Read kinyarwanda Yonasi 4 Bible Online

Yonasi 4 - kinyarwanda bible

Yonasi 4

¹Yonasi biramubabaza cyane, maze ararakara.

²Yambaza Uhoraho, avuga ati «Si ibi nari navuze igihe nari nkiri mu gihugu cyanjye? Ni cyo cyatumye mbanza guhungira i Tarishishi. Nari nzi nyine ko uri Imana y’impuhwe n’ibambe, utinda kurakara kandi ukungahaye ubudahemuka, ntukomeza umugambi wo kugira nabi.

³None rero, Uhoraho, nkiza ubuzima bwanjye, kuko gupfa bindutiye kubaho.»

⁴Uhoraho arasubiza ati «Ubwo koko hari impamvu ufite yo kurakara?»

⁵Yonasi ava mu mugi yicara iburasirazuba bwawo, ahiyubakira akazu, maze akugamamo izuba, ategereje ikizaba kuri uwo mugi.

⁶Hanyuma Uhoraho Imana ategeka ko hamera ikibonobono, maze kikazamuka hejuru ya Yonasi kugira ngo kimutwikire bityo kimugabanyirize akababaro. Yonasi yishimira bikomeye icyo giti.

⁷Ariko bukeye bwaho, umuseke ukebye, Imana itegeka ko haza inanda ikarya cya giti maze kikuma.

⁸Nuko izuba rirashe, Imana iteza umuyaga utwika[7] w’iburasirazuba, izuba ricanira umutwe wa Yonasi maze araraba. Asaba gupfa, aravuga ati «Kuri jye biraruta ko napfa aho kubaho.»

⁹Uhoraho abwira Yonasi ati «Ubwo koko hari impamvu ufite yo kurakazwa n’iki giti?» Arasubiza ati «Yego, birakwiye ko ndakara byo gupfa.»

¹⁰Uhoraho arongera ati «Wowe ubabajwe n’iki giti utigeze uruhira cyangwa ngo ugihe gukura, kikaba cyarakuze mu ijoro rimwe, kikuma mu rindi.

¹¹Naho jyewe, mbese sinkwiriye kubabazwa na Ninivi, umugi mugari, utuwe n’abantu ibihumbi ijana na makumyabiri batazi gutandukanya indyo n’imoso[8], hamwe n’amatungo atabarika?»