Read kinyarwanda Hozeya 5 Bible Online

Hozeya 5 - kinyarwanda bible

Hozeya 5

¹Baherezabitambo, nimwumve ibi ngibi, nimubitege amatwi namwe, ab’inzu ya Israheli, namwe abo ku rurembo rw’ibwami, mubyumve! Ni mwebwe mwashinzwe guca imanza, nyamara i Misipa[18] mwabereye inkomyi umuryango wanjye, munawubere umutego ku musozi wa Taboru.

²Bongereye urwobo rw’i Shitimu[19], barugira rurerure, none nanjye ngiye kubahana bose.

³Efurayimu ndayizi neza, na Israheli sinyiyobewe; kubera ko Efurayimu yoramye mu buraya, Israheli na yo yarandavuye.

⁴Ibikorwa byabo bibabuza kugarukira Imana yabo, kuko batwawe n’irari ry’uburaya, maze ntibamenye Uhoraho.

⁵Ubwibone bwa Israheli burayishinja, Israheli na Efurayimu baradandabirana kubera ibicumuro byabo, bityo na Yuda ikabatutuba inyuma.

⁶Bazajyana n’amatungo yabo magufi n’amaremare, bajye gushakashaka Uhoraho, ariko ntibazamubona kuko azaba yabazinutswe!

⁷Bahemukiye Uhoraho kuko babyaye ibinyendaro; none mu kwezi kumwe[20] bazarimbukana n’umunani wabo.

⁸[21]Nimuvugirize ihembe i Gibeya, i Rama havugire akarumbeti, muvugirize induru i Betaveni, muti «Benyamini we, ngaho baguturutse inyuma!»

⁹Umunsi wo guhanwa, Efurayimu izahinduka itongo, naho imiryango ya Israheli nyimenyeshe ibizayibaho.

¹⁰Abatware ba Yuda bameze nk’abimura imbibi z’igihugu, nzabacuburiraho imivumba y’uburakari bwanjye.

¹¹Efurayimu yashikamiwe izatsindwa n’urubanza, kuko yanyuzwe no kwiruka inyuma y’ibitagira shinge.

¹²Nanjye, Efurayimu nzayimerera nk’ibihushi, naho inzu ya Yuda nyimunge.

¹³Efurayimu yabonye uburwayi bwayo, na Yuda ibona igikomere cyayo; Efurayimu ni ko kwirukira muri Ashuru[22], kandi yohereza intumwa ku mwami mukuru. Nyamara na we ntazashobora kubavura, cyangwa ngo abomore igikomere cyanyu.

¹⁴Byongeye kandi, Efurayimu nzayimerera nk’intare, inzu ya Yuda nyimerere nk’icyana cy’intare; jye ubwanjye nzabatanyaguza maze nigendere, njyane umuhigo wanjye kandi nta we uteze kuwunyambura.

¹⁵Nzagenda nigumire iwanjye kugeza ko bazumva igicumuro cyabo, maze bagashakashaka uruhanga rwanjye; koko kandi igihe bazaba bari mu mubabaro, ni bwo bazanshakashaka.