Read kinyarwanda Ezekiyeli 6 Bible Online

Ezekiyeli 6 - kinyarwanda bible

Ezekiyeli 6

¹[21] Uhoraho ambwira iri jambo, ati

²«Mwana w’umuntu, hindukira urebe imisozi ya Israheli maze uhanure ibiyerekeyeho.

³Uzavuge uti ’Misozi ya Israheli, nimutege amatwi ijambo rya Nyagasani Uhoraho. Dore uko Nyagasani Uhoraho abwira imisozi n’utununga, imikokwe n’ibibaya: Ngiye kubagabiza inkota, ndimbure ahantu hanyu hatagatifu.

⁴Intambiro zanyu z’ibitambo zizasandazwa, n’iz’imibavu zimenagurwe; nzabatsinda imbere y’ibigirwamana byanyu;

⁵intumbi z’Abayisraheli nzishyire imbere y’ibigirwamana byabo, kandi nyanyagize amagufa yabo impande zose z’intambiro zanyu.

⁶Imigi mutuyemo izahinduka amatongo n’ahantu hanyu hatagatifu hasenywe; bityo intambiro zanyu zizasenywe kandi zirimburwe, ibigirwamana byanyu bisandazwe kandi binyanyagire, intambiro z’imibavu zizamenagurwe maze ibikorwa byanyu bihinduke ubusa.

⁷Nzararika abazaba bashegeshwe rwagati muri mwe, maze muzamenyereho ko ndi Uhoraho.

⁸Ariko rero, nzasigaza bamwe[22] muri mwe bazaba bacitse ku icumu bakazatatanira mu mahanga;

⁹maze bazanyibukire mu mahanga aho bazaba ari imbohe, kuko nzaba namenaguye umutima wabo wararutse ukanyanga, n’amaso yabo yohotse inyuma y’ibigirwamana byabo. Bazizinukwa na bo ubwabo kubera ibibi byose bakoze n’ayo mahano yabo.

¹⁰Bityo nimbateza ayo makuba, bazamenye ko ndi Uhoraho kuko ibyo navuze bitabaye imfabusa.’»

¹¹Dore uko Nyagasani Uhoraho avuze: «Koma mu mashyi, udihe n’ikirenge hasi maze utere hejuru uti ’Karabaye!’ Israheli igiye kwicishwa inkota, inzara n’ibyorezo kubera amahano yose yakoze.

¹²Abari kure bazicwa n’ibyorezo, naho abari bugufi bazatsembwe n’inkota. Abazaba baracitse ku icumu bazamarwa n’inzara, kuko nzabarangirizaho umujinya wanjye.

¹³Muzamenyeraho ko ndi Uhoraho, igihe abazaba bashegeshwe bazaba barambaraye mu bigirwamana byabo n’iruhande rw’intambiro zabo, ku tununga duhanitse no mu mpinga z’imisozi yose, mu nsi ya buri giti gitoshye no mu nsi ya buri mushishi ubyibushye, n’aho baturiraga imibavu yo kurura ibigirwamana byabo byose.

¹⁴Nzabacyamuriraho ikiganza cyanjye, igihugu cyabo kimwe n’aho batuye hose, hahinduke ahantu hadatuwe kuva ku butayu kugera i Ribula[23], bityo bazamenye ko ndi Uhoraho.»