Read kinyarwanda Amosi 3 Bible Online

Amosi 3 - kinyarwanda bible

Amosi 3

¹Nimwumve ijambo Uhoraho ababwiye, bana ba Israheli, mwe n’umuryango wose navanye mu gihugu cya Misiri.

²Ni mwebwe mwenyine namenye mu miryango yose yo ku isi; ni yo mpamvu nzabibaryoza mbaziza ibicumuro byanyu byose.

³Mwabonye abantu babiri bafatanya urugendo batabanje kubisezerana?

⁴Mbese hari ubwo intare itontoma mu ishyamba itabonye icyo ihiga? Icyana cy’intare se cyomonganya ijwi mu ndiri yacyo nta cyo cyafashe?

⁵Mbese inyoni igwa mu mutego nta cyo bayishukishije? Umutego se washibuka ari nta cyo ufashe?

⁶Ihembe se ryo, ryavugira mu mugi, abantu ntibaryamire amajanja? Hari ubwo se ibyago byatera mu mugi, atari Uhoraho ubiteye?

⁷Nyagasani Uhoraho rero nta cyo akora adahishuriye ibanga rye abagaragu be, abahanuzi.

⁸Intare itontomye, ni nde utatinya? Nyagasani Uhoraho avuze, ni nde utahanura[11]?

⁹Nimubyamamaze mu ngoro zo muri Ashuru, no mu ngoro zo mu gihugu cya Misiri, muvuge muti «Nimuteranire ku misozi ya Samariya, mwitegereze imvururu zihari n’ubutsikamirwe buhiganje.

¹⁰Ntibazi gukora ibitunganye, bashimishwa n’urugomo no gusahura.» Uwo ni Uhoraho ubivuze.

¹¹Ni yo mpamvu, Nyagasani Uhoraho avuze atya: Umwanzi azagota igihugu, ayogoze imbaraga zawe, n’ingoro zawe azisahure.

¹²Uhoraho avuze atya: Nk’uko umushumba[12] ashikanuza amaguru abiri cyangwa igice cy’ugutwi mu rwasaya rw’intare, ni ko Abayisraheli bazarokorwa, bo batengamaye i Samariya mu ntebe nziza no mu mariri anepa.

¹³Nimwumve kandi mushinje inzu ya Yakobo: — uwo ni Nyagasani Uhoraho ubivuze, Imana Umugaba w’ingabo —

¹⁴umunsi nzaziza Israheli ibicumuro byayo, nzasenya urutambiro rw’i Beteli, inguni zarwo zizasenywa maze zigwe hasi.

¹⁵Nzasenya inzu zoroheje n’izikomeye[13]; inzu ziharaze amahembe y’inzovu nzitsembe, n’ibizu bya rutura bizariduke. Uwo ni Uhoraho ubivuze.