Read kinyarwanda Obadiya 1 Bible Online

Obadiya 1 - kinyarwanda bible

Obadiya 1

¹Ibonekerwa rya Obadiya. Nyagasani Uhoraho avuze atya kuri Edomu[1]: Twumvise ubutumwa buturutse kuri Uhoraho, kandi n’intumwa yoherejwe mu mahanga kuyabwira iti «Nimuhaguruke dutere uwo muryango! Twese tujye ku rugamba!»

²Dore ngiye kugucisha bugufi rwagati mu mahanga, ngusuzuguze ndetse ibi bikabije!

³Ubwibone bwawe bwarakuyobeje, wowe wibera mu buvumo, ukanatura ahirengeye[2], wowe wibwira mu mutima wawe, uti «Ku isi ni nde wampangara?»

⁴N’aho waba watumbagiye mu kirere nka kagoma, ugashyira icyari cyawe rwagati mu nyenyeri, naguhananturayo! Uwo ni Uhoraho ubivuze.

⁵[3]Mbese abajura n’abasahuzi ba nijoro baje iwawe, wagumana amahoro? Ntibatwara se ibyo babashije byose? Ibisambo se nibigusarurira imizabibu, aho bizagusigira n’utwo uzahumba?

⁶Bene Ezawu mwe, mbega ukuntu mwasatswe! Mbega ukuntu bavumbuye ubukire bwanyu buhishe!

⁷Abanywanyi bawe baragushutse, bakumenesha mu gihugu cyawe! Incuti zawe ziraguhagurukiye! Abo mwasangiye umugati baguteze umutego, baravuga bati «Nta bwenge akigira!»

⁸Koko, kuri uwo munsi nyine — uwo ni Uhoraho ubivuze — nzatsemba abanyabuhanga bo muri Edomu, n’umusozi wa Ezawu sinzawusigira umunyabwenge n’umwe!

⁹Temani[4] nawe, intwari zawe zizashya ubwoba, ku buryo muri icyo cyorezo, icyitwa umuntu cyose kizatsembwa ku musozi wa Ezawu.

¹⁰[5]Urugomo n’ubwicanyi wagiriye umuvandimwe wawe Yakobo, ni byo bitumye uzakorwa n’ikimwaro, ukarimbuka ubuziraherezo!

¹¹Umunsi wari wiheje uhagaze ahitaruye, ubwo abanyamahanga bamusahuraga ibye ku ngufu, abanzi bakinjira mu marembo ye, bagafindira kuri Yeruzalemu, nawe wari umeze nk’umwe muri bo!

¹²Ntukanezezwe no kubona umuvandimwe wawe, umunsi yagwiririwe n’amakuba! Ntukishimire kuri bene Yuda, ku munsi w’irimbuka ryabo, kandi ntukabavuge nabi ku munsi w’akababaro!

¹³Ntukinjire mu marembo y’umugi w’umuryango wanjye, ku munsi w’amagorwa yawo! Ntukanezezwe nawe n’amakuba awugwiririye, ku munsi w’amagorwa yawo! Ntukawusahure ibyiza utunze, ku munsi w’amagorwa yawo!

¹⁴Ntugahagarare mu mayirabiri ngo ubone uko utsemba abawo bahunga! Ntugatange abawo bacitse ku icumu ku munsi w’akababaro!

¹⁵Ni koko, umunsi w’Uhoraho uregereje, umunsi wo kurimbura amahanga yose! Uko wagenjeje nawe ni ko uzagenzerezwa, ibikorwa byawe birakugaruke!

¹⁶Koko rero, nk’uko mwanywereye[6] ku musozi wanjye mutagatifu, ni ko n’amahanga yose azanywa ubudatuza; bazanywa bageze n’aho basinda, bamere nk’abatigeze kubaho!

¹⁷Nyamara abacitse ku icumu bazakoranira ku musozi wa Siyoni, wongere ube mutagatifu; na bene Yakobo basubirane ibyabo byanyazwe!

¹⁸Nuko bene Yakobo bazahinduke nk’umuriro, bene Yozefu babe nk’ikirimi cy’umuriro, naho bene Ezawu bazahinduke umurama! Iyo miriro yombi izabatwika maze bakongoke, ku buryo nta n’umwe uzacika ku icumu wo kwa Ezawu. Ng’uko uko Uhoraho avuze!

¹⁹Ab’i Negevu bazigarurira umusozi wa Ezawu; abo mu karere k’imirambi bigarurire igihugu cy’Abafilisiti, begurirwe n’intara ya Efurayimu n’iya Samariya; naho abo kwa Benyamini bigarurire igihugu cya Gilihadi.

²⁰Abajyanywe bunyago mu Bayisraheli bazaba baremye icyo gitero: bazanyaga igihugu cy’Abakanahani kugera i Sareputa, naho abajyanywe bunyago b’i Yeruzalemu bazature i Sefaradi, bigarurire n’imigi yo muri Negevu.

²¹Abazaba batsinze bazazamuka umusozi wa Siyoni, kugira ngo bacire urubanza umusozi wa Ezawu. Bityo Uhoraho azabe yimye ingoma!