Read kinyarwanda Ibarura 24 Bible Online

Ibarura 24 - kinyarwanda bible

Ibarura 24

¹Balamu abona ko Uhoraho yishimiye guha umugisha Abayisraheli, maze ntiyongera kwivuna abaririza icyo Uhoraho ashaka, ahubwo arahindukira yirebera mu butayu.

²Balamu yubuye amaso, abona Abayisraheli bashinze ingando, buri nzu iri ukwayo. Umwuka w’Imana umusakaramo,

³maze abahanurira muri iki gisigo, agira ati: «Arabivuze Balamu mwene Bewori, arabivuze umugabo ureba akageza kure,

⁴arabivuze uwumva amagambo y’Uhoraho, akabona ibyo Uhoraho amweretse, maze yaba yatwawe mu Mana, amaso ye agafunguka!

⁵Mbega amahema yawe, Yakobo, ngo araba meza, kimwe n’ingando zawe, Israheli;

⁶ameze nk’amazi atemba ava mu isumo, ameze nk’ubusitani bwo ku nkombe y’uruzi, ameze nk’imisaga yiterewe n’Uhoraho, cyangwa amasederi yo ku nkombe y’umugezi.

⁷Ni nk’amazi yarenze imiyoboro, agasendera mu mbuto. Umwami wa Israheli[46] azaganza Agagi, maze ingoma ye isagambe.

⁸Imana yamwikuriye mu Misiri afite imbaraga nk’iz’imbogo. Azayogoza amahanga y’ababisha, abakonyagure amagufa, abahamye imyambi ye.

⁹Aca bugufi, akabyagira nk’intare: ni nde wabyutsa iyo nyamaswa y’inkazi? Arahirwa uzaguha umugisha, kandi uzakuvuma na we azabe ikivume!»

¹⁰Balaki arakarira Balamu, maze akubita agatoki ku kandi avuga ati «Naguhamagariye kumvumira ababisha, none dore bubaye ubwa gatatu ubasenderezaho imigisha!

¹¹Niba ari ibyo byawe, genda usubire mu gihugu cyawe! Nari nemeye kuguhemba bishimishije, none dore Uhoraho arabikuvukije.»

¹²Balamu asubiza Balaki, ati «Nta bwo se nari nabwiye intumwa wanyoherereje nti

¹³’N’aho Balaki yampa feza na zahabu byakuzura inzu ye, sinshobora guca ku itegeko ry’Uhoraho ngo mpamagare ikibi cyangwa icyiza ku bushake bwanjye! Nzavuga icyo Uhoraho azambwira.’

¹⁴None rero ubu ndagiye, nsubiye mu banjye. Ariko igira hino, nkubwire uko uriya muryango uzagenzereza uwawe mu gihe kiri imbere.»

¹⁵Nuko abahanurira muri iki gisigo, agira ati: «Ndabivuze Balamu mwene Bewori, ndi umugabo ureba nkitegereza,

¹⁶amagambo y’Imana ni jyewe abwirwa kandi ntunze ubwenge nahawe n’Umushoborabyose. Iyo nsenze cyane ngatwarwa, amaso yanjye agafunguka, ndangamira ibyo Ushoborabyose anyeretse:

¹⁷ibizaba ndabyiyumvira, nyamara si ibya vuba, ndabyitegereza ariko ntibindi bugufi: mu nzu ya Yakobo hazavuka inyenyeri[47], mu muryango wa Israheli hazaboneka inkoni y’ubwami izamenagura imitwe y’abatuye Mowabu, inatsembe bene Seti bose.

¹⁸Edomu izatsindwa, inyagwe; nayo Seyiri, ababisha bazayigabiza. Israheli igiye kugaragaza imbaraga zayo!

¹⁹Mu nzu ya Yakobo hazaduka umutware uzatsemba ababisha basigaye mu mugi wabo.

²⁰Balamu arongera areba Abamaleki, maze abahanurira muri iki gisigo, agira ati: «Amaleki ni igihangange mu mahanga, ariko amaherezo yayo ni ukurimburwa.»

²¹Arongera areba Abakeniti, maze abahanurira muri iki gisigo, agira ati «Amazu yawe arakomeye, n’icyari cyawe cyubatse ku rutare.

²²Ariko Kayini azakongorwa n’indimi z’umuriro, nibishyira kera Ashuru ibagire imfungwa.»

²³Arongera ahanurira muri iki gisigo, agira ati «Mbega ibyago! Ni nde uzarokoka ukuboko kw’Uhoraho?

²⁴Dore amato araje avuye i Kitimu . . . Abanzi bazakandamiza Ashuru na Eberi; ariko na bo ubwabo imbere yabo hari imanga.»

²⁵Birangiye Balamu arigendera asubira mu gihugu cye, Balaki na we anyura inzira ye, arataha.