Read kinyarwanda Ibarura 8 Bible Online

Ibarura 8 - kinyarwanda bible

Ibarura 8

¹[16] Uhoraho abwira Musa, ati

²«Dore ibyo uzabwira Aroni: Nucana amatara yo ku kinyarumuri uko ari arindwi, ajye amurika imbere yacyo.»

³Aroni abigenza atyo: acana amatara imbere y’ikinyarumuri nk’uko Uhoraho yari yarabitegetse Musa.

⁴Dore uko icyo kinyarumuri cyari gikoze: cyari gicuze muri zahabu kuva hasi kugeza ku mitako yo hejuru. Icyo kinyarumuri cyari cyarakozwe bakurikije urugero Uhoraho yari yareretse Musa.

⁵Uhoraho abwira Musa, ati

⁶«Mu bana ba Israheli ushyire Abalevi ukwabo maze ubasukure.

⁷Uzabagenzereza utya kugira ngo ubasukure: Uzabasukeho amazi yo kubahanaguraho icyaha, na bo banyuze urwogosho ku mubiri wose, bamese kandi n’imyenda yabo, bisukure.

⁸Bazafata ikimasa hamwe n’ituro ryategetswe ry’ifu ivanze n’amavuta, nawe ufate ikindi kimasa uzaturaho igitambo cyo guhongera icyaha.

⁹Uzajyana Abalevi imbere y’ihema ry’ibonaniro, maze ukoranye imbaga yose y’Abayisraheli.

¹⁰Uzajyana Abalevi imbere y’Uhoraho maze Abayisraheli babaramburireho ibiganza.

¹¹Hanyuma Aroni azegurira Uhoraho Abalevi ho umugabane ahawe n’Abayisraheli bose, maze bagenerwe gutunganya imihango yose y’Uhoraho.

¹²Abalevi bazaramburira ibiganza byabo ku ruhanga rwa bya bimasa, maze wowe ubwawe uzabiture Uhoraho, kimwe ugitangeho igitambo cyo guhongera ibyaha, ikindi ugitangeho igitambo gitwikwa, kugira ngo ukorere ku Balevi umuhango w’ibabarirwa ry’ibyaha.

¹³Uzashyire Abalevi imbere ya Aroni n’abahungu be, maze uzabegurire Uhoraho ho umugabane we.

¹⁴Uzarobanure Abalevi mu Bayisraheli bose babe abanjye.

¹⁵Nyuma y’ibyo, Abalevi bazajya gutunganya imirimo yo mu ihema ry’ibonaniro. Uzabasukura rero maze ubamurikeho ituro ritanzwe.

¹⁶Kuko mbahaweho ituro, ndabeguriwe rwose mu Bayisraheli. Mbagize abanjye mu kigwi cy’uburiza bwose, ni ukuvuga abavutse ari imfura ku Bayisraheli,

¹⁷kuko icyavutse uburiza cyose muri Israheli ari icyanjye, cyaba umuntu cyangwa itungo. Nabyigeneye umunsi ntsemba ibyavutse uburiza byose byo mu Misiri.

¹⁸Cyakora ubu niyeguriye Abalevi mu kigwi cy’abavutse uburiza bose bo muri Israheli.

¹⁹Abo Balevi mbashinze Aroni n’abahungu be kugira ngo bajye bahagararira Abayisraheli bose mu mirimo yo mu ihema ry’ibonaniro, banabakorereho umuhango wo kubakiza ibyaha. Bityo Abayisraheli ntibazongera guterwa n’icyorezo cy’uko begereye ahantu hatagatifu.»

²⁰Uko ni ko Musa, Aroni n’imbaga yose y’Abayisraheli bagenjereje Abalevi. Abayisraheli bagenzereza Abalevi nk’uko Uhoraho yari yabitegetse Musa.

²¹Abalevi barisukura, bamesa n’imyenda yabo. Aroni abamurikira Uhoraho, kugira ngo bamubere ituro, maze abakoreraho umuhango ubakiza ibyaha ukanabasukura.

²²Kuva ubwo Abalevi batangirira mu maso ya Aroni n’abahungu be imirimo yabo mu ihema ry’ibonaniro. Abalevi babagenzereza uko Uhoraho yari yarabitegetse Musa.

²³Uhoraho abwira Musa, ati

²⁴«Dore amategeko agenga Abalevi: guhera ku myaka makumyabiri n’itanu, Umulevi azaba ashinzwe kurangiza imirimo yo mu ihema ry’ibonaniro.

²⁵Nagira imyaka mirongo itanu azava kuri ako kazi, ntazongera gukora.

²⁶Azafasha abavandimwe be mu kurangiza imirimo yo mu ihema ry’ibonaniro, ariko ntazakore imirimo iruhije. Ayo ni yo mategeko uzashyiraho yerekeye imirimo y’Abalevi.»