Read kinyarwanda Matayo 13 Bible Online

Matayo 13 - kinyarwanda bible

Matayo 13

¹Uwo munsi Yezu ava imuhira, maze yicara ku nkombe y’inyanja.

²Abantu benshi bamuteranira iruhande, bituma ajya kwicara mu bwato, naho rubanda rwose ruhagaze ku nkombe.

³Ababwirira byinshi mu migani, ati «Umubibyi yavuye iwe ajya kubiba.

⁴Nuko igihe abiba, imbuto zimwe zigwa iruhande rw’inzira, inyoni ziraza zirazirya.

⁵Izindi zigwa mu rubuye, ntizahasanga igitaka cyinshi, nuko zimera vuba, kuko igitaka cyari gike;

⁶izuba rivuye zirashya, ziruma, kuko zitari zifite imizi.

⁷Izindi zigwa mu mahwa, amahwa arakura, nuko arazipfukirana.

⁸Izindi zigwa mu gitaka cyiza, nuko zera imbuto, imwe ijana, indi mirongo itandatu, indi mirongo itatu.

⁹Ufite amatwi, niyumve!»

¹⁰Abigishwa baramwegera, baramubaza bati «Igituma ubabwira mu migani ni iki?»

¹¹Arabasubiza ati «Mwebweho mwahawe kumenya amabanga y’Ingoma y’ijuru; naho bo, ntibabihawe.

¹²Kuko ufite byinshi ari we uzongererwa agakungahara; naho ufite bike, n’icyo yari afite bazakimwaka.

¹³Ni cyo kintera kubabwirira mu migani, kuko bareba ntibabone, batega amatwi ntibumve kandi ntibasobanukirwe.

¹⁴Bityo ubuhanuzi bwa Izayi bubuzurizwaho, ngo ’Kumva muzumva, ariko ntimuzasobanukirwa; kureba muzareba, ariko ntimuzabona.

¹⁵Kuko umutima w’uwo muryango unangiye, bipfutse amatwi bahunza n’amaso, bagira ngo batabona, bagira ngo batumva, bagira ngo umutima wabo udasobanukirwa, bakisubiraho, nkabakiza[76]!’

¹⁶Mwebweho, amaso yanyu arahirwa kuko abona, n’amatwi yanyu arahirwa kuko yumva.

¹⁷Ndababwira ukuri: abahanuzi benshi n’intungane nyinshi bifuje kubona ibyo muruzi ntibabibona, kumva ibyo mwumva ntibabyumva!

¹⁸Mwebweho rero, nimwumve icyo umugani w’umubibyi uvuga.

¹⁹Umuntu wese wumva ijambo ry’Imana, ariko ntaryiteho, ameze nk’imbuto yabibwe iruhande rw’inzira: Sekibi araza akamukuramo icyari cyabibwe mu mutima we.

²⁰Imbuto yabibwe mu rubuye, isobanura umuntu wumva ijambo, ako kanya akaryakirana ibyishimo,

²¹nyamara ntirimucengeremo ngo rimushingemo imizi kubera ko ahora ahindagurika; iyo hadutse amagorwa cyangwa ibitotezo bitewe n’iryo jambo, agwa ako kanya.

²²Naho imbuto ibibwe mu mahwa, yo isobanura umuntu wumva neza ijambo, ariko imihihibikano y’isi n’ibishuko by’ubukungu bigapfukirana iryo jambo, rigapfa ubusa.

²³Hanyuma imbuto ibibwe mu gitaka cyiza, isobanura uwumva ijambo akaryitaho: uwo arera akabyara imbuto, umwe ijana, undi mirongo itandatu, undi mirongo itatu.»

²⁴Abacira undi mugani ati «Ingoma y’ijuru imeze nk’umuntu wabibye imbuto nziza mu murima we.

²⁵Ariko igihe abantu basinziriye, umwanzi we araza, abiba urumamfu hagati y’ingano, nuko arigendera.

²⁶Ingano ziramera, zimaze kugengarara, ubwo urumamfu na rwo ruragaragara.

²⁷Abagaragu basanga nyir’umurima, baramubaza bati ’Shobuja, ntiwari warabibye imbuto nziza mu murima wawe? Ni iki gituma harimo n’urumamfu ?’

²⁸Arabasubiza ati ’Ni umwanzi wabigize !’ Abagaragu barongera bati ’Urashaka ko tujya kururandura?’

²⁹Ati ’Oya, muri uko gutoranya urumamfu, mutavaho murandura n’ingano.

