Read kinyarwanda Ibarura 30 Bible Online

Ibarura 30 - kinyarwanda bible

Ibarura 30

¹Musa abwira Abayisraheli ibyo Uhoraho yari yamutegetse byose.

²Musa abwira abatware b’amazu ya Israheli, ati «Dore itegeko Uhoraho yatanze:

³Umuntu nagirira Uhoraho umuhigo, cyangwa akagira icyo yiyemeza mu ndahiro, ntazanyuranye n’ijambo rye. Ahubwo azubahirize muri byose amasezerano yamuvuye mu kanwa.

⁴Igihe umukobwa w’inkumi ukiri kwa se agiriye Uhoraho umuhigo, cyangwa akagira icyo yiyemeza ku giti cye,

⁵iyo se amenye ko yakoze ayo masezerano cyangwa ko hari icyo yiyemeje ku giti cye, ntagire icyo amubwira, byose bizahama.

⁶Ariko umunsi se yabimenye akamubuza, iyo mihigo ye n’ibyo yiyemeje ku giti cye, byose bizaba bisheshwe. Uhoraho azamubabarira kuko se azaba yamubujije.

⁷Uwo mukobwa kandi ashobora kurongorwa akirangwaho iyo mihigo hamwe n’ibyo yiyemeje ku ijambo ryavuye mu kanwa ke.

⁸Umugabo we iyo abimenye ntagire icyo amubwira kuri uwo munsi, umuhigo we n’ibyo yiyemeje byose ku giti cye bikomeza guhama.

⁹Ariko umugabo we namubuza ku munsi yabimenyeyeho, uwo muhigo hamwe n’ibyo yiyemeje byose ku ijambo rivuye mu kanwa ke, bizaba bisheshwe. Uhoraho na we azamubabarira.

¹⁰Cyakora, umuhigo w’umupfakazi cyangwa w’umugore wirukanywe mu nzu, uzahama uko azaba yawiyemeje kose.

¹¹Ariko uwo muhigo nawugirira mu nzu y’umugabo we, akagira icyo yiyemeza ku ndahiro,

¹²hanyuma umugabo yabimenya ntagire icyo avuga ngo amubuze, ayo masezerano ye yose azahama.

¹³Ariko umugabo we niyiyemeza kuyasesa ku munsi yayamenyeyeho, amagambo y’uwo mugore yerekeye umuhigo n’andi masezerano yose, azaba impfabusa. Kuko umugabo we azaba yayasheshe, Uhoraho azababarira uwo mugore.

¹⁴Ari umuhigo cyangwa indahiro umugore yiyemeje akanabisibirira, umugabo we ni we uzabiha ishingiro cyangwa akabisesa.

¹⁵Uwo mugabo natagira icyo avuga kugera bukeye, iyo mihigo y’umugore hamwe n’ayo masezerano ye, azaba abihaye guhama. Azaba abihaye ishingiro kuko nta cyo azaba yabivuzeho ku munsi yabimenye.

¹⁶Ariko umugabo niyiyemeza kubisesa nyuma y’umunsi yabibwiweho, ni we uzabazwa icyaha cy’umugore we.»

¹⁷Ayo ni yo mategeko Uhoraho yabwiye Musa. Yerekeye umugabo n’umugore we, kimwe n’umugabo n’umukobwa we w’inkumi ukiri iwabo.