Read kinyarwanda Yonasi 1 Bible Online

Yonasi 1 - kinyarwanda bible

Yonasi 1

¹Ijambo ry’Uhoraho ribwirwa Yonasi, mwene Amitayi, riti

²«Haguruka ujye i Ninivi[1], umugi mugari, maze uyimenyeshe ko ubukozi bw’ibibi bwabo bwangezeho!»

³Yonasi ashyira nzira, ariko agenda ahungira i Tarishishi[2] kure y’Uhoraho. Amanuka ajya i Yope ahasanga ubwato bwerekeje i Tarishishi, yishyura urugendo, arabwurira ngo ajyane na bo i Tarishishi kure y’Uhoraho.

⁴Nuko Uhoraho ateza inkubi y’umuyaga mu nyanja maze inyanja igira umuhengeri ukabije, ku buryo ubwato bwari bugiye gusandara.

⁵Abasare bashya ubwoba, buri wese atakambira imana ye. Ni bwo bajugunye imitwaro yose mu nyanja ngo borohereze ubwato. Ubwo Yonasi we yari yibereye mu bwato hasi, aryamye, yisinziriye[3].

⁶Umukuru w’abasare aramwegera, maze aramubwira ati «Ni kuki wisinziriye? Baduka utakire Imana yawe, ahari yo iratwibuka maze twoye kurimbuka.»

⁷Nuko barabwirana bati «Nimuze dukoreshe ubufindo, maze tumenye uwadukururiye iki cyago.» Bakora ubufindo, maze bufata Yonasi.

⁸Baramubwira bati «Ngaho tubwire ikikugenza! Uraturuka he? Iwanyu ni he? Mbese mu bwoko uri umuki?»

⁹Arabasubiza ati «Ndi Umuhebureyi, nkaba nemera Uhoraho, Imana y’ijuru, yo yaremye inyanja n’ubutaka.»

¹⁰Ba bantu bagira ubwoba bwinshi, maze baramubaza bati «Wacumuye iki rero?» Bari bazi ko ahunze Uhoraho kuko ubwe yari yabibatekerereje.

¹¹Baramubwira bati «Tukugenze dute kugira ngo inyanja itworohere?» Kuko inyanja yagendaga irushaho kwicunda.

¹²Arabasubiza ati «Nimunterure munjugunye mu nyanja, irahita iborohera kuko, ndabizi, ni jye watumye umuhengeri ukaze ubabuza uburyo.»

¹³Ba bantu baragashya bagira ngo bashyikire inkombe, biba iby’ubusa: inyanja yarushagaho kwicunda ibarwanya.

¹⁴Ni ko kwambaza Uhoraho, bavuga bati «Uhoraho, tubabarire, twoye gushira tuzira kurwana ku buzima bw’uyu muntu, utagize icyo adutwara, kandi amaraso ye ntadusame, kuko ari wowe, Uhoraho, wabyishakiye.»

¹⁵Nuko bajuguta Yonasi bamujugunya mu nyanja, na yo ihita icubya ubukana.

¹⁶Ba bantu bagirira Uhoraho igitinyiro cyinshi. Bamutura igitambo kandi bamugirira amasezerano.