Read kinyarwanda Sofoniya 1 Bible Online

Sofoniya 1 - kinyarwanda bible

Sofoniya 1

¹Dore ijambo Uhoraho yabwiye Sofoniya mwene Kushi, mwene Gedaliya, mwene Amariya, mwene Hezekiya; ubwo hakaba igihe Yoziya mwene Amoni, yari umwami wa Yuda.

²[1] Ngiye gutsemba ibiri ku isi byose, uwo ni Uhoraho ubivuze.

³Nzatsemba abantu n’inyamaswa, inyoni zo mu kirere n’amafi yo mu nyanja, n’abagome bose mbatere gutsitara; koko, nzarimbura abantu ku isi! Uwo ni Uhoraho ubivuze.

⁴[2]Ngiye kuramburira ikiganza cyanjye kuri Yuda, no ku baturage bose ba Yeruzalemu; mpatsembe abasigaye mu basengaga Behali, kimwe n’izina ry’abaherezabitambo bayo.

⁵Nzatsemba aburira hejuru y’amazu kugira ngo bapfukamire ingabo zo mu ijuru[3], kimwe n’abapfukamira Uhoraho, bakirahira imana yabo Milikomu.

⁶Nzatsemba abirengagije Uhoraho, batakimushakashaka kandi ntibamugishe inama.

⁷Nimuceceke imbere ya Nyagasani Uhoraho, kuko umunsi w’Uhoraho wegereje! Ni koko, Uhoraho yateguye igitambo, anatagatifuza abatumirwa be.

⁸Bityo rero, ku munsi w’igitambo cy’Uhoraho, nzahana abategetsi n’abatware; kimwe n’abambara nk’abanyamahanga bose.

⁹Uwo munsi nzahana abazamuka amadarajya (y’umwami[4]), maze inzu y’umutegetsi wabo bakayuzuza ibivuye ku rugomo no ku buhendanyi.

¹⁰Uwo munsi — uwo ni Uhoraho ubivuze — ku Irembo ry’amafi[5] hazumvikana induru, mu Mugi mushya[6] hacure umuborogo, ku musozi humvikane urusaku rukaze!

¹¹Nimuboroge, mwe abatuye mu karere k’epfo, kuko inyoko y’abacuruzi yatsiratsijwe, n’abapimaga feza bose bakaba batsembwe!

¹²Icyo gihe nyine, nzanyura muri Yeruzalemu hose, nifashishije amafumba y’umuriro, kugira ngo ntahure abasutamye ku mwanda wabo, maze bakibwira mu mutima wabo bati «Uhoraho nta cyo akora, ari icyiza ari n’ikibi.»

¹³Nuko rero, ubukungu bwabo buzagabizwa abasahuzi, n’amazu yabo asenywe; bubatse amazu ariko ntibazayaturamo, bahinze imizabibu, ariko ntibazanywa divayi yayo.

¹⁴Umunsi ukomeye w’Uhoraho uregereje, uri hafi kandi uraje bwangu! Mbega imiborogo[7] ikakaje izaba ku munsi w’Uhoraho, ku buryo n’intwari ubwazo zizatabaza!

¹⁵Uwo munsi uzaba umunsi w’uburakari, umunsi w’amakuba n’agahinda, umunsi w’akaga n’ukurimbuka, umunsi w’umwijima n’icuraburindi, umunsi w’igihu n’ibicu byijimye,

¹⁶umunsi w’urusaku rw’ihembe n’induru y’intambara, kuko ari bwo bazatera imigi ikomeye n’iminara miremire yo ku nkike zayo.

¹⁷Nzagusha abantu mu makuba, barindagire nk’impumyi, kuko bacumuye kuri Uhoraho; amaraso yabo azanyanyagizwa nk’umukungugu, intumbi zabo zijugunywe nk’imyanda.

¹⁸Ari feza, ari na zahabu yabo, nta kizashobora kubagobotora. Ku munsi w’uburakari bw’Uhoraho, isi yose izakongorwa n’umuriro w’ugufuha kwe! Koko, agiye gutsemba anarimbure burundu abatuye isi bose.