Read kinyarwanda Hozeya 12 Bible Online

Hozeya 12 - kinyarwanda bible

Hozeya 12

¹Efurayimu irantangatanga n’ibinyoma, inzu ya Israheli ikabigirisha uburiganya. (Ariko inzu ya Yuda yo iracyari kumwe n’Imana, ntihemukira Nyir’ubutagatifu.)

²Efurayimu itungwa n’umuyaga, buri munsi ikiruka inyuma y’umuyaga w’iburasirazuba, bityo ikagwiza ibinyoma n’urugomo: igirana amasezerano na Ashuru, ikagemura amavuta mu Misiri.

³Uhoraho afitanye urubanza na Israheli, agiye guhanira Yakobo[41] imyifatire ye, kandi amwiture ibihwanye n’ibikorwa bye.

⁴Yaryamiye umuvandimwe we bakiri mu nda ya nyina, amaze no gukura akiranya Imana.

⁵Yakiranye n’Umumalayika maze aramutsinda, ararira kandi aramwinginga. I Beteli ni ho yahuriye n’Imana, ari na ho yavuganiye na yo:

⁶«Uhoraho, Umugaba w’ingabo», ni ryo zina ryayo!

⁷Naho wowe, Yakobo, garukira Imana yawe, ukomere ku budahemuka n’ubutungane, kandi ujye uhora wiringiye Imana yawe.

⁸Abakanahani bafite iminzani y’ubuhendanyi mu ntoki, kuko bashimishwa n’ubwambuzi.

⁹Naho Efurayimu yo iravuga iti «Narikungahaje, mfite umutungo uhagije», nyamara kandi muri ibyo byose yungutse, nta na kimwe izasigarana, kuko yahemutse igakora ibibi.

¹⁰Nyamara ndi Uhoraho Imana yawe, kuva nkuvanye mu gihugu cya Misiri. Nzagutuza bundi bushya mu mahema nko ku minsi y’Ikoraniro[42].

¹¹Nzavugana n’abahanuzi, ngwize amabonekerwa, kandi mbabwirire mu migani, nifashishije abahanuzi.

¹²Niba Gilihadi yarahemutse, bo ubwabo bahindutse indyarya bikabije! I Giligali ntibahwema gutura ibimasa ho ibitambo, ni yo mpamvu intambiro zabo zizamera nk’udushyinga tw’amabuye, arundarunze ku mayogi mu mirima.

¹³Yakobo ahungiye mu bibaya bya Aramu, nuko Israheli[43] ahakirwa umugore, kugira ngo amubone aba umushumba w’amatungo.

¹⁴Ariko Uhoraho, yifashishije umuhanuzi, yavanye Israheli mu Misiri, kandi Israheli iragirwa n’umuhanuzi.

¹⁵Efurayimu yarakaje Uhoraho bikomeye: Umutegetsi wayo azayiryoza amaraso yamennye, ayigarureho n’imivumo yavumanye.