Read kinyarwanda Ibarura 13 Bible Online

Ibarura 13 - kinyarwanda bible

Ibarura 13

¹[28] Uhoraho abwira Musa, ati

²«Ohereza abantu bajye gutata igihugu cya Kanahani jyewe ngabiye Abayisraheli. Muzohereza abantu bavuye muri buri nzu, buri wese ahagarariye inzu y’abasekuruza be; kandi abazoherezwa bazava mu batware ba Israheli.»

³Guhera mu butayu bwa Parani, Musa arabohereza, nk’uko Uhoraho yari yabitegetse. Abo bantu bose bari bavuye mu batware ba Israheli.

⁴Dore amazina yabo: Uwari uhagarariye inzu ya Rubeni, ni Shamuwa mwene Zakuri.

⁵Uwari uhagarariye inzu ya Simewoni, ni Shafati mwene Hori.

⁶Uwari uhagarariye inzu ya Yuda, ni Kalebu mwene Yefune.

⁷Uwari uhagarariye inzu ya Isakari, ni Yigweyali mwene Yozefu.

⁸Uwari uhagarariye inzu ya Efurayimu, ni Hosheya mwene Nuni.

⁹Uwari uhagarariye inzu ya Benyamini, ni Paliti mwene Rafu.

¹⁰Uwari uhagarariye inzu ya Zabuloni, ni Gadiyeli mwene Sodi.

¹¹Uwari uhagarariye inzu ya Yozefu ari yo ya Manase, ni Gadi mwene Susi.

¹²Uwari uhagarariye inzu ya Dani, ni Amiyeli mwene Gemali.

¹³Uwari uhagarariye inzu ya Asheri, ni Sheturi mwene Mikayeli.

¹⁴Uwari uhagarariye inzu ya Nefutali, ni Nahibi mwene Wofusi.

¹⁵Uwari uhagarariye inzu ya Gadi, ni Gewuyeli mwene Maki.

¹⁶Ayo ni yo mazina y’abantu Musa yohereje gutata igihugu cya Kanahani; Hosheya mwene Nuni, Musa amwita izina rya Yozuwe[29].

¹⁷Musa abohereza gutata igihugu cya Kanahani, agira ati «Mugende, munyure kuri Negevu, muterere umusozi

¹⁸maze murebe niba abaturage b’aho ari abanyembaraga cyangwa niba ari abanyantege nkeya.

¹⁹Muzarebe niba icyo gihugu gituwe n’abo bantu ari cyiza cyangwa ari kibi, murebe niba imigi batuyemo ari ingando cyangwa niba ari ibigo by’intavogerwa.

²⁰Muzarebe niba icyo gihugu cyera imyaka cyangwa niba kiyirumbya, murebe kandi niba giteye amashyamba cyangwa niba ari nta yo. Muzanashirike ubute maze musorome ku mbuto z’icyo gihugu.» Koko rero cyari igihe cy’imizabibu ya mbere.

²¹Nuko barazamuka batata icyo gihugu, bahera ku butayu bwa Sini bagera i Rehovu hafi ya Lebo-Hamati.

²²Bazamukira kuri Negevu, bagera kuri Heburoni ahari hatuwe na Ahimani, Sheshayi na Talumayi, abuzukuru b’Abanaki. Heburoni iyo yari yarubatswe imyaka irindwi mbere y’uko Tanisi yo mu Misiri yubakwa.

²³Bageze mu kibaya cya Eshikoli, bahatema ishami ry’umuzabibu rifite iseri bagombye guhekesha umutsibo ari babiri. Basoromye kandi ku matunda, no ku mbuto z’imitini.

²⁴Aho hantu bahita ikibaya cya Eshikoli, ari byo kuvuga ’Ikibaya cy’iseri’, kubera rya seri ry’umuzabibu Abayisraheli bahasoromye.

²⁵Ubutasi bw’icyo gihugu babumazemo iminsi mirongo ine.

²⁶Bagaruka i Kadeshi mu butayu bwa Parani, bahasanga Musa, Aroni n’imbaga yose y’Abayisraheli. Bababwira iby’urugendo rwabo, banabereka imbuto zo muri icyo gihugu bavuyemo.

²⁷Batekerereza Musa iyi nkuru, bati «Twagiye mu gihugu watwoherejemo, dusanga rwose ari igihugu gitemba amata n’ubuki; mbese dore n’imbuto cyera!

²⁸Ariko rero, abantu bagituye ni abanyamaboko cyane, imigi yabo ni ibigo bigari, bikikijwe n’inkuta z’amabuye. Twahasanze kandi n’abuzukuru b’Abanaki[30].

²⁹Abamaleki batuye mu ntara ya Negevu, Abahiti, Abayebuzi n’Abahemori batuye mu misozi, naho Abakanahani batuye hafi y’inyanja no ku nkombe z’uruzi rwa Yorudani.»

³⁰Kalebu acecekesha imbaga yari itaramiye Musa, agira ati «Reka tugende, tuzamuke, twigabize kiriya gihugu; nta gushidikanya ko tuzagitsinda, tukakigarurira.»

³¹Ariko abari bajyanye na Kalebu muri ubwo butasi, baramusubiza bati «Ntidushobora gutera bariya bantu kuko baturusha amaboko.»

³²Ndetse batangira no kugayira cyane Abayisraheli, icyo gihugu bari baratase, bavuga bati «Igihugu twazengurutse kugira ngo tugitate, twasanze ari igihugu kica nabi abagituye, kandi n’abantu twahabonye ni abagabo barebare b’inkorokoro.

³³Twanahabonye ba bantu b’ibihangange, bene Anaki, bo mu bwoko bw’abantu b’ibihambati. Imbere yabo twumvaga turi nk’inzige, kandi koko na bo ubwabo ni ko babonaga tungana.»