Read kinyarwanda Zakariya 10 Bible Online

Zakariya 10 - kinyarwanda bible

Zakariya 10

¹Nimusabe Uhoraho ngo imvura y’itumba icikire igihe. Uhoraho ni we utuma habaho imirabyo, agatanga imvura ihagije, imeza buri cyatsi cyo mu mirima.

²Ni koko, ibigirwamana byatanze ibisubizo bya nta byo, n’ibyo abapfumu bahanuye biba ibinyoma. Barotora inzozi zibeshya, bakanatanga amahumure adafashe. Ni cyo cyatumye imbaga yigendera nk’ubushyo bumerewe nabi, kuko bwabuze umushumba.

³[21]Uburakari bwanjye bugiye kugurumanira abashumba, maze amasekurume nyibasire. Koko, Uhoraho, Umugaba w’ingabo, azasura ubushyo bwe, ari bwo nzu ya Yuda; azayigire nk’ifarasi y’indatwa ku rugamba.

⁴Mu nzu ya Yuda hazaturuka ibuye nsanganyarukuta, haturuke n’inkingi ifashe ihema, n’umuheto w’intambara, haturukemo n’abatware bose.

⁵Bazaba ari intwari, bazarwane baribata ibyondo byo mu mayira; bazatsinda kuko Uhoraho azaba ari kumwe na bo, abazaba bari ku mafarasi bazakorwe n’isoni.

⁶Nzakomeza ubutwari bw’inzu ya Yuda, nkize n’inzu ya Yozefu. Nzabasubiranya kuko mbafitiye impuhwe nk’aho ntigeze mbatererana; nzabumva kuko ndi Uhoraho, Imana yabo.

⁷Ab’inzu ya Efurayimu bose bazaba intwari, basagwe n’ibyishimo nk’abanyoye divayi. Abana babo nibababona bazishima, basabwe n’umunezero babikesheje Uhoraho.

⁸Nzabahamagara mbakoranyirize hamwe kuko nabacunguye, bazongere bagwire nk’uko bahoze kera.

⁹Nabatatanyirije mu mahanga; ariko n’ubwo bazaba kure, bazanyibuka; bazabyara abana kandi bazatahuke.

¹⁰Nzabagarura mbakoranyirize hamwe, mbavanye mu gihugu cya Misiri na Ashuru. Nzabinjiza mu gihugu cya Gilihadi no muri Libani, ariko n’ibyo ntibizaba bihagije.

¹¹Bazambuka inyanja ya Misiri, Uhoraho azacubya imivumba yo mu nyanja, amazi yose ya Nili azakama. Ubwirasi bwa Ashuru buzashira, inkoni ya Misiri ivanweho.

¹²Imbaraga zabo zizaba muri Uhoraho, kandi baziratane izina rye, uwo ni Uhoraho ubivuze.