Read kinyarwanda Ibarura 14 Bible Online

Ibarura 14 - kinyarwanda bible

Ibarura 14

¹Imbaga yose yishyira hamwe irasakabaka ndetse irara irira ijoro ryose.

²Abayisraheli bose bagarambira Musa na Aroni; maze imbaga ibabwirira icyarimwe iti «Iyaba twaraguye mu gihugu cya Misiri! Cyangwa se tugapfira muri ubu butayu!

³Ni kuki Uhoraho atujyanye muri kiriya gihugu ngo tuzaharimburirwe n’inkota? Abagore bacu n’abana bacu bazabanyaga. Ese ikiruta kuri twebwe si uko twakwisubirira mu Misiri?»

⁴Nuko barabwirana bati «Twitorere umutware maze twisubirire mu Misiri!»

⁵Musa na Aroni bikubita hasi bubika amaso ku butaka, imbere y’imbaga y’Abayisraheli.

⁶Yozuwe mwene Nuni na Kalebu mwene Yefune bari mu mubare w’abagiye gutata icyo gihugu bashishimura imyambaro yabo.

⁷Maze ni ko kubwira ikoraniro ry’Abayisraheli, bati «Icyo gihugu twazengurutse kugira ngo tugitate, ni igihugu cyiza cyane!

⁸Uhoraho nadutonesha, azatujyana muri icyo gihugu gitemba amata n’ubuki, maze akiduhe.

⁹Mureke rero kwivumburira Uhoraho, mwoye no gutinya abantu bo muri kiriya gihugu; mu kubatsinda tuzabayongobeza mu kanya gato! Imana zabo ntizikibarinda, ngo zibatwikirize igicucu[31] cyazo, ariko twebwe Uhoraho ari kumwe natwe. Mwibatinya rero!»

¹⁰Imbaga yose yari mu migambi yo kubicisha amabuye, nuko ikuzo ry’Uhoraho ryigaragariza Abayisraheli bose ku ihema ry’ibonaniro.

¹¹Uhoraho abwira Musa, ati «Uriya muryango uzansuzugura kugeza na ryari? Bazamburira icyizere kugeza ryari n’ibimenyetso byose nagiriye rwagati muri bo?

¹²Ngiye kubahuramo icyorezo, mbambure umurage wabo, noneho wowe nzagukomoreho umuryango munini kandi ukomeye kurusha uriya.»

¹³Musa asubiza Uhoraho, ati «Abanyamisiri bazi ko uyu muryango wavanywe iwabo n’imbaraga zawe,

¹⁴ndetse babikwije no mu batuye iki gihugu. Ubu bazi ko wowe Uhoraho uri muri uyu muryango rwagati, ukaba uwiyereka imbonankubone, kandi ko igicu cyawe kiwutwikiriye. Bazi ko wowe ubwawe, ku manywa uwugenda imbere mu nkingi y’igicu, naho nijoro ukawugenda imbere mu nkingi y’umuriro.

¹⁵None ngo wakwica uyu muryango nk’umuntu umwe! Amahanga yamenye inkuru y’ubwamamare bwawe yakurizaho kuvuga ngo

¹⁶’Uhoraho ntiyari ashoboye gucyura[32] uriya muryango mu gihugu yawusezeranije, ni na yo mpamvu yawutikirije mu butayu.’

¹⁷Ahubwo ndasaba ngo imbaraga z’umutegetsi wanjye zigaragaze! Kuko wabyivugiye muri aya magambo, uti

¹⁸’Ndi Uhoraho, sindakara vuba, nuje ubudahemuka kandi nihanganira uncumuyeho n’unyiteyeho hejuru, ariko sindenzaho ngo nibagirwe, igicumuro cy’ababyeyi ngikurikirana ku bana babo, nkageza ku buzukuruza cyangwa ku buvivi.’

¹⁹Kuko impuhwe zawe zahebuje, babarira uyu muryango icyaha cyawo, nk’uko nanone wawihanganiye kuva mu Misiri kugeza aha.»

²⁰Uhoraho asubiza Musa, ati «Ndabababariye nk’uko wabisabye.

²¹Ariko rero, ndabirahiye uko izina ryanjye ari Uhoraho, Nyir’ubuzima, n’uko ikuzo ryanjye risakaye ku isi yose:

²²Bariya bantu babonye ikuzo ryanjye n’ibimenyetso nakoreye mu Misiri no mu butayu, hanyuma bakaba bamaze kungerageza incuro cumi zose banga kunyumvira,

²³nta n’umwe muri bo, ndabirahiye, uzabona igihugu nasezeranije ababyeyi babo; nta n’umwe muri bariya bansuzuguye uzakibona!

