ingoro y’Uhoraho ikazaba rwagati muri uwo mugabane.

¹¹Uzaba uw’abaherezabitambo banyeguriwe, ari bo bene Sadoki bakomeye ku murimo wanjye, bakirinda kugwa mu buyobe bw’Abayisraheli, mbese nk’uko abalevi babyirinze.

¹²Abo rero bazahabwa umunani ku mugabane mutagatifu rwose w’igihugu, hafi y’igihugu cy’abalevi.

¹³Abalevi na bo bazagira umugabane ungana n’uw’abaherezabitambo, ufite uburebure bw’imikono ibihumbi makumyabiri na bitanu, ku mikono ibihumbi cumi by’ubugari; uburebure bwose hamwe bube imikono ibihumbi makumyabiri na bitanu, ku bugari bw’imikono ibihumbi cumi.

¹⁴Nta cyo bazashobora kugurishaho cyangwa ngo kiguranwe, kandi n’ibyeze muri ubwo butaka ntibizagire undi bihabwa, kuko bweguriwe Uhoraho.

¹⁵Naho imikono ibihumbi bitanu bisigaye by’ubugari, ku mikono ibihumbi makumyabiri na bitanu by’uburebure, bizaba indeka y’umugi, ibibanza byo guturamo n’inzuri z’amatungo; umugi ukazaba rwagati muri uwo mugabane.

¹⁶Dore rero ingero z’umugi: ku ruhande rw’amajyaruguru, uzagira imikono ibihumbi bine na magana atanu, no ku urw’amajyepfo ugire imikono ibihumbi bine na magana atanu. Ku ruhande rw’iburasirazuba uzagira imikono ibihumbi bine na magana atanu, no ku urw’iburengerazuba ugire imikono ibihumbi bine na magana atanu.

¹⁷Urwuri rw’umugi ruzagira imikono magana abiri na mirongo itanu ugana mu majyaruguru, ku mikono magana abiri na mirongo itanu ugana mu majyepfo; rugire n’imikono magana abiri na mirongo itanu ugana mu burasirazuba, ku mikono magana abiri na mirongo itanu ugana mu burengerazuba.

¹⁸Ku mukika w’umugabane weguriwe Imana, hazasaguka ahantu h’uburebure bw’imikono ibihumbi cumi ugana mu majyaruguru, ku mikono ibihumbi cumi ugana mu burasirazuba, hakazajya hava ibitunga abakozi b’umugi.

¹⁹Abakozi bo mu mugi bazahahinga, bazava mu miryango yose ya Israheli.

²⁰Umugabane wose rero uzagira imikono ibihumbi makumyabiri na bitanu ku bihumbi makumyabiri na bitanu, mukazafata igice cy’impande enye zingana kuri uwo mugabane mutagatifu, kikazaba icy’umugi.

²¹Ahasigaye hirya no hino h’umugabane mutagatifu n’indeka y’umugi hazaba ah’umwami; aho ni ku mukika w’imikono ibihumbi makumyabiri na bitanu by’iburasirazuba, kugeza ku rugabano rw’iburengerazuba, no ku mukika w’imikono ibihumbi makumyabiri na bitanu by’iburengerazuba, kugeza ku rugabano rw’iburengerazuba. Umwami rero azagira umugabane we iruhande rw’iyindi, maze muri yo rwagati hazabe umugabane weguriwe Imana n’ahagenewe Ingoro.

²²Bityo rero, umugabane w’abalevi n’indeka y’umugi bizaba rwagati y’ahagenewe umwami, no hagati y’igihugu cya Yuda n’icya Benyamini.

²³Ku yindi miryango isigaye; uhereye ku rubibi rw’iburasirazuba ukageza ku urw’iburengerazuba: ni umugabane wa Benyamini.

²⁴Kuva ku rugabano rwa Benyamini, uhereye ku rubibi rw’iburasirazuba ukageza ku urw’iburengerazuba: ni umugabane wa Simewoni.

²⁵Kuva ku rugabano rwa Simewoni, uhereye ku rubibi rw’iburasirazuba ukageza ku rw’iburengerazuba: ni umugabane wa Isakari.

²⁶Kuva ku rugabano rwa Isakari, uhereye ku rubibi rw’iburasirazuba ukageza ku urw’iburengerazuba: ni umugabane wa Zabuloni.

²⁷Kuva ku rugabano rwa Zabuloni, uhereye ku rubibi rw’iburasirazuba ukageza ku urw’iburengerazuba: ni umugabane wa Gadi.

²⁸Naho kuva ku rugabano rwa Gadi, ku ruhande rw’amajyepfo, urubibi ruzahere i Tamari no ku mazi ya Meriba y’i Kadeshi, rukomeze umugezi wose kugera ku nyanja Nini.

²⁹Ngicyo igihugu muzagabanya imiryango ya Israheli mukoresheje ubufindo, ikazaba ari yo migabane yabo. Uwo ni Nyagasani Uhoraho ubivuze.

³⁰Dore rero n’amarembo y’umugi: uruhande rw’amajyaruguru y’umugi ruzagira imikono ibihumbi bine na magana atanu, hakazajya amarembo atatu.

³¹Amarembo y’umugi azitirirwa amazina y’imiryango ya Israheli; mu majyaruguru hakazajya irembo rya Rubeni, irya Yuda n’irya Levi.

³²Uruhande rw’iburasirazuba na rwo ruzagira imikono ibihumbi bine na magana atanu, n’amarembo atatu: irya Yozefu, irya Benyamini n’irya Dani.

³³Uruhande rw’amajyepfo ruzagira imikono ibihumbi bine na magana atanu, n’amarembo atatu: irya Simewoni, irya Isakari n’irya Zabuloni.

³⁴Uruhande rw’iburengerazuba na rwo ruzagira imikono ibihumbi bine na magana atanu, n’amarembo atatu: irya Gadi, n’irya Asheri n’irya Nefutali.

³⁵Umuzenguruko wose w’umugi ukazagira imikono ibihumbi cumi n’umunani. Kuva uwo munsi kandi, umugi ukazitwa ’Uhoraho arahibereye.’»