Read kinyarwanda Mika 7 Bible Online

Mika 7 - kinyarwanda bible

Mika 7

¹Nta bwo ndagowe! Meze nk’abasaruzi bo mu cyi, cyangwa nk’abahumbahumba mu gikorera cy’imizabibu; nyamara nta n’iseri na rimwe ryo kurya, cyangwa akabuto gasigaye mu two nakundaga cyane!

²Nta ndahemuka ikirangwa mu gihugu, nta ntungane ikiboneka mu bantu! Bose bararikiye kumena amaraso, buri muntu arashandikira umuvandimwe we umutego.

³Ibiganza byabo bimenyereye gukora ibibi gusa: umutware arasaba amaturo ngo abone gutunganya umurimo we, umucamanza na we araka ruswa; umunyacyubahiro aravuga yeruye irari ry’umubiri we.

⁴Uwitwa umwere muri bo[15] ameze nk’ihwa rihanda, uw’intungane akamera nk’uruzitiro rw’imifatangwe. Ngaha rero, umunsi bamenyeshejwe n’abarinzi babo urageze, maze bose bakorwe n’ikimwaro!

⁵Mwikwisunga bene wanyu cyangwa ngo mwiringire incuti, ndetse n’imbere y’uwo upfumbase uritondere ijambo rivuye mu kanwa kawe,

⁶kuko umuhungu yita se umusazi, umukobwa agashira isoni nyina, umukazana agahangana na nyirabukwe, buri muntu akagira umwanzi mu nzu ye bwite.

⁷Naho jyewe, Uhoraho ni we mpanze amaso, niringiye Imana, Umukiza wanjye; koko rero, Imana yanjye izanyumva.

⁸[16]Sigaho kunkina ku mubyimba, mwanzi wanjye[17]! Niba naguye nzabyuka, niba kandi ndi mu mwijima, Uhoraho azambera urumuri.

⁹Ngomba kwihanganira uburakari bw’Uhoraho, kuko ari we nacumuyeho, kugeza igihe azamburanira, akansubiza uburenganzira bwanjye. Azangarura mu rumuri, nzatangarire ubutabera bwe.

¹⁰Umwanzi wanjye azabibona akorwe n’ikimwaro, we wambazaga ati «Uhoraho, Imana yawe, aba he?» Amaso yanjye azamwitegereza, ubwo azanyukanyukwa nk’icyondo mu mayira.

¹¹Umunsi wo kubaka bundi bushya inkike zawe uregereje, ari na wo munsi imipaka yawe izagurwa.

¹²Uwo munsi nyine bazaza bakugana kuva Ashuru kugera mu Misiri, kuva mu Misiri kugera ku Ruzi, kuva ku nyanja kugera ku yindi, no kuva ku musozi kugera ku wundi!

¹³(Ahandi ho hazahinduka ubutayu ku mpamvu y’abahatuye, bitewe n’imyifatire mibi yabo.)

¹⁴Ragira umuryango wawe n’inkoni yawe, ari wo bushyo wahaweho umurage, busigaye ari bwonyine rwagati mu ishyamba ry’inzitane, maze burishe muri Bashani n’i Gilihadi, nk’uko byahoze kera!

¹⁵Wongere utugaragarize ibitangaza, nk’iby’igihe utuvanye mu gihugu cya Misiri!

¹⁶Abanyamahanga bazabireba maze bakorwe n’ikimwaro, bo biringiye ububasha bwabo bwinshi, bazumirwe bipfuke ku munwa banazibe n’amatwi.

¹⁷Bazarigata umukungugu nk’inzoka, cyangwa nk’ibindi bikoko byikurura ku butaka. Bazasohoka mu bigo byabo bikomeye, basange Uhoraho, Imana yacu, badagadwa, bazahinde umushyitsi kandi bagire ubwoba kubera wowe!

¹⁸Mbese wagereranywa n’iyihe Mana, wowe wihanganira icyaha, ukirengagiza ubugome? Urukundo ugirira udusigisigi tw’umuryango wawe rutuma udakomeza kuwurakarira, ahubwo ugashimishwa no kutugirira impuhwe.

¹⁹Tugaragarize bundi bushya impuhwe zawe, unyukanyuke ibicumuro byacu, kandi ibyaha byacu byose ubirohe mu nyanja!

²⁰Yakobo uzamugaragarize ubudahemuka bwawe, na Abrahamu umwereke ineza yawe, nk’uko wabirahiye abasekuruza bacu kuva mu bihe bya kera.