Read kinyarwanda Hozeya 8 Bible Online

Hozeya 8 - kinyarwanda bible

Hozeya 8

¹Nimuvuze ihembe ! Icyago kiguye nka kagoma hejuru y’inzu y’Uhoraho[27], kuko bishe Isezerano ryanjye kandi bagahemuka ku mategeko yanjye.

²Barantakira, bagira bati «Mana yanjye, twebwe Abayisraheli turakuzi.»

³Nyamara Israheli yazibukiriye ibyiza, none umwanzi nayikurikirane.

⁴Biyimikiye abami batambajije, bishyiriraho n’abatware jyewe ntabizi. Bariremera ibigirwamana muri zahabu na feza yabo, bakikururira batyo kurimbuka.

⁵Samariya rero, ikimasa[28] cyawe ndagihigitse ! (Koko, uburakari bwanjye bwabagurumaniye : mbese bazanga gusukurwa kugeza ryari ?)

⁶Cyakomotse muri Israheli, gikozwe n’umunyabukorikori, kikaba rero atari Imana. Ni yo mpamvu ikimasa cyo muri Samariya kizahinduka ishingwe.

⁷Babibye umuyaga, bazasarura serwakira; bameze nk’ingano zitagira amahundo, ntizivemo n’ifu, n'aho kandi yabonekamo yaribwa n’abanyamahanga.

⁸[29]Israheli irayongobejwe, barasuzugurwa n’amahanga, mbese nk’abantu batagira agaciro,

⁹bitewe n’uko bazamutse bakajya muri Ashuru, ya ndogobe y’ishyamba yibera yonyine, Efurayimu ikagurira amacuti[30]!

¹⁰N’ubwo baha amaturo atagira ingano abanyamahanga, ngiye kubakoranya bidatinze, maze mu gihe gito bazashengurwe n’umutwaro umwami w’abami agiye kubagerekaho.

¹¹Efurayimu yagwije intambiro zo kuvanaho ibyaha, none dore zayibereye impamvu yo gucumura kurushaho.

¹²N'aho nayandikira ingingo igihumbi mu mategeko yanjye, babifata nk’aho ari ikintu cy’icyaduka!

¹³Bakunda kuntura ibitambo, no kurya inyama zabyo, nyamara jye Uhoraho, ntibinshimisha. Kuva ubu nzakomeza kwibuka amakosa yabo, mbaryoze ibyaha byabo, basubire mu Misiri.

¹⁴Israheli yirengagije Uwayiremye maze yiyubakira ingoro, naho Yuda igwiza imigi ikomeye; ariko nzohereza umuriro muri iyo migi yayo, n’ibigo byayo bikongoke.