Read kinyarwanda Zakariya 9 Bible Online

Zakariya 9 - kinyarwanda bible

Zakariya 9

¹Iteka ryaciwe. Ijambo ry’Uhoraho ryageze mu gihugu cya Hadaraki, i Damasi rirahahagarara; kuko isoko ya Aramu ari iy’Uhoraho kimwe n’imiryango yose ya Israheli,

²na Hamati umuturanyi wayo, ndetse na Tiri na Sidoni, ari ho hari ubuhanga bwinshi.

³Tiri yiyubakiye ikigo gikomeye, irundarunda feza nyinshi ingana n’umukungugu, na zahabu ingana n’icyondo cyo mu mayira.

⁴Nyamara Uhoraho azayigarurira, arohe inkike zayo mu nyanja, na yo ubwayo izatwikwe n’umuriro.

⁵Ashikeloni izaterwa ubwoba n’ibyo bikubara, Gaza ishengurwe n’umubabaro, na Ekironi ibure ibyo yari yishingikirije. Gaza ntizongera kugira umwami, na Ashikeloni yoye guturwa ukundi.

⁶Ashidodi izaturwa n’ibinyendaro, nzatsembe n’ubwibone bw’Umufilisiti.

⁷Nzavana amaraso mu kanwa ke, muvane mu menyo ibiribwa bizira, bityo na we azabe uwasigaye w’Imana yacu. Azagira uruhare mu muryango wa Yuda, na Ekironi izamere nk’Umuyebuzi.

⁸Nzashinga ingando imbere y’inzu yanjye nyirinde abagenda n’abagaruka; nta munyamaboko uzongera guhonyora umuryango wanjye, kuko ubu mbyirebera n’amaso yanjye.

⁹[18]Ishime unezerwe, mwari w’i Siyoni! Urangurure urwamo rw’ibyishimo, mwari w’i Yeruzalemu! Dore umwami wawe aragusanze, ni intungane n’umutsinzi, aroroshya kandi yicaye ku ndogobe, ku cyana cy’indogobe kikiri gitoya.

¹⁰Amagare y’intambara azayavana muri Efurayimu, no muri Yeruzalemu amagare y’urugamba. Azavunagura umuheto w’intambara, ibihugu abitangarize amahoro. Ingoma ye izava ku nyanja igere ku yindi, ihere no ku Ruzi igarukire ku mpera z’isi[19].

¹¹Naho wowe, ubikesheje isezerano ry’amaraso[20] twagiranye, ngiye kukurekurira imfungwa zawe, zifungiye mu cyobo cyakamye.

¹²Nimuhaguruke mu mugi ukomeye, mfungwa zuzuye amizero, n’uyu munsi ndetse ndabihamya: nzaguha ibyiza byikubye kabiri.

¹³Nafoye umuheto wanjye ari wo Yuda, nywutamikamo umwambi wanjye, ari wo Efurayimu. Naho wowe Siyoni, ngiye gukaza abahungu bawe, batere aba Yavani, kandi nzakubangure nk’uko intwari ibangura inkota yayo.

¹⁴Uhoraho azabagwa gitumo, umwambi we ubatungure nk’umurabyo. Uhoraho Imana azavuza akarumbeti, aze agendera mu nkubi y’umuyaga wo mu majyepfo.

¹⁵Uhoraho, Umugaba w’ingabo, azabarinda: amabuye y’umuhumetso azatsemba kandi ajanjagure abanzi, anywe amaraso nk’aho ari divayi, asendere nk’urwabya rw’icyuhagiro rwuzuye amaraso y’ibitambo, cyangwa nk’amahembe yo ku rutambiro.

¹⁶Uwo munsi nyine, Uhoraho Imana yabo azabakiza, bo ntama z’umuryango we. Bazasa n’amabuye y’agaciro gakomeye, bazabengerane mu gihugu cyabo.

¹⁷Mbega ukuntu bazahirwa! Mbega ukuntu bazaba ari beza! Ingano zizashishisha abasore, na divayi nshyashya ishimishe inkumi.