Read kinyarwanda Matayo 12 Bible Online

Matayo 12 - kinyarwanda bible

Matayo 12

¹Icyo gihe, ku munsi w’isabato, Yezu anyura mu mirima yeze. Abigishwa be bakaba bashonje, bamamfuza ingano, barazirya.

²Abafarizayi babibonye baramubwira bati «Dore re, abigishwa bawe barakora ibyabujijwe ku isabato[67]!»

³Ariko we arababwira ati «Ntimwasomye[68] uko Dawudi yabigenjeje, igihe yari ashonje, we n’abo bari kumwe?

⁴Uko yinjiye mu Ngoro y’Imana, n’uko bariye imigati y’umumuriko batashoboraga kurya, kuko yari igenewe abaherezabitambo bonyine?

⁵Cyangwa se ntimwasomye mu Mategeko uko abaherezabitambo bakorera mu Ngoro y’Imana ku munsi w’isabato bahora bica ikiruhuko cyayo, ntibibabere icyaha?

⁶Nyamara rero ndabibabwiye: hano hari igitambutse iyo Ngoro.

⁷Iyo musobanukirwa n’iri jambo ngo ’Icyo nshaka ni impuhwe, si igitambo[69]’, ntimuba mwarahamije icyaha abaziranenge.

⁸Koko, Umwana w’umuntu ni Umugenga w’isabato.»

⁹Avuye aho, ajya mu isengero ryabo.

¹⁰Maze ubwo hakaba umuntu ufite ikiganza cyumiranye. Nuko baramubaza bati «Ese biremewe gukiza umuntu ku munsi w’isabato?», bagira ngo babone icyo bamurega.

¹¹We rero arabasubiza ati «Ni nde muri mwe wagira intama imwe, yagwa mu mwobo ku munsi w’isabato, ntajye kuyikuramo?

¹²Nyamara umuntu arushije kure intama agaciro! Nuko rero biremewe kugira neza ku munsi w’isabato.»

¹³Hanyuma abwira uwo muntu ati «Rambura ikiganza cyawe.» Arakirambura, nuko kimera neza, kiba kizima nk’ikindi.

¹⁴Ni bwo Abafarizayi basohotse, bajya inama yo gushaka uko bamwicisha.

¹⁵Yezu abimenye, ava aho hantu. Abantu benshi baramukurikira, nuko arabakiza bose,

¹⁶kandi arabihanangiriza ngo boye kumwamamaza.

¹⁷Bityo huzuzwa ibyavuzwe n’umuhanuzi Izayi, ngo

¹⁸«Dore Umugaragu wanjye nitoreye, Inkoramutima yanjye natonesheje rwose. Nzamushyiraho Roho wanjye, na we azamenyeshe abanyamahanga ukuri.

¹⁹Ntazatongana, ntazasakuza, nta n’uzumva ijwi rye mu makoraniro.

²⁰Ntazavuna urubingo rwarabiranye, ntazazimya ifumba icyaka. Azakomeza ukuri kuzarinde gutsinda;

²¹abanyamahanga bazizera Izina rye[70].»

²²Nuko Yezu bamuzanira umuntu wahanzweho na roho mbi, akaba impumyi n’ikiragi; aramukiza, nuko ikiragi kiravuga kandi kirareba.

²³Rubanda rwose baratangara, baravuga bati «Aho uriya ntiyaba Mwene Dawudi?»

²⁴Abafarizayi babyumvise, baravuga bati «Belizebuli[71], umutware wa roho mbi, ni we yirukanisha roho mbi.»

²⁵Yezu amenye ibyo batekereza, arababwira ati «Ingoma yabyaye amahari irarimbuka: nta mugi, nta rugo byasubiranamo ngo bikomere.

²⁶Niba Sekibi yirukana Sekibi, ubwo ni we wirwanya. Ingoma ye izakomera ite?

²⁷Niba kandi ari Belizebuli nirukanisha roho mbi, abana banyu bazirukanisha nde? Ni bo rero bazababera abacamanza.

²⁸Ariko niba ari Roho w’Imana nirukanisha roho mbi, ni uko Ingoma y’Imana yabagezemo.