³⁰Nimureke bikure byombi kugeza mu isarura; igihe cy’isarura nzabwira abasaruzi, nti ’Nimubanze mutoranye urumamfu muruhambiremo imiba, muyijugunye mu muriro; naho ingano muzihunike mu kigega cyanjye.’»

³¹Abacira undi mugani ati «Ingoma y’ijuru imeze nk’imbuto ya sinapisi[77], umuntu yateye mu murima we.

³²Ni yo ntoya mu mbuto zose, ariko iyo imaze gukura, isumba imyaka yose yo mu murima, ndetse ikaba igiti, ku buryo inyoni zo mu kirere ziza kwarika mu mashami yacyo.»

³³Abacira undi mugani ati «Ingoma y’ijuru imeze nk’umusemburo umugore yavanze n’incuro eshatu z’ifu, kugeza igihe byose bitutumbye.»

³⁴Ibyo byose Yezu yabibwiraga rubanda mu migani, nta cyo yababwiraga atababwiriye mu migani;

³⁵bityo huzuzwa ibyo umuhanuzi yavuze ati «Umunwa wanjye uzavuga mu migani, nzamamaza ibyahishwe kuva isi ikiremwa[78].»

³⁶Hanyuma asiga aho rubanda, ajya imuhira. Nuko abigishwa be baramwegera, baramubaza bati «Dusobanurire umugani w’urumamfu rwo mu murima.»

³⁷Arabasubiza ati «Ubiba imbuto nziza ni Umwana w’umuntu;

³⁸umurima ni isi; imbuto nziza ni abana b’Ingoma; urumamfu ni abana ba Nyakibi;

³⁹umwanzi warubibye ni Sekibi; isarura ni iherezo ry’isi; abasaruzi ni abamalayika.

⁴⁰Nk’uko rero batoranya urumamfu, bakarujugunya mu muriro, ni ko bizagenda mu iherezo ry’isi.

⁴¹Umwana w’umuntu azohereza abamalayika be, bavangure mu Ngoma ye abateye abandi kugwa mu cyaha bose, n’inkozi z’ibibi zose,

⁴²maze babarohe mu nyenga y’umuriro, aho bazaririra kandi bagahekenya amenyo.

⁴³Ubwo intungane zizabengerana nk’izuba mu Ngoma ya Se. Ufite amatwi, niyumve!

⁴⁴Ingoma y’ijuru imeze nk’ikintu cy’agaciro gakomeye gihishe mu murima; umuntu iyo akiguyeho, yongera kugihisha, akagenda yishimye, agatanga ibyo atunze byose, akagura uwo murima.

⁴⁵Byongeye kandi Ingoma y’ijuru imeze nk’umucuruzi washakashakaga amasaro meza.

⁴⁶Yabona isaro rimwe ry’agaciro kanini, akagenda, akagurisha ibyo atunze byose, maze akarigura.

⁴⁷Byongeye kandi Ingoma y’ijuru imeze nk’urushundura banaze mu nyanja, maze rugafata amafi y’amoko yose.

⁴⁸Iyo rwuzuye, barukururira ku nkombe, hanyuma bakicara, bakarobanurira mu bitebo afite akamaro, naho adafite akamaro bakayajugunya.

⁴⁹Ni ko bizamera mu iherezo ry’isi: abamalayika bazaza batandukanye intungane n’abagome.

⁵⁰Maze bo babarohe mu nyenga y’umuriro; aho bazaririra kandi bagahekenya amenyo.

⁵¹Ibyo byose mwabyumvise?» Bati «Yee.»

⁵²Arongera ati «Ni cyo gituma umwigishamategeko wese, wigishijwe iby’Ingoma y’ijuru, asa na nyir’urugo ukura mu bushyinguro bwe ibishya n’ibishaje[79].»

⁵³Yezu arangije iyo migani, ava aho.

⁵⁴Nuko ajya mu karere k’iwabo, ahigishiriza abantu mu isengero ryabo, bituma batangara bavuga bati «Ubu buhanga n’ubu bubasha bwinshi abikomora he?

⁵⁵Uriya si umwana wa wa mubaji? Nyina ntiyitwa Mariya? Abavandimwe be[80] si Yakobo, Yozefu, Simoni na Yuda?

⁵⁶Bashiki be bose ntiduturanye? None se biriya byose abikomora he?»

⁵⁷Nuko abatera imbogamizi. Yezu ni ko kubabwira ati «Koko nta handi umuhanuzi asuzugurirwa keretse mu gihugu cye no muri bene wabo.»

⁵⁸Nuko aho ntiyahakorera ibitangaza byinshi, abitewe n’ukutemera kwabo.