²⁴Ariko umugaragu wanjye Kalebu, kuko afite undi mutima, akaba yarankurikiye atajijinganya, nzamujyana muri icyo gihugu yavuye gutata, maze abuzukuru be bazagitunge;

²⁵naho Abamaleki n’Abakanahani bazakomeze bature mu kibaya. Guhera ejo, muzasubize inyuma, mwerekeze mu butayu mugana ku nyanja y’Urufunzo[33].»

²⁶Uhoraho abwira Musa na Aroni, ati

²⁷«Nzihanganira iyi mbaga iteye icyangiro idasiba kunyiteruraho ngeze ryari? Numvise neza amagambo y’imyijujuto Abayisraheli badahwema kuntera.

²⁸Ubabwire rero, uti ’Ndabirahiye, mu izina ryanjye Uhoraho, Nyir’ubuzima: nzabagenzereza ibihuje n’akabavamo niyumviye. Uwo ari Uhoraho ubivuga!

²⁹Mwebwe mwese ababaruwe mugejeje ku myaka makumyabiri, mwebwe mwese abanyiteruyeho, uko mungana, ni muri ubu butayu intumbi zanyu zizagarama.

³⁰Ndabirahiye: nta bwo muzinjira mu gihugu nari naragiriye indahiro yo kubatuzamo; usibye Kalebu mwene Yefune mwene Nuni.

³¹Naho abana banyu mwavugaga ko bazaba iminyago, nzakibajyanamo maze bamenye icyo gihugu mwebwe mwanze.

³²Mwebwe mwenyine, intumbi zanyu zizagarama muri ubu butayu.

³³Mu gihe cy’imyaka mirongo ine, abahungu banyu bazararagira mu butayu, bashengurwe n’intimba y’ubuhemu bwanyu, kugeza ubwo intumbi zanyu zose zizagarama muri ubu butayu.

³⁴Mbese uko iminsi yabaye mirongo ine yo gutata igihugu, umunsi umwe nzawubara ho umwaka, maze mu gihe cy’imyaka mirongo ine, muzashengurwe n’intimba y’ibyaha byanyu, maze muzamenyereho icyo ari cyo umugayo wanjye.

³⁵Jyewe Uhoraho ndabivuze kandi ndabirahiriye, nguko uko nzagenzereza iriya mbaga iteye icyangiro yampagurukiye. Amaherezo yabo bose ni aha mu butayu, ni ho bazagwa.»

³⁶Ba bagabo Musa yari yohereje gutata cya gihugu, bagahindukira bagisebya, bakanamuteza imbaga yose,

³⁷abo ngabo rero bari bagize ubugome bwo gusebya icyo gihugu, urupfu rw’impanuka rwabakubitiye mu maso y’Uhoraho.

³⁸Yozuwe mwene Nuni na Kalebu mwene Yefune ni bo bonyine barokotse mu bari baragiye gutata icyo gihugu.

³⁹Musa yagejeje ku Bayisraheli bose ayo magambo, maze batangira kwicwa n’agahinda.

⁴⁰Bukeye mu museso, bazamuka bagana mu misozi miremire bavuga bati «Ni koko twaracumuye, noneho turemeye, tugiye mu gihugu Uhoraho yatweretse.»

⁴¹Musa arasubiza ati «Ibyo mukora ni ibiki? Muraca ku itegeko ry’Uhoraho! Nta bwo bizabahira!

⁴²Mwikwirirwa muzamuka kuko Uhoraho atakiri kumwe namwe; mwikwishyira ababisha banyu ngo babatsinde.

⁴³Abamaleki n’Abakanahani bari hariya imbere yanyu, muzagwa ku bugi bw’inkota zabo. Kandi ubwo mwaretse kumukurikira, Uhoraho ntakiri kumwe namwe.»

⁴⁴Ariko bo baranga, barazamuka berekeza mu misozi miremire, kandi ari Musa ari n’ubushyinguro bw’Isezerano ry’Uhoraho, ntibava mu ngando.

⁴⁵Abamaleki n’Abakanahani bari batuye muri iyo misozi baramanuka, barabarwanya, barabatsemba kugeza i Horima.