Read kinyarwanda Ibarura 3 Bible Online

Ibarura 3 - kinyarwanda bible

Ibarura 3

¹Dore urubyaro rwa Aroni n’urwa Musa, igihe Uhoraho avuganiye na Musa ku musozi wa Sinayi.

²Dore kandi amazina ya bene Aroni: imfura ni Nadabu, hanyuma Avihu, Eliyazari na Itamari.

³Ngayo amazina ya bene Aroni, abaherezabitambo basutsweho amavuta y’isigwa maze begurirwa umurimo w’ubuherezabitambo[6].

⁴Nadabu na Avihu bapfiriye[7] mu butayu bwa Sinayi imbere y’Uhoraho kuko bari bamutuye ibyotezo bitamukwiye; bapfa nta gahungu basize. Eleyazari na Itamari rero, ni bo bakoreraga mu maso ya se Aroni umurimo w’ubuherezabitambo.

⁵Uhoraho abwira Musa, ati

⁶«Igiza hino Abalevi, maze ubashyikirize umuherezabitambo Aroni, kugira ngo bazajye bamufasha.

⁷Bazamukorera we n’imbaga yose mu ihema ry’ibonaniro, kandi banatunganye imirimo yose y’Ingoro.

⁸Bazita ku bikoresho byose by’ihema ry’ibonaniro, baserukire Abayisraheli mu itunganya ry’imirimo yerekeye Ingoro.

⁹Abalevi uzashyikiriza Aroni n’abahungu be, bazaba babahawe burundu, babe mu cyimbo cy’abandi Bayisraheli bose.

¹⁰Aroni n’abahungu be, uzabegurire imirimo yose y’ubuherezabitambo; utari uwo muri bo akabivangamo, azicwe.»

¹¹Uhoraho abwira Musa, ati

¹²«Jyewe ubwanjye nitoreye bene Levi mu Bayisraheli bose, ngo babe ingurane z’uburiza bwose bwavutseho imbyaro ya mbere ku Bayisraheli. Abalevi ndabiyeguriye.

¹³Kuko icyitwa uburiza cyose ari icyanjye: kuva umunsi nishe icyitwa uburiza cyose mu gihugu cya Misiri, ubwo niyeguriye icyitwa uburiza cyose muri Israheli, ari uburiza bw’abantu cyangwa bw’amatungo. Ni ubwanjye. Ndi Uhoraho!»

¹⁴Uhoraho abwirira Musa mu butayu bwa Sinayi, ati

¹⁵«Barura Abalevi ukurikije imiryango yabo n’amazu yabo. Uzabarura Abalevi bose b’igitsinagabo, kuva ku ruhinja rw’ukwezi kumwe.»

¹⁶Musa rero ababarura akurikije itegeko ry’Uhoraho nk’uko yari yabibwirijwe.

¹⁷Dore rero amazina ya bene Levi: Gerishoni, Kehati, na Merari.

¹⁸Bene Gerishoni, ukurikije amazu yabo, ni Libini na Shimeyi.

¹⁹Bene Kehati, ukurikije amazu yabo, ni Amuramu, Yisehari, Heburoni, na Uziyeli.

²⁰Bene Merari, ukurikije amazu yabo, ni Mihali na Mushe. Ngayo amazu y’Abalevi, uko babaruwe mu miryango yabo.

²¹Abakomoka kuri Gerishoni ni inzu y’Abalibini n’iy’Abashimeyi. Ayo ni yo yari amazu y’Abagerishoni.

²²Ab’igitsinagabo bose hamwe uhereye ku ruhinja rw’ukwezi kumwe, umubare wabo ugera ku 7,500.

²³Amazu y’Abagerishoni yagandikaga inyuma y’Ingoro mu burengerazuba.

²⁴Umutware w’umuryango w’Abagerishoni yari Eliyasafu mwene Layeli.

²⁵Mu ihema ry’ibonaniro, bene Gerishoni bari bashinzwe ibi bikurikira: Ingoro, ihema ry’ibonaniro,

²⁶imyenda n’umubambiko byo ku irembo ry’urugo rukikije Ingoro n’urutambiro, hamwe n’imigozi yakenerwaga mu mirimo yose yo kubaka Ingoro y’Uhoraho.

²⁷Abakomokaga kuri Kehati ni inzu y’Abamuramu, iy’Abahisehari, iy’Abaheburoni, n’iy’Abahuziyeli. Ayo ni yo yari amazu y’Abakehati.

