Read kinyarwanda Ibarura 32 Bible Online

Ibarura 32 - kinyarwanda bible

Ibarura 32

¹Bene Rubeni na bene Gadi bari bafite amashyo y’amatungo menshi cyane. Barebye igihugu cya Yazeri n’icya Gilihadi, basanga iyo ntara irimo urwuri rwiza rw’ayo matungo yabo.

²Bene Rubeni na bene Gadi basanga Musa, n’umuherezabitambo Eleyazari, n’abatware b’umuryango, barababwira bati

³«Ataroti, Divoni, Yazeri, Nimura, Heshiboni, Eleyale, Sevamu, Nebo na Bewoni,

⁴iyo ntara Uhoraho yatsindiye imbaga y’Abayisraheli, ni igihugu kibereye ubworozi bw’amatungo. Kandi rero urabizi, twe abagaragu bawe, dufite amashyo.

⁵Turakwinginze rero ngo kiriya gihugu ukiduheho umugabane twebwe abagaragu bawe, maze woye kutwambutsa Yorudani.»

⁶Ariko Musa asubiza bene Gadi na bene Rubeni, ati «Ngaho rero! Abavandimwe banyu bagiye ku rugamba, namwe ngo mwisigarire hano !

⁷Ni kuki mushaka guca intege abandi Bayisraheli ngo boye kujya mu gihugu Uhoraho yabahaye?

⁸Ni nk’uko kandi abasokuruza banyu babigenje igihe twari i Kadeshi-Barineya, nkabohereza gutata igihugu basezeranijwe.

⁹Barazamutse bagera mu kibaya cya Eshikoli, maze bareba icyo gihugu. Mu kugaruka, baje baca intege Abayisraheli, bababuza kwinjira mu gihugu Uhoraho yabasezeranije.

¹⁰Kuri uwo munsi Uhoraho yararakaye cyane, maze arahira agira ati

¹¹’Bariya bantu bavuye mu Misiri, bakaba bafite imyaka makumyabiri n’irenga, kuko banze kunkurikira, bazapfa batabonye igihugu nasezeranije Abrahamu, Izaki na Yakobo.’

¹²Abarokotse muri abo ni Kalebu mwene Yefune w’Umukenisi, na Yozuwe mwene Nuni, kuko bari bakurikiye Uhoraho nta gushidikanya.

¹³Uhoraho yarakariye cyane Abayisraheli, maze ababungagiza mu butayu imyaka mirongo ine, kugeza ubwo abari bakoze ibitamunyuze bose bashaje bagashira.

¹⁴None rero namwe, bwoko bw’abanyabyaha, mugiye kugenza nka ba so, mukururire Israheli yose uburakari bw’Uhoraho!

¹⁵By’ukuri, nimwanga kumukurikira, azahamisha Israheli muri ubu butayu, muzabe ari mwe mpamvu y’ukurimbuka k’uyu muryango.»

¹⁶Baramwegera, maze baramubwira bati «Tugiye kubaka hano ibiraro by’amashyo y’intama zacu, twubake n’imigi y’abana bacu.

¹⁷Naho twebwe tuzihutira gufata intwaro tugende imbere y’Abayisraheli kugeza ubwo na bo tuzaba tumaze kubinjiza iwabo. Abana bacu bazasigara hano mu migi y’intavogerwa, aho batazaterwa n’abaturage b’iki gihugu.

¹⁸Nta bwo tuzagaruka mu mazu yacu mbere y’uko buri Muyisraheli wese agira umunani we.

¹⁹Ariko ntituzagabana na bo igihugu kiri hakurya ya Yorudani, twebwe umunani wacu uherereye hano, iburasirazuba bwa Yorudani.»

²⁰Musa arabasubiza ati «Nimubigenza mutyo, mugafata intwaro imbere y’Uhoraho, mukajya ku rugamba,

²¹ingabo zanyu zikambuka Yorudani kugeza ubwo Uhoraho azirukana imbere ye abanzi be bose,

²²maze mukazahindukira ari uko icyo gihugu cyaganjwe, nta cyo muzabazwa imbere y’Uhoraho n’imbere ya Israheli, kandi iki gihugu kizaba umugabane wanyu.

²³Ariko nimutagenza mutyo, muzaba mucumuriye Uhoraho; kandi mumenye ko icyaha cyanyu cyabakurikirana.

²⁴Nimwubake imigi y’abana banyu n’ibiraro by’intama zanyu, ariko ijambo ryavuye mu munwa wanyu muzaryubahirize.»

²⁵Bene Gadi na bene Rubeni babwira Musa, bati «Twebwe abagaragu bawe, tuzubahiriza neza amategeko ya databuja.

²⁶Abagore n’abana bacu, amashyo yacu n’amatungo yacu yose, bizasigara hano mu migi ya Gilihadi.

²⁷Naho twebwe abagaragu bawe, abakereye itabaro, tuzashoza urugamba imbere y’Uhoraho, nk’uko databuja abivuze.»

²⁸Iby’abo bantu rero, Musa abishinga umuherezabitambo Eleyazari, na Yozuwe mwene Nuni, hamwe n’abatware b’imiryango ya Israheli.

²⁹Yarababwiye ati «Bene Gadi na bene Rubeni nibafata intwaro mukambukana Yorudani, bakajya ku rugamba, nimumara kuganza kiriya gihugu, muzabahe intara ya Gilihadi ho umugabane.

³⁰Ariko nibadafata intwaro hamwe namwe, bazahabwa umugabane wabo hagati yanyu mu gihugu cya Kanahani.»

³¹Bene Gadi na bene Rubeni barasubiza bati «Tuzakora ibyo Uhoraho yabwiye abagaragu bawe.

³²Twebwe ubwacu, tuzafata intwaro tujye mu gihugu cya Kanahani imbere y’Uhoraho, kandi umugabane wacu uzaba uyu wo hakuno ya Yorudani.»

³³Igihugu cya Sihoni umwami w’Abahemori, icya Ogi umwami wa Bashani, imigi yabyo n’intara ziyegereye, byose Musa abyegurira bene Gadi, bene Rubeni, n’igice kimwe cy’umuryango wa Manase mwene Yozefu.

³⁴Bene Gadi bubaka bundi bushya imigi ya Divoni, Ataroti, Aroweri,

³⁵AtirotiShofani, Yazeri, Yogiboha,

³⁶Beti-Nimura, na Beti-Harani. Iyo migi barayubatse barayikomeza, bubaka n’ibiraro by’amatungo yabo.

³⁷Bene Rubeni bubaka bundi bushya imigi ya Heshiboni, Eleyale, Kiriyatayimu,

³⁸Nebo, Behali-Mewoni na Sivima. Uretse Sivima, amazina y’iyo migi yose bubatse bundi bushya barayahinduye bayita ayandi mashyashya.

³⁹Bene Makiri, umuhungu wa Manase, bagiye muri Gilihadi, icyo gihugu barakigabiza, bakirukanamo Abahemori bari bagituye.

⁴⁰Nuko Gilihadi, Musa ayiha Makiri mwene Manase, arahatura.

⁴¹Yayiri mwene Manase aragenda yigabiza umugi wa Kenati n’iyindi mito iwukikije, maze awitirira izina rye Novahi.