²⁹Cyangwa se, umuntu ashobora ate kwinjira mu nzu y’umunyamaboko no gusahura ibintu bye atabanje kumuboha? Ni bwo yabona kumusahurira inzu.

³⁰Utari kumwe nanjye arandwanya, n’utarunda hamwe nanjye aranyanyagiza.

³¹Ni cyo gituma mbabwira nti: Icyaha cyose n’ubutukamana bwose bizababarirwa, ariko gutuka Roho Mutagatifu ntibizababarirwa.

³²Kandi nihagira uvuga Umwana w’umuntu nabi, azagirirwa imbabazi; ariko navuga nabi Roho Mutagatifu[72], ntazagirirwa imbabazi, ari muri iki gihe, ari no mu kizaza.

³³Niba mufite igiti cyiza, n’imbuto zacyo zizaba nziza; nyamara nimugira igiti kibi, n’imbuto zacyo zizaba mbi: kuko igiti kirangwa n’imbuto zacyo.

³⁴Mwa nyoko mbi z’impiri mwe, mwashobora mute kuvuga amagambo meza kandi muri babi? N’ubundi akuzuye umutima gasesekara ku munwa!

³⁵Umunyamico myiza avana mu mutima we ibyiza bibitsemo; n’umunyamico mibi akavana mu mutima we ibibi byawusabitse.

³⁶Ndabibabwira: ku munsi w’urubanza, abantu bazabazwa ijambo ryose ritagira aho rishingiye bazaba baravuze.

³⁷Kuko amagambo yawe ari yo azatuma uba intungane, cyangwa se agatuma ucibwa.»

³⁸Nuko bamwe mu bigishamategeko no mu Bafarizayi baraterura, bati «Mwigisha, turifuza kubona ukora igitangaza.»

³⁹Arabasubiza ati «Iyi nyoko mbi kandi y’abahemu irashaka ikimenyetso! Nta kindi kimenyetso izahabwa, atari icy’umuhanuzi Yonasi[73].

⁴⁰Nk’uko Yonasi yamaze mu nda y’igifi iminsi itatu n’amajoro atatu, ni na ko Umwana w’umuntu azamara mu nda y’isi iminsi itatu n’amajoro atatu.

⁴¹Ku munsi w’urubanza, Abanyaninivi bazahagurukira ab’iyi ngoma, maze babatsinde, kuko bo bumvise inyigisho za Yonasi maze bakisubiraho, kandi hano hari uruta Yonasi!

⁴²Umwamikazi w’igihugu cy’epfo azahagurukira ab’iyi ngoma kuri uwo munsi w’urubanza, maze abatsinde, kuko yaturutse iyo gihera aje kumva ubuhanga bwa Salomoni[74], kandi hano hari uruta Salomoni!

⁴³Iyo roho mbi ivuye mu muntu, ibungera ahantu h’agasi, ishaka uburuhukiro maze ikabubura.

⁴⁴Nuko ikibwira iti ’Nsubiye mu nzu yanjye navuyemo.’ Yahagera igasanga idatuwe, ikubuye, iteguye.

⁴⁵Nuko ikagenda ikazana roho mbi zindi ndwi ziyitambukije ubugome, zikaza zikahatura. Nuko imimerere ya nyuma y’uwo muntu ikarushaho kuba umwaku. Nguko uko bizamerera iki gisekuru kibi.»

⁴⁶Akibwira rubanda, nyina n’abavandimwe be[75] baba bari hanze, bashaka kugira icyo bamubwira. (

⁴⁷Nuko umuntu aramubwira ati «Dore nyoko n’abavandimwe bawe bahagaze hanze, barashaka ko muvugana.»)

⁴⁸Yezu asubiza uwari ubimubwiye, ati «Mama ni nde, n’abavandimwe banjye ni bande?»

⁴⁹Nuko arambura ukuboko yerekeje ku bigishwa be, ati «Dore mama n’abavandimwe banjye!

⁵⁰Kuko ukora icyo Data wo mu ijuru ashaka wese, ni we muvandimwe wanjye, na mushiki wanjye, na mama.»