Read kinyarwanda Matayo 2 Bible Online

Matayo 2 - kinyarwanda bible

Matayo 2

¹Yezu amaze kuvukira i Betelehemu ya Yudeya ku ngoma y’umwami Herodi, abanyabwenge[7] baturutse iburasirazuba baza i Yeruzalemu,

²babaza bati «Umwami w’Abayahudi uherutse kuvuka ari hehe? Twabonye inyenyeri[8] ye mu burasirazuba, none tuje kumuramya.»

³Umwami Herodi abyumvise, akuka umutima, we na Yeruzalemu yose.

⁴Akoranya abatware bose b’abaherezabitambo n’abigishamategeko[9] b’umuryango, abasiganuza aho Kristu yagombaga kuzavukira.

⁵Baramusubiza bati «Ni i Betelehemu ya Yudeya; kuko ari byo umuhanuzi[10] yanditse ati

⁶’Nawe, Betelehemu, umusozi wo muri Yudeya, si wowe giseswa mu migi yaho yose; kuko ari wowe uzaturukaho umutware uzaragira umuryango wanjye, Israheli’.»

⁷Nuko Herodi atumiza ba banyabwenge rwihishwa, abasiganuza igihe inyenyeri yabonekeye,

⁸abohereza i Betelehemu, ababwira ati «Nimugende mubaririze iby’uwo mwana; maze nimumubona, muzabimenyeshe kugira ngo nanjye njye kumuramya.»

⁹Bamaze kumva amagambo y’umwami, baragenda. Nuko ya nyenyeri bari baboneye mu burasirazuba ibajya imbere irinda igera hejuru y’aho umwana yari ari, irahahagarara.

¹⁰Ngo babone inyenyeri barishima cyane.

¹¹Binjiye mu nzu babona umwana, na nyina Mariya; nuko barapfukama baramuramya. Hanyuma bapfundura impago zabo, bamutura zahabu, ububani n’imibavu.

¹²Cyakora baburirwa mu nzozi kudasubira kwa Herodi, banyura indi nzira basubira mu gihugu cyabo.

¹³Bamaze kugenda, Umumalayika wa Nyagasani abonekera Yozefu mu nzozi, aramubwira ati «Byuka, ujyane umwana na nyina, uhungire mu Misiri; maze ugumeyo kugeza igihe nzakubwirira, kuko Herodi agiye guhigahiga umwana ngo amwice.»

¹⁴Yozefu arabyuka, ajyana umwana na nyina iryo joro, maze ahungira mu Misiri.

¹⁵Nuko abayo kugeza igihe Herodi apfiriye. Ibyo byabereye kugira ngo huzuzwe ibyo Nyagasani yavugishije umuhanuzi ati «Nahamagaye umwana wanjye wari mu Misiri[11].»

¹⁶Nuko Herodi abonye ko abanyabwenge bamubeshye, ararakara cyane, maze yohereza abica abana bose bo kuri Betelehemu n’abo ku mirenge yose iyikikije, bamaze imyaka ibiri n’abatarayigezaho, akurikije igihe yari yasobanuriwe n’abanyabwenge.

¹⁷Nuko huzuzwa ibyo umuhanuzi Yeremiya yavuze ati

¹⁸«Kuri Rama bumvise ijwi riboroga riganya cyane: ni Rasheli uririra abana be, kandi yanze guhozwa kuko batakiriho[12].»

¹⁹Herodi amaze gupfa, Umumalayika wa Nyagasani abonekera Yozefu mu nzozi akiri mu Misiri;

²⁰aramubwira ati «Haguruka, ujyane umwana na nyina, usubire mu gihugu cya Israheli; kuko abashakaga kwica umwana bapfuye».

²¹Yozefu arabyuka, ajyana umwana na nyina, asubira mu gihugu cya Israheli.

²²Ariko yumvise ko Arikelawusi yazunguye se Herodi mu Yudeya, atinya kujyayo. Nk’uko rero yabisobanuriwe mu nzozi, agana mu karere ka Galileya,

²³ajya gutura ku musozi witwa Nazareti. Bityo huzuzwa ibyavuzwe n’abahanuzi, ngo «Azitwa Umunyanazareti[13]».