Read kinyarwanda Mika 3 Bible Online

Mika 3 - kinyarwanda bible

Mika 3

¹Nuko ndavuga nti «Nimuntege amatwi, batware ba Yakobo, namwe, bacamanza b’inzu ya Israheli! Si mwebwe se mwagombye kumenya ubutabera,

²mwebwe mwanga icyiza, mugakunda ikibi! Ngaha muruna abantu ho uruhu, mugashishimura inyama ku magufa yabo!

³Abo bantu barya inyama z’umuryango wanjye, bakabunaho uruhu, bakabajanjagura n’amagufa, bakabacagaguramo uduce nk’inyama ziri mu cyungo cyangwa mu isafuriya,

⁴abo bose, ku munsi bazatakambira Uhoraho, we azabima amatwi! Koko rero azabahisha uruhanga rwe, kuri uwo munsi, abitewe n’ibikorwa bibi bakoze.»

⁵Uhoraho avuze atya ku bahanuzi bayobya umuryango wanjye: Iyo babonye icyo birira[5] batangaza amahoro; naho utagize icyo abanaga mu kanwa, bagashoza intambara.

⁶Ni yo mpamvu ijoro rizabagwaho, mwoye kubonekerwa, mubundikiwe n’umwijima, nta cyo mugihanura; abahanuzi izuba ribarengeyeho, umunsi ubiriyeho.

⁷Ubwo abashishozi bazakorwa n’isoni, abapfumu bagwe mu kantu; bose bipfuke mu maso kuko Imana itabashubije.

⁸Ariko jyewe, mbikesheje umwuka w’Uhoraho, nuzuyemo imbaraga, ubutabera n’ubutwari, kugira ngo ngaragarize Yakobo ubuhemu bwe, na Israheli icyaha cye.

⁹Nimutege amatwi ibi ngibi, batware b’inzu ya Yakobo, namwe, bacamanza b’inzu ya Israheli; mwebwe muterwa ishozi n’ubutabera, mugatoteza icyitwa ubutungane cyose;

¹⁰mwebwe mwubakisha Siyoni amaraso, Yeruzalemu mukayishingira ku bugome[6]!

¹¹Abatware bayo baraca imanza ari uko babonye ruswa, abaherezabitambo bayo barigishiriza kuronka inyungu, abahanuzi bayo barahanura ari uko bahawe feza. Kandi bagatinyuka kwishingikiriza Uhoraho, bavuga bati «Uhoraho ari muri twe, icyago ntikizatugwirira!»

¹²Ni cyo gituma Siyoni izahingwa nk’umurima[7], Yeruzalemu igahinduka amatongo, bitewe namwe, umusozi wubatseho Ingoro ugapfukiranwa n’ibihuru.