Read kinyarwanda Matayo 20 Bible Online

Matayo 20 - kinyarwanda bible

Matayo 20

¹Ingoma y’ijuru imeze nka nyir’umurima wazindutse mu museke, kugira ngo ararike abamukorera mu mizabibu.

²Amaze gusezerana n’abakozi idenari[108] imwe ku munsi, abohereza mu mizabibu ye.

³Ngo asohoke nko ku isaha ya gatatu, abona abandi bandagaye ku kibuga.

⁴Arababwira ati ’Namwe nimujye mu mizabibu yanjye, ndi bubahe igihembo gikwiye.’

⁵Maze bajyayo. Yongeye gusohoka ahagana ku isaha ya gatandatu, n’ahagana ku ya cyenda, abigenza kwa kundi.

⁶Yongera kugenda ku isaha ya cumi n’imwe, abona n’abandi bahagaze, arababwira ati ’Ni iki gituma mwahagaze aha ngaha umunsi wose nta cyo mukora?’

⁷Barasubiza bati ’Ni uko nta waturaritse.’ Arababwira ati ’Namwe nimujye mu mizabibu yanjye.’

⁸Bugorobye, nyir’imizabibu abwira umuhingisha, ati ’Hamagara abakozi, ubahe igihembo cyabo, uhere ku baje nyuma, uheruke abaje mbere.’

⁹Nuko rero abo ku isaha ya cumi n’imwe baraza, maze buri muntu ahabwa idenari.

¹⁰Aba mbere baza batekereza ko bari burengerezweho; na bo ariko buri muntu ahabwa idenari imwe.

¹¹Bayakira binubira nyir’umurima, bati

¹²’Abaje nyuma bakoze isaha imwe gusa, ubagiriye nka twe twahanganye n’umunsi wose n’izuba.’

¹³We rero asubiza umwe muri bo, ati ’Mugenzi wanjye, nta cyo nkurenganyijeho; si idenari imwe twasezeranye?

¹⁴Fata ikiri icyawe, maze wigendere. Jye nshatse guha uwaje nyuma nk’icyo nguhaye.

¹⁵Sinshobora se kugenza uko nshaka mu byanjye? Cyangwa se undebye nabi kuko ngize neza?’

¹⁶Nguko uko aba nyuma bazaba aba mbere, n’aba mbere bakazaba aba nyuma[109].»

¹⁷Yezu akaba arazamuka yerekeza i Yeruzalemu, ashyira ba Cumi na babiri ukwabo, maze ababwirira mu nzira ati

¹⁸«Dore tuzamutse tujya i Yeruzalemu, maze Umwana w’umuntu azagabizwe abatware b’abaherezabitambo n’abigishamategeko. Bazamucira urubanza rwo gupfa,

¹⁹bazamugabiza abanyamahanga kugira ngo ashinyagurirwe, akubitwe, maze abambwe ku musaraba; ariko ku munsi wa gatatu azazuke.»

²⁰Nuko nyina wa bene Zebedeyi asanga Yezu ari kumwe n’abahungu be bombi, arapfukama, ashaka kugira icyo amusaba.

²¹Yezu aramubaza ati «Urashaka iki?» Undi aramusubiza ati «Dore aba bahungu banjye bombi, tegeka ko bazicarana nawe, umwe iburyo, undi ibumoso, mu Ngoma yawe.»

²²Yezu arabasubiza ati «Ntimuzi icyo musaba; mushobora se kunywera ku nkongoro[110] ngiye kunyweraho?» Baramusubiza bati «Turabishobora.»

²³Yezu ati «Koko muzanywera ku nkongoro yanjye, naho kwicara iburyo n’ibumoso bwanjye, si jye ubitanga: ni ibyo abo Data yabigeneye.»

²⁴Abandi cumi babyumvise barakarira abo bavandimwe bombi.

²⁵Nuko Yezu arabahamagara, arababwira ati «Muzi ko abahawe kugenga amahanga, bayagenga uko bashatse, kandi ko abatware bayo bayategekesha agahato.

²⁶Kuri mwebwe rero, si ko bimeze. Ahubwo ushaka kuba mukuru muri mwe, niyigire umuhereza wanyu;

²⁷uzashaka kandi kuba uwa mbere muri mwe, azihindure umugaragu wanyu.

²⁸Ni nk’uko Umwana w’umuntu ataje gukorerwa, ahubwo yaje gukorera abandi no gutanga ubugingo bwe ngo bube incungu ya benshi».

²⁹Igihe bavuye i Yeriko abantu benshi baramukurikira.

³⁰Ubwo impumyi ebyiri zari zicaye iruhande rw’inzira, zumvise ko Yezu ahise, zitera hejuru ziti «Nyagasani, Mwana wa Dawudi, tubabarire!»

³¹Rubanda barazicyaha ngo ziceceke, ariko zirushaho gusakuza, ziti «Nyagasani, Mwana wa Dawudi, tubabarire!»

³²Yezu arahagarara, arazihamagara, arazibaza ati «Murashaka ko mbagirira nte?»

³³Ziramusubiza ziti «Nyagasani, duhe guhumuka amaso!»

³⁴Yezu agize impuhwe, azikora ku maso, maze ako kanya zirabona. Ni ko kumukurikira.