Read kinyarwanda Habakuki 1 Bible Online

Habakuki 1 - kinyarwanda bible

Habakuki 1

¹Dore ubutumwa bwashyikirijwe umuhanuzi Habakuki, mu ibonekerwa.

²Uhoraho, nzagutabaza kugeza ryari, utanyumva, ko ngutakambira merewe nabi, ntunkize?

³Ni kuki ungaragariza ubuhemu, waba se ushyigikiye ubushikamirwe[1]? Nta kindi nkibona kitari ukurimbuka n’urugomo, ahantu hose hari impaka n’amahane!

⁴Amategeko ntagikurikizwa, ubutabera bwarapfukiranywe, kuko umugiranabi ashikamira intungane; bityo ubutabera bw’iki gihe bukaba ibinyoma bisa.

⁵Nimurebe ishyano rigwiririye amahanga maze mwumirwe; kuko icyo ngiye gukora guhera ubu, mutari bucyemere, kabone n’aho hagira ukibabwira!

⁶Ngaha ngiye guhagurutsa Abakalideya[2], iryo hanga ritagira impuhwe, kandi ry’irinyamaboko, rizenguruke isi yose, kugira ngo ryigarurire ibihugu bitari ibyaryo.

⁷Ni ihanga riteye ubwoba kandi ryihagazeho, imbaraga zaryo zituma nta we urihangara.

⁸Amafarasi yabo yihuta kurusha ingwe, akarusha ibirura bya nijoro kunyaruka. Abanyamafarasi babo bariho barasimbuka, ngabo baturutse kure baguruka nka kagoma yihutira gufata icyo irya.

⁹Bose icyarimwe bazanywe no kugira nabi, ngabo baraje baromboreje imbere yabo; barundanyije imfungwa zingana n’umusenyi!

¹⁰Ni abantu badakangwa abami, bagasuzugura abategetsi; bahinyura ibigo byose bikomeye, ahubwo bakarundarunda igitaka imbere yabyo, ari cyo bazamukiraho, bakabyigarurira.

¹¹Baragenda nk’umuyaga w’inkubi, bakihutira kujya n’ahandi kuhayogoza; imbaraga zabo ni zo bagize imana yabo.

¹²Uhoraho, kuva mu ntangiriro se si wowe Mana yanjye, Nyir’ubutagatifu wanjye kandi utazapfa bibaho? Uhoraho, washyizeho uwo mwanzi[3] ngo aducire urubanza, uramukomeza, wowe Rutare, kugira ngo aduhane.

¹³Nyamara se, ko amaso yawe azira inenge, washobora ute kwitegereza ikibi, no kwihanganira akarengane? Ni kuki ukomeza kwirengagiza amahano akorwa n’abagambanyi, ukicecekera igihe umugiranabi aconcomera umurusha ubutungane?

¹⁴Abantu ubagenzereza nk’amafi yo mu nyanja, mbese nk’ibikururuka mu mazi bitagira umutware!

¹⁵Abo bose umwanzi azabarobesha ururobo, abafatire mu rushundura rwe, abashyire mu mutego we. Icyo gihe azishima kandi asabagire,

¹⁶nuko ature igitambo rwa rushundura rwe, atwikire ububani uwo mutego[4] we, kuko ari byo akesha kurya ibitubutse kandi byiza.

¹⁷Mbese azareka ryari gufatira amahanga mu rushundura rwe, ngo akomeze kuyatsemba nta mbabazi?