²⁸Ab’igitsinagabo bose, ubaze guhera ku ruhinja rw’ukwezi kumwe, bari 8,600. Bose kandi bari bashinzwe imirimo yo mu Ngoro.

²⁹Amazu y’Abakehati yagandikaga iruhande rw’Ingoro, mu majyepfo.

³⁰Umutware w’umuryango w’Abakehati yari Elisafani mwene Uziyeli.

³¹Bari bashinzwe ibi bikurikira: ubushyinguro, ameza, ikinyarumuri, intambiro n’ibikoresho by’imihango y’Ingoro, hamwe n’umubambiko n’imirimo yose yo kubaka Ingoro.

³²Umutware w’ikirenga w’Abalevi, ni Eleyazari mwene Aroni, umuherezabitambo. Ni we wategekaga abagabo bakoraga mu Ngoro.

³³Abakomokaga kuri Merari, ni inzu y’Abamihali n’iy’Abamushe. Ayo ni yo yari amazu ya Merari.

³⁴Abamerari b’igitsinagabo bose, ubaze guhera ku ruhinja rw’ukwezi kumwe, bari 6,200.

³⁵Amazu y’Abamerari yagandikaga iruhande rw’Ingoro, mu majyaruguru. Umutware w’Abamerari ni Suriyeli mwene Avihayili.

³⁶Abamerari bari bashinzwe ibi bikurikira: inkomanizo z’Ingoro, imbariro zayo, inkingi zayo, n’ibitereko byazo, hamwe n’ibigendana na byo byose, n’imirimo yose yo kubishinga.

³⁷Bari bashinzwe kandi inkingi zose z’inkike izengurutse ingombe, inshingiriro zayo, hamwe n’imiganda yayo n’injishi zabyo.

³⁸Abagandikaga imbere y’Ingoro, iburasirazuba, ni ukuvuga imbere y’ihema ry’ibonaniro, ni Musa, Aroni n’abahungu be. Ni bo bakoraga imihango yo mu Ngoro, mu izina ry’Abayisraheli. Iyo hagira utari uwo muri abo uhegera, yari kwicwa.

³⁹Umubare w’Abalevi bose uko babaruwe mu mazu yabo na Musa na Aroni, ku itegeko ry’Uhoraho, ni 22,000. Abalevi bose b’igitsinagabo, ubaze uhereye ku ruhinja rw’ukwezi kumwe, ni uko banganaga.

⁴⁰Uhoraho abwira Musa, ati «Ubarure abana b’uburiza bose b’igitsinagabo b’Abayisraheli. Uhere ku mpinja z’ukwezi kumwe, maze urondore amazina yabo.

⁴¹Uzanzigamire Abalevi mu mwanya w’abana b’uburiza b’Abayisraheli. Ndi Uhoraho. Uzanzigamire kandi n’amatungo y’Abalevi mu mwanya w’uburiza bw’amatungo ya Israheli.»

⁴²Nk’uko Uhoraho yari yabimutegetse, Musa abarura abana b’uburiza b’Abayisraheli.

⁴³Abana b’uburiza b’igitsinagabo; abandikiwe amazina bahereye ku mpinja z’ukwezi kumwe, bose bari 22,273.

⁴⁴Uhoraho abwira Musa, ati

⁴⁵«Ufate Abalevi mu mwanya w’abana b’uburiza b’Abayisraheli, amatungo y’Abalevi na yo uyafate mu mwanya w’amatungo y’Abayisraheli: Abalevi ni abanjye; ndi Uhoraho.

⁴⁶Kugira ngo bariya bana b’uburiza 273 barenga ku mubare w’Abalevi bacungurwe,

⁴⁷uzahabwe kuri buri muntu, amasikeli atanu apimiye kuri sikeli y’Ingoro ifite uburemere bwa gera makumyabiri.

⁴⁸Iyo feza uzayiha Aroni n’abahungu be, ibe ikiguzi cy’ugucungurwa kwa ba bana b’uburiza barenga ku mubare w’Abalevi.»

⁴⁹Musa yakira iyo feza y’incungu, ayiherewe ba bana basagukaga ku mubare w’abana b’uburiza bacunguwe n’Abalevi.

⁵⁰Iyo feza yatangiwe abana b’uburiza b’Abayisraheli, yanganaga n’amasikeli y’Ingoro 1,365.

⁵¹Nk’uko Uhoraho yari yabitegetse, Musa ashyikiriza Aroni n’abahungu be, iyo feza y’incungu, nk’uko Uhoraho yari yabimubwirije.