Read kinyarwanda Ibarura 1 Bible Online

Ibarura 1 - kinyarwanda bible

Ibarura 1

¹Ku wa mbere w’ukwezi kwa kabiri kw’umwaka wa kabiri, Abayisraheli bavuye mu gihugu cya Misiri, Uhoraho abwirira Musa mu butayu bwa Sinayi, mu ihema ry’ibonaniro ati

²«Mukore ibarura ry’imbaga yose y’Abayisraheli. Mujye muri buri muryango[1], no muri buri nzu,

³maze mubare abantu bose bafite imyaka makumyabiri n’abayirengeje kandi bashoboye kujya ku rugamba. Wowe na Aroni muzababarure mukurikije imitwe y’ingabo zabo.

⁴Muzifashishe umuntu umwe wa buri muryango, mbese usanzwe ari umutware w’inzu y’iwabo.

⁵Dore amazina y’abo bantu muzifashisha: kwa Rubeni ni Elisuri mwene Shedewuri;

⁶kwa Simewoni ni Shelumiyeli mwene Shurishadayi;

⁷kwa Yuda ni Nahashoni mwene Aminadabu;

⁸kwa Isakari ni Netaneli mwene Suwari;

⁹kwa Zabuloni ni Eliyabu mwene Heloni;

¹⁰naho muri bene Yozefu: kwa Efurayimu ni Elishama mwene Amihudi no kwa Manase ni Gamaliyeli mwene Pedasuri;

¹¹kwa Benyamini ni Abidani mwene Gidewoni;

¹²kwa Dani ni Ahiyezeri mwene Amishadayi;

¹³kwa Asheri ni Pagiyeli mwene Okrani;

¹⁴kwa Gadi ni Eliyasafu mwene Dewuyeli;

¹⁵kwa Nefutali ni Ahira mwene Eyinani.»

¹⁶Ngabo abari bahagarariye imbaga ari na bo bakuru b’imiryango ya ba sekuruza, bakaba abagaba b’ingabo za Israheli.

¹⁷Musa na Aroni rero bafata abo bantu batoranijwe, maze babagira ibisonga byabo.

¹⁸Ubwo Musa na Aroni bakoranya imbaga yose, ku wa mbere w’ukwezi kwa kabiri, nuko Abayisraheli batangira umwirondoro w’ibisekuruza[2] byabo muri buri muryango na buri nzu. Bagendaga babara amazina y’abagabo bose bafite imyaka makumyabiri n’abayirengeje umwe umwe.

¹⁹Mbese nk’uko Uhoraho yari yarabitegetse Musa, ababarurira mu butayu bwa Sinayi.

²⁰Bamaze kubarura bene Rubeni, imfura ya Israheli, mu mazina y’abagabo bose bafite imyaka makumyabiri n’irenga, kandi bashobora kujya ku rugamba,

²¹mu mazu no mu miryango ya Rubeni yose, basanze ari 46,500.

²²Bene Simewoni: bamaze kubarura amazina y’abagabo bose bafite imyaka makumyabiri n’irenga, kandi bashoboye kujya ku rugamba,

²³mu mazu no mu miryango ya Simewoni yose, basanze ari 59,300.

²⁴Bene Gadi: bamaze kubarura amazina y’abagabo bose bafite imyaka makumyabiri n’irenga, kandi bashoboye kujya ku rugamba,

²⁵mu mazu no mu miryango ya Gadi yose, basanze ari 45,650.

²⁶Bene Yuda: bamaze kubarura amazina y’abagabo bose bafite imyaka makumyabiri n’irenga, kandi bashobora kujya ku rugamba,

²⁷mu mazu no mu miryango ya Yuda yose, basanze ari 74,600.

²⁸Bene Isakari: bamaze kubarura amazina y’abagabo bose bafite imyaka makumyabiri n’irenga, kandi bashobora kujya ku rugamba,

²⁹mu mazu no mu miryango ya Isakari yose, basanze ari 54,400.

³⁰Bene Zabuloni: bamaze kubarura amazina y’abagabo bose bafite imyaka makumyabiri n’irenga, kandi bashobora kujya ku rugamba,

³¹mu mazu no mu miryango ya Zabuloni yose, basanze ari 57,400.

³²Naho bene Yozefu[3]: kwa Efurayimu, bamaze kubarura amazina y’abagabo bose bafite imyaka makumyabiri n’irenga, kandi bashoboye kujya ku rugamba,

³³mu mazu no mu miryango ya Efurayimu yose, basanze ari 40,500.

³⁴Kwa Manase: bamaze kubarura amazina y’abagabo bose bafite imyaka makumyabiri n’irenga, kandi bashobora kujya ku rugamba,

³⁵mu mazu no mu miryango ya Manase yose, basanze ari 32,200.

³⁶Bene Benyamini: bamaze kubarura amazina y’abagabo bose bafite imyaka makumyabiri n’irenga, kandi bashobora kujya ku rugamba,

³⁷mu mazu no mu miryango ya Benyamini yose, basanze ari 35,400.

³⁸Bene Dani: bamaze kubarura amazina y’abagabo bose bafite imyaka makumyabiri n’irenga, kandi bashobora kujya ku rugamba,

³⁹mu mazu no mu miryango ya Dani yose, basanze ari 62,700.

⁴⁰Bene Asheri: bamaze kubarura amazina y’abagabo bose bafite imyaka makumyabiri n’irenga, kandi bashobora kujya ku rugamba,

⁴¹mu mazu no mu miryango ya Asheri yose, basanze ari 41,500.

⁴²Bene Nefutali: bamaze kubarura amazina y’abagabo bose bafite imyaka makumyabiri n’irenga, kandi bashobora kujya ku rugamba,

⁴³mu mazu no mu miryango ya Nefutali yose, basanze ari 53,400.

⁴⁴Iyo ni yo mibare y’ababaruwe na Musa na Aroni, na ba batware cumi na babiri uko bagiye bava muri buri muryango wa Israheli.

⁴⁵Umubare w’abari bagejeje bose ku myaka makumyabiri n’irenga, kandi bashoboye kujya ku rugamba, uko bagiye babarurwa mu mazu yabo yo kwa sekuruza,

⁴⁶ni 603.550[4].

⁴⁷Cyakora abo mu muryango wa Levi, nk’uko basanzwe ari igihumbi cy’umuryango, ntibabaruriwe hamwe n’abandi.

⁴⁸Uhoraho abwira Musa, ati

⁴⁹«Umuryango wa Levi wonyine ntuzawubare, kandi ntuzawubarure hamwe n’abandi Bayisraheli.

⁵⁰Ahubwo Abalevi uzabashinge imirimo yo mu Ngoro[5] y’Ubushyinguro bw’Isezerano, n’ibijyana na yo, n’ibikoresho byayo byose. Bazayiheka, yo n’ibyayo byose, bayiteho, kandi bazagandike bayikikije.

⁵¹Ingoro y’Uhoraho nijya guhaguruka, Abalevi bazayiremura, maze nihagarara bayiremekanye. Nihagira utari uwo muri bo uhegera, azicwe.

⁵²Abayisraheli bazagandike buri wese mu ngando ye, hafi y’ibendera rye, bakurikije imitwe y’ingabo.

⁵³Abalevi bonyine bazagandika hirya no hino y’Ingoro y’Ubushyinguro bw’Isezerano, maze bazayiteho. Ibyo bizatuma uburakari bw’Uhoraho butagurumanira Abayisraheli.»

⁵⁴Abayisraheli bagenza batyo; bakora ibyo Uhoraho yari yategetse Musa byose.