Read kinyarwanda Ibarura 23 Bible Online

Ibarura 23 - kinyarwanda bible

Ibarura 23

¹Balamu abwira Balaki, ati «Nyubakira hano intambiro ndwi, untegurire ibimasa birindwi n’amasekurume y’intama arindwi.»

²Balaki akora ibyo Balamu yamusabye, maze bombi batura ikimasa n’isekurume y’intama kuri buri rutambiro.

³Balamu abwira Balaki, ati «Wowe guma iruhande rw’igitambo cyawe gitwikwa, maze jyewe nigireyo, ahari Uhoraho yansanga. Amagambo ari bumbwire ayo ari yo yose, ndayakumenyesha.» Nuko Balamu afata inzira aragenda,

⁴maze Imana imusanze, arayibwira ati «Nubakishije intambiro ndwi, kandi ntura ikimasa n’isekurume y’intama kuri buri rutambiro.»

⁵Uhoraho amaze kubwira Balamu ibyo aza kuvuga, amwohereza agira ati «Ngaho subira kwa Balaki, umubwire utyo.»

⁶Balamu yasubiye kwa Balaki, asanga ahagaze iruhande rw’igitambo cye gitwikwa. Yari kumwe n’abanyacyubahiro bose b’i Mowabu.

⁷Balamu na we abahanurira muri iki gisigo, agira ati: «Balaki yampubuye muri Aramu, umwami wa Mowabu antumaho mu misozi y’iburasirazuba, ngo ninze nshore umuvumo mu bana ba Yakobo, maze Abayisraheli mbambike umugayo.

⁸Navuma nte uwo Imana itavumye? Uwo Uhoraho atigeze agaya, namwambika umugayo nte?

⁹Iyo ndebeye hejuru y’urutare, ngatera ijisho ndi mu mpinga y’imisozi, nsanga ari umuryango udasa n’iyindi, ntashyira mu mubare w’amahanga yandi.

¹⁰Ni nde washobora kubara abuzukuru ba Yakobo, akabarura imbaga nyamwinshi y’Abayisraheli? Icyampa nanjye ngapfa nk’intungane, indunduro yanjye ikazasa n’iyabo!»

¹¹Balaki abwira Balamu, ati «Wangenje ute? Narakuzanye ngo uvume ababisha banjye, none dore ahubwo urabasakazamo imigisha!»

¹²Balamu aramusubiza ati «Nta bwo se uzi ko iyo mbumbuye umunwa, mba ngomba kuvuga ibyo Uhoraho yambwiye byonyine?»

¹³Balaki arongera ati «Ngwino nkwereke aho tujya ushobore kureba neza iriya mbaga. Mbere wayibonaga igice, ariko nuhagera, urashobora kuyibona yose, maze uyimvumire!»

¹⁴Amujyana ahantu hitaruye, mu mpinga y’umusozi wa Pisiga, ahubaka intambiro.

¹⁵Balamu abwira Balaki, ati «Wowe guma iruhande rw’igitambo cyawe gitwikwa, maze jyewe nigire hariya ntegereze . . . »

¹⁶Uhoraho aza imbere ya Balamu, amubwira ibyo agomba kuvuga, nuko amwohereza agira ati «Ngaho sanga Balaki, umubwire utyo.»

¹⁷Balamu asanga Balaki, wari uhagaze iruhande rw’igitambo cye gitwikwa. Yari kumwe n’abanyacyubahiro bose b’i Mowabu. Balaki aramubaza ati «Uhoraho yakubwiye iki?»

¹⁸Nuko Balamu abahanurira muri iki gisigo, agira ati: «Balaki, haguruka wumve! Wowe, mwene Sipori, ntega amatwi!

¹⁹Imana si umuntu ngo irabeshya, si mwene Adamu ngo irisubiraho. Yavuga icyo itazakora se? Ijambo yavuze se ryapfa guhera aho?

²⁰Nujuje umuhango wo gutanga umugisha, ubwo kandi ari Uhoraho wawitangiye, jyewe sinasubizayo.

²¹Nta cyorezo wasanga mu nzu ya Yakobo, mu nzu ya Israheli ntihajya harangwa umubabaro. Uhoraho, Imana ye, ihorana na we, iwe havuga impundu z’umwami.

²²Imana yamukuye mu Misiri; imbaraga ze ni nk’iz’imbogo.

²³Mu nzu ya Yakobo ntihakavugwe indagu, mu nzu ya Israheli ntihakarangwe ubupfumu[45]. Iyo igihe kigeze, Imana ni yo ivugana na Yakobo, ari we Israheli, ikamubwira ibikorwa byayo.

²⁴Dore umuryango uhingutse nk’igihanyaswa, ukaba uhagurutse nk’intare. Ntiryama itamazeho umuhigo wayo, kandi itanyoye amaraso y’icyo yishe.

²⁵Balaki abwira Balamu, ati «Niba wanze kubavuma, wikomeza rero kubaha umugisha.»

²⁶Balamu aramusubiza ati «Ese sinari nakubwiye ko nkora ibyo Uhoraho ambwira byose?»

²⁷Balaki abwira Balamu, ati «Ngwino nkujyane ahandi hantu, ahari Imana yakwemera ko umvumira uriya muryango.»

²⁸Nuko Balaki ajyana Balamu mu mpinga ya Pewori, umusozi witaruye ubutayu.

²⁹Balamu abwira Balaki, ati «Nyubakira hano intambiro ndwi, maze untegurire ibimasa birindwi n’amasekurume arindwi.»

³⁰Balaki akora ibyo Balamu yamubwiye, maze atura ikimasa n’isekurume y’intama kuri buri rutambiro.