Read kinyarwanda Nahumu 1 Bible Online

Nahumu 1 - kinyarwanda bible

Nahumu 1

¹Ibyahanuwe kuri Ninivi. Ngiki igitabo cy’ibyahishuriwe Nahumu w’i Elikoshi.

²Uhoraho ni Imana ifuha kandi ikihorera[1], Uhoraho arihorera, uburakari bwe bugatera ubwoba, Uhoraho yihorera ku bamurwanya, abanzi be akabagirira inzika.

³Uhoraho atinda kurakara, n’ubwo afite imbaraga nyinshi; ariko amaherezo akazahana umugira nabi. Agenda mu muyaga no mu muhengeri, ibicu bikaba umukungugu utumurwa n’ibirenge bye.

⁴Acyaha inyanja akayumutsa, agakamya n’inzuzi zose. I Bashani n’i Karumeli harumagatanye, ibimera byo muri Libani[2] birarabiranye.

⁵Imisozi irahinda umushyitsi imbere ye, utununga tugashonga, isi irahindagana imbere y’uruhanga rwe, kimwe n’abayituye bose.

⁶Ni nde wahangana n’ubukana bwe, akihanganira uburakari bwe bugurumana? Umujinya we urisukiranya nk’inkongi y’umuriro, ibitare bikiyasa imbere ye.

⁷Uhoraho ni mwiza, akaba n’ubuhungiro ku munsi w’amage, akagirira neza abamwiringira bose,

⁸ndetse n’iyo haza umuvumba ukabije. Azatsemba abamugomera, abanzi be abarohe mu mwijima.

⁹Mbese Uhoraho, muramuhimbira migambi[3] nyabaki? Ni we utsemba; umubabaro ntugaruke ukundi.

¹⁰Koko bameze nk’amahwa asobekeranye, bityo bazakongoka bashire nk’ibyatsi byumye.

¹¹Iwawe habonetse umuntu[4] ugambanira Uhoraho, akagira imigambi y’ubugiranabi.

¹²Uhoraho avuze atya: N’ubwo abanzi banyu ari benshi bakagira n’imbaraga, bazatsembwa maze bashireho. Naragusuzuguje, ariko sinzongera kugusuzuguza ukundi.

¹³Kuva ubu ngiye kujanjagura umutwaro wari ugushikamiye, nkubohore n’ingoyi zari zikuboshye.

¹⁴Uhoraho akuvuzeho ibi ngibi: Ntuzongera kugira urubyaro ruzitirirwa izina ryawe; ibigirwamana byawe by’ibibazanyo cyangwa by’ibicurano, ngiye kubivana mu ngoro yabyo; ngucukurire imva kuko nta cyo umaze.