Read kinyarwanda Ibarura 16 Bible Online

Ibarura 16 - kinyarwanda bible

Ibarura 16

¹Kore umuhungu wa Yishari mwene Kehati wa Levi agomesha abuzukuru ba Rubeni ari bo Datani na Abiramu bene Eliyabu, hamwe na Oni mwene Peleti.

²Bo rero, bafatanije n’abandi Bayisraheli magana abiri na mirongo itanu, bivumbura kuri Musa. Bari abantu b’ibirangirire, b’abatware b’umuryango, bakaba ari na bo bahagarariraga ikoraniro.

³Nuko rero biterura kuri Musa na Aroni bavuga bati «Twabarambiwe! Abagize ikoraniro bose ni abatagatifu[34] kandi Uhoraho ari hagati yabo; mwakuye he ububasha bwo kwigira abategetsi b’ikoraniro ry’Uhoraho?»

⁴Musa yumvise ayo magambo yitura hasi, yubika umutwe ku butaka.

⁵Hanyuma abwira Kore n’abafatanije na we, ati «Ejo mu gitondo, Uhoraho azatumenyesha umuntu uri uwe, w’umutagatifu, kandi unemerewe kumwegera. Uwo azaba yahisemo, azamwemerera kumwegera.

⁶None rero wowe, Kore n’abantu bawe, nimugenze mutya: mufate ibyotezo,

⁷ejo muzabicanemo umuriro, maze imbere y’Uhoraho mubishyiremo ububani. Umuntu Uhoraho azahitamo ni we uzaba ari umutagatifu. Nanjye kandi, mwebwe bene Levi, nabarambiwe!»

⁸Musa arongera abwira Kore, ati «Bene Levi, nimutege amatwi!

⁹Koko ntimuranyurwa, kuba Imana ya Israheli yarabahisemo ikabemerera kuyegera! Ni mwe murangiza imirimo yo mu Ngoro y’Uhoraho, mukanahagararira ikoraniro igihe muyobora imihango mu izina rya bose.

¹⁰Yabemereye kumwegera, wowe, Kore n’abavandimwe bawe bose b’Abalevi. Ibyo mwasanze bitabahagije ku buryo mwarwanira no kuba abaherezabitambo!

¹¹Ubwo ni icyo cyatumye, wowe n’abantu bawe, mwishyira hamwe mukiterura kuri Uhoraho! Aroni se we ni muntu ki kugira ngo mumwijujuteho?»

¹²Musa ahamagaje Datani na Abiramu bene Eliyabu, baramubwira bati «Nta bwo tuzazamuka ngo tujye muri kiriya gihugu.

¹³Ibyo ntibihagije kubona waratuzamuye ukadukura mu gihugu gitemba amata n’ubuki, kugira ngo tugwe muri ubu butayu? None ibyo bivuyeho ugashaka no kudutegeka?

¹⁴Oya, mu by’ukuri nta bwo watujyanye mu gihugu gitemba amata n’ubuki! Nta bwo waduhaye umurage w’imirima cyangwa uw’imizabibu. Ese urakeka ko bariya bantu ari impumyi? Nta bwo tuzajyayo!»

¹⁵Musa ararakara cyane, maze abwira Uhoraho, ati «Ntiwakire ituro ryabo. Nta n’indogobe yabo nigeze mfata. Nta n’umwe muri bo nagiriye nabi.»

¹⁶Musa abwira Kore, ati «Wowe n’ingabo zawe, ejo muzabe muri imbere y’Uhoraho hamwe na Aroni.

¹⁷Muzafate mwese ibyotezo byanyu, mushyiremo ububani, maze buri wese azabimurikire imbere y’Uhoraho. Byose hamwe bizaba ari magana abiri na mirongo itanu; wowe na Aroni, buri wese azaba afite icye.»

¹⁸Bose bafata ibyotezo byabo, bacanamo umuriro, bashyiraho ububani, maze bo, Musa na Aroni bahagarara ku muryango w’ihema ry’ibonaniro.

¹⁹Kore akoranyiriza abantu be iruhande rwa Musa na Aroni, ku muryango w’ihema ry’ibonaniro. Nuko ikuzo ry’Uhoraho ryigaragariza imbaga yose,

²⁰maze Uhoraho abwira Musa na Aroni, ati

²¹«Nimwitandukanye na bariya bantu, muri aka kanya ngiye kubarimbura.»

²²Bikubita hasi, maze bubika umutwe ku butaka bavuga bati «Mana, Mana, wowe uha umwuka ikiremwa cyose, umuntu umwe aracumura maze ukarakarira ikoraniro ryose!»

²³Uhoraho abwira Musa, ati

²⁴«Bwira ikoraniro rijye kure y’ingo za Kore, Datani na Abiramu.»

²⁵Musa ahagurutse ngo ajye gushaka Datani na Abiramu, abakuru b’imiryango baramukurikira.

²⁶Abwira ikoraniro ryose aya magambo, ati «Mujye kure y’amahema ya bariya bagome, kandi ntimugire ikintu cyabo mukoraho, hato namwe mutavaho murimbuka kubera ibyaha byabo byose!»

²⁷Rubanda rero bajya kure y’ingo za Kore, Datani na Abiramu. Datani na Abiramu bari basohokanye n’abagore babo, abana n’abuzukuru babo, maze bahagarara ku miryango y’amahema yabo.

²⁸Musa aravuga ati «Dore ikizabemeza ko Uhoraho ari we wanyohereje kurangiza bya bikorwa byose, nkaba nta cyo nkora ku bushake bwanjye.

²⁹Bariya bantu, nibicwa n’urupfu rusanzwe rutwara abandi, bakanogoka uko abandi banogoka, Uhoraho ntazaba yaranyohereje.

³⁰Ariko rero Uhoraho nakora igitangaza, maze isi ikicamo urwobo ikabamirana n’ibyo batunze byose, bakarigita ikuzimu ari bazima, muzamenya ko bariya bantu bari barasuzuguye Uhoraho.»

³¹Yarangije kuvuga ayo magambo, nuko ubutaka busadukira ku birenge bya Datani na Abiramu.

³²Isi yicamo urwobo, ibamirana n’imiryango yabo, hamwe n’abantu ba Kore bose n’ibyabo byose.

³³Bo n’ibyo bari batunze byose, birigita ikuzimu ari bazima, isi ibarengaho; nuko bava mu ikoraniro batyo.

³⁴Abayisraheli bari babakikije, bumvise induru zabo, bahunga babwirana bati «Nimucyo duhunge! naho ubundi isi iratumira!»

³⁵Nyuma, Uhoraho yohereza ikibatsi cy’umuriro gitwika ba bagabo magana abiri na mirongo itanu bariho batura imibavu.