Read kinyarwanda Matayo 15 Bible Online

Matayo 15 - kinyarwanda bible

Matayo 15

¹Abafarizayi n’abigishamategeko baturutse i Yeruzalemu ni ko kwegera Yezu, bati

²«Ni iki gituma abigishwa bawe bica umuco w’abakurambere? Dore ntibakaraba iyo bagiye gufungura!»

³Arabasubiza ati «Mwebwe se, ni iki gituma mwica itegeko ry’Imana, mubikurije ku muco wanyu[82]?

⁴Dore Imana yaravuze iti ’Jya wubaha so na nyoko’, kandi iti ’Uzatuka se cyangwa nyina, azicwe.’

⁵Mwebweho ariko muravuga ngo: Umuntu wese ubwira se cyangwa nyina, ati ’Ibintu najyaga kuzagufashisha, nabituye Imana’,

⁶ntaba agitegetswe gufasha se na nyina. Bityo mukaba mukuyeho ijambo ry’Imana mukurikije umuco wanyu!

⁷Mwa ndyarya mwe! Izayi yabahanuyeho neza, igihe avuze ati

⁸’Uyu muryango unyubahisha ururimi gusa, naho imitima yabo indi kure.

⁹Icyubahiro bampa ni amanjwe: inyigisho bigisha ni amategeko y’abantu gusa[83].’»

¹⁰Nuko Yezu ahamagara rubanda, ni ko kubabwira ati «Nimutege amatwi maze mwumve!

¹¹Si igishyirwa mu kanwa gihumanya umuntu; ahubwo ikiva mu kanwa, ni cyo gihumanya umuntu.»

¹²Nuko abigishwa be baramwegera baramubwira bati «Aho uzi ko Abafarizayi bumvise ayo magambo, bikabarakaza?»

¹³Yezu ati «Agati kose kadateretswe na Data wo mu ijuru, kazarandurwa.

¹⁴Nimubihorere: ni impumyi zirandata izindi impumyi! Kandi iyo impumyi irandase indi mpumyi, zombi zigwa mu mwobo.»

¹⁵Petero araterura ati «Dusobanurire uwo mugani.»

¹⁶Yezu ati «Namwe ntimuramenya ubwenge?

¹⁷Ntimwumva se ko igishyirwa mu kanwa cyose, kijya mu nda, hanyuma kikajya mu musarane,

¹⁸naho ibiva mu kanwa bituruka mu mutima akaba ari byo bihumanya umuntu?

¹⁹Koko rero, mu mutima ni ho haturuka ibitekerezo bibi, ubwicanyi, ubusambanyi, ingeso mbi, ubujura, ububeshyi n’ubutukanyi.

²⁰Ngibyo ibyanduza umuntu; naho kurya udakarabye si byo bihumanya umuntu.»

²¹Hanyuma Yezu ava aho, yerekeza mu karere k’i Tiri n’i Sidoni.

²²Nuko Umukanahanikazi ava ku nkiko y’icyo gihugu, atera hejuru ati «Mbabarira, Nyagasani, Mwana wa Dawudi! Umukobwa wanjye yashegeshwe na roho mbi!»

²³Ariko Yezu ntiyagira icyo amusubiza. Nuko abigishwa baramwegera, baramwinginga bati «Mwirukane, kuko adusakuza inyuma.»

²⁴Ariko we arabasubiza, ati «Nta handi noherejwe, kereka mu ntama zazimiye zo mu muryango wa Israheli[84].»

²⁵Ariko uwo mugore aramwegera, aramupfukamira, avuga ati «Nyagasani, ntabara!»

²⁶Aramusubiza ati «Ntibikwiye gufata umugati w’abana ngo uwujugunyire ibibwana[85].»

²⁷Umugore na we ati «Ni koko, Nyagasani, ariko n’ibibwana birya utuvungukira tugwa aho ba shebuja bafunguriye.»

²⁸Nuko Yezu aramusubiza ati «Wa mugore we, ukwemera kwawe kurakomeye; nibikumerere uko ubishaka!» Ako kanya umukobwa we arakira.

²⁹Nuko Yezu ava aho, afata ku nkombe y’inyanja ya Galileya. Azamuka umusozi, nuko aricara.

³⁰Abantu benshi baramusanga, bazanye abacumbagira, ibimuga, impumyi, ibiragi n’abandi benshi, babashyira imbere ye arabakiza.

³¹Nuko rubanda baratangara babonye ibiragi bivuga, ibimuga bikize, abacumbagira bagenda, impumyi zibona, maze basingiza Imana ya Israheli.

³²Yezu ahamagara abigishwa be, arababwira ati «Iyi mbaga nyifitiye impuhwe, kuko hashize iminsi itatu bankurikiye, kandi bakaba badafite ibyo barya. Kubohereza bashonje simbishaka; hato batagwa mu nzira.»

³³Abigishwa baramubwira bati «Turakura he muri ubu butayu imigati ihagije abantu bangana batya?»

³⁴Yezu arabaza ati «Mufite imigati ingahe?» Baramusubiza bati «Irindwi, n’udufi dukeya.»

³⁵Nuko ategeka rubanda kwicara hasi.

³⁶Hanyuma afata ya migati irindwi na ya mafi, ashimira Imana, arayimanyura, maze ayiha abigishwa be, bayiha rubanda.

³⁷Bose bararya barahaga. Nyuma bakoranya ibisate bisigaye, byuzura inkangara ndwi!

³⁸Nyamara abariye bari ibihumbi bine, batabariyemo abagore n’abana.

³⁹Yezu amaze gusezerera rubanda, ajya mu bwato, berekeza mu karere ka Magadani